Nî-hi-bí-kì 13

Nî-hi-bí-kì 13 - 現代台語譯本羅馬字版(TTVR)-闽南语

Chiong Gōa-cho̍k-lâng Hun-khui

1Hit-ji̍t, ū lâng tha̍k Mô͘-se ê Lu̍t-hoat-su hō͘ jîn-bîn thiaⁿ, tha̍k-tio̍h lāi-bīn ū án-ni kì-chài: A-bûn-lâng kap Mô͘-ap-lâng éng-oán bōe-ēng-tit ka-ji̍p Siōng-tè ê hōe,

2in-ūi in m̄-nā bô ēng chia̍h-mi̍h kap chúi gêng-chiap Í-sek-lia̍t-lâng, tian-tò chhiàⁿ Pa-lân khì chiù-chó͘ Í-sek-lia̍t-lâng; m̄-kú lán ê Siōng-tè hō͘ hit-ê chiù-chó͘ pìⁿ-chòe chiok-hok.

3In thiaⁿ-tio̍h chit-tōaⁿ lu̍t-hoat liáu-āu, chiū chiong Í-sek-lia̍t-lâng kap hiah-ê ū gōa-cho̍k hiat-thóng ê lâng hun-khui.

Nî-hi-bí ê Kái-kek

4Chit-ê tāi-chì í-chêng, koán-lí lán Siōng-tè sèng-tiān hú-khò͘ ê chè-si Í-lī-a-si̍t, kap A-bûn-lâng To-pí-ngá chin ū kau-chêng,

5chiū ūi-tio̍h i chún-pī chi̍t keng tōa keng pâng. Chit-keng pâng-keng í-chêng teh siu-khǹg sò͘-chè, jú-hiuⁿ, sèng-tiān ê khì-khū, í-ki̍p chiàu kui-tēng kiong-kip Lī-bī-lâng, hiàn-si--ê, siú-ōe ê ngó͘-kok, sin-chiú, kap sin-iû ê cha̍p-hūn-chi̍t, í-ki̍p gia̍h-koân hiàn hō͘ Siōng Chú, kui hō͘ chè-si ê mi̍h.

6Chit-ê tāi-chì hoat-seng ê sî, góa bô tī Iâ-lō͘-sat-léng; in-ūi Pa-pí-lûn-ông A-ta̍t-sih-se

saⁿ-cha̍p-jī nî, góa tò-khì ông hia; kè bô jōa kú góa koh tùi ông chhéng-ká.

7Góa kàu Iâ-lō͘-sat-léng chiah chai Í-lī-a-si̍t só͘ chòe ê pháiⁿ-tāi; i ūi-tio̍h To-pí-ngá tī Siōng-tè sèng-tiān ê tiâⁿ chún-pī chi̍t keng pâng.

8Góa chiū chin siū-khì, chiong To-pí-ngá só͘-ū ê ka-khū lóng hiat--chhut-khì;

9koh bēng-lēng lâng khì kiat-chēng pâng-keng, jiân-āu chiong Siōng-tè sèng-tiān ê khì-khū, sò͘-chè, kap jú-hiuⁿ koh poaⁿ--ji̍p-khì.

10Góa mā hoat-kiàn Lī-bī-lâng èng-tit ê hūn-gia̍h bô hō͘ in, tng-chit ê Lī-bī-lâng kap hiàn-si--ê soah tio̍h tò-khì ka-kī ê chhân-hn̂g choh-sit.

11Góa chiū chek-pī hiah-ê koaⁿ-tiúⁿ, kā in kóng, “Sī-án-chóaⁿ Siōng-tè ê tiān pàng hō͘ hong-hòe?” Góa chiū chū-chi̍p Lī-bī-lâng, hō͘ in hôe-ho̍k chit-bū.

12Tùi án-ni, Iû-tāi jîn-bîn chiong ngó͘-kok, sin-chiú, kap sin-iû ê cha̍p-hūn-chi̍t tòa-ji̍p hú-khò͘.

13Góa chí-phài chè-si Sī-lī-bí-ngá, keng-ha̍k-kàu-su Sat-tok, kap Lī-bī-lâng Pí-tāi-ngá koán-lí hú-khò͘; koh phài Má-tha-nî ê sun, Sat-khek ê kiáⁿ Hap-lân chòe chō͘-chhiú. In lóng chin tiong-si̍t, chīn-chit chiong mi̍h-kiāⁿ hun-hoat hō͘ in ê tông-sū.

14Góa ê Siōng-tè ah, kiû lí kì-liām góa só͘ chòe chiah-ê sū, m̄-thang chhat-siau góa ūi-tio̍h Siōng-tè ê tiān kap ho̍k-sāi I só͘ chòe ê hó-sū.

15Tī hit-tōaⁿ kî-kan, góa tī Iû-tāi khòaⁿ-tio̍h lâng tī An-hioh-ji̍t ta̍h chiú-khut, poaⁿ be̍h-khún hō͘ lû chài, koh tī An-hioh-ji̍t chiong chiú, phû-tô, bû-hoa-kó, kap ta̍k-khoán hè-mi̍h ūn ji̍p-khì Iâ-lō͘-sat-léng; góa chiū tī in bóe-bōe hit-ji̍t chek-pī in.

16Koh ū tòa tī hia ê Thài-ní-lâng, tòa hî kap ta̍k-chióng hè-mi̍h, tī An-hioh-ji̍t, tī Iâ-lō͘-sat-léng bōe hō͘ Iû-thài-lâng.

17Góa chiū chek-pī Iû-tāi hiah-ê kùi-cho̍k, kā in kóng, “Lín sī-án-chóaⁿ chòe chit-khoán pháiⁿ tāi-chì kan-hoān An-hioh-ji̍t?

18Í-chêng lín ê chó͘-sian kiám m̄-sī mā án-ni chòe, hō͘ lán ê Siōng-tè chiong che it-chhè ê chai-hō kàng-lo̍h tī lán kap chit-ê siâⁿ? Hiān-chāi lín iáu-kú kan-hoān An-hioh-ji̍t, it-tēng ōe hō͘ Siōng-tè tùi Í-sek-lia̍t hoat koh-khah tōa ê siū-khì!”

19Tī An-hioh-ji̍t khai-sí, hông-hun ê sî, góa bēng-lēng lâng koaiⁿ Iâ-lō͘-sat-léng ê siâⁿ-mn̂g, kàu An-hioh-ji̍t kè--khì í-chêng bōe-ēng-tit khui. Góa phài kúi-nā ê pō͘-hā koán-lí siâⁿ-mn̂g, chiah bián ū lâng tī An-hioh-ji̍t taⁿ hè-mi̍h ji̍p-siâⁿ.

20Tùi án-ni, seng-lí-lâng kap hoàn-bōe ta̍k-hāng hè-mi̍h ê lâng, ū chi̍t nn̄g piàn tī Iâ-lō͘-sat-léng ê siâⁿ-gōa kè-mî.

21Góa chiū kéng-kò in, kóng, “Lín sī-án-chóaⁿ tī siâⁿ-chhiûⁿ gōa kè-mî? Nā koh án-ni, góa beh hē-chhiú lia̍h lín.” Tùi hit-sî í-āu, in tī An-hioh-ji̍t chiū bô koh lâi.

22Góa bēng-lēng Lī-bī-lâng kiat-chēng ka-kī lâi kò͘-siú siâⁿ-mn̂g, hō͘ An-hioh-ji̍t hun-pia̍t-choh-sèng.

Góa ê Siōng-tè ah, kiû lí kì-liām góa só͘ chòe chiah-ê sū, chiàu lí hong-sēng ê chû-ài lîn-bín góa.

23Tī hit-tōaⁿ kî-kan, góa koh khòaⁿ-tio̍h Iû-thài-lâng chhōa A-si̍t-tu̍t-lâng, A-bûn-lâng, Mô͘-ap-lâng ê cha-bó͘-kiáⁿ chòe bó͘.

24In ê kiáⁿ-jî ū chi̍t-pòaⁿ kóng A-si̍t-tu̍t-ōe, á-sī pa̍t-cho̍k ê ōe, m̄-kú bōe-hiáu kóng Iû-tāi-ōe.

25Góa chiū chek-pī in, kā in chiù-chó͘, phah kúi-nā ê lâng, chhoah in ê thâu-mn̂g, kah in kí Siōng-tè chiù-chōa, bô beh koh chiong in ê cha-bó͘-kiáⁿ kè hō͘ gōa-cho̍k-lâng ê kiáⁿ, in kap in ê kiáⁿ mā bô beh chhōa gōa-cho̍k-lâng ê cha-bó͘-kiáⁿ.

26Góa kā in kóng, “Í-sek-lia̍t-ông Só͘-lô-bûn kiám m̄-sī ūi-tio̍h chit-khoán tāi-chì hoān-chōe? Tī lia̍t-kok tiong, bô chi̍t ê ông chhin-chhiūⁿ i tit-tio̍h Siōng-tè ê thiàⁿ, koh tit-tio̍h Siōng-tè kā i siat-li̍p chòe Í-sek-lia̍t choân-kok ê ông; m̄-kú gōa-cho̍k ê bó͘ hō͘ i hoān-chōe.

27Án-ni, goán ná thang chhut-chāi lín chòe chit-khoán giâm-tiōng ê pháiⁿ-tāi, chhōa gōa-cho̍k ê lú-chú, ngó͘-ge̍k lán ê Siōng-tè?”

28Tōa-chè-si Í-lī-a-si̍t ê sun, Iâ-hô-iâ-tāi ê kiáⁿ, ū chi̍t ê sī Hô-lûn-lâng Chham-pa-la ê kiáⁿ-sài; góa chiū chiong Iâ-hô-iâ-tāi tùi góa chia kóaⁿ--chhut-khì.

29Góa ê Siōng-tè ah, kiû lí ōe-kì-tit in só͘ chòe ê pháiⁿ-tāi; in-ūi in phah lâ-sâm chè-si ê chit-bū, ûi-pōe Lī-bī-lâng chòe chè-si--ê ê iok.

30Án-ni, góa kā in kiat-chēng, hō͘ in thoat-lī gōa-cho̍k-lâng it-chhè ê ù-òe, koh hun-phài chè-si kap Lī-bī-lâng ê pan-chhù, hō͘ in chip-hêng ka-kī ê chit-chek,

31tēng-kî hōng-hiàn chhâ-liāu kap chho͘-se̍k ê ké-chí.

Góa ê Siōng-tè ah, kiû lí kì-liām góa, si-un hō͘ góa.

Nî-hi-bí-kì 13 - 現代台語譯本羅馬字版(TTVR)-闽南语

Learn More About Us