Si-phian 19 - 現代台語譯本羅馬字版(TTVR)-闽南语

Tāi-pi̍t ê si, kau hō͘ sèng-ga̍k-tiúⁿ.Siōng-tè ê Chhòng-chō kap Lu̍t-hoat

1Thiⁿ soan-pò͘ Siōng-tè ê êng-iāu;

kiong-chhong thoân-iông I ê chok-ûi.

2Chit-ji̍t tùi hit-ji̍t kóng-ōe;

chit-mî tùi hit-mî thoân-pò͘ tì-sek;

3bô-giân-bô-gú,

bô-siaⁿ-bô-seh.

4In ê siaⁿ-im thoân kàu choân sè-kài;

in ê giân-sû thoân kàu thiⁿ-piⁿ-hái-kak.

Siōng-tè ūi-tio̍h ji̍t-thâu tī thiⁿ-téng tah pò͘-pîⁿ.

5Ji̍t-thâu chhin-chhiūⁿ sin-lông tùi tōng-pông chhut--lâi,

chhin-chhiūⁿ soán-chhiú ióng-io̍k cháu i ê lō͘-thêng,

6tùi thiⁿ ê chit-pêng chhut--lâi, se̍h kàu hit-pêng,

jia̍t-khì phó͘-ki̍p bān-mi̍h.

7Siōng Chú ê Lu̍t-hoat oân-choân,

hō͘ lâng tit-tio̍h sin ê khùi-la̍t.

Siōng Chú ê bēng-lēng khó-khò,

hō͘ bô tì-sek ê lâng tit-tio̍h tì-hūi.

8Siōng Chú ê lu̍t-lē kong-chèng,

hō͘ lâng ê sim hoaⁿ-hí.

Siōng Chú ê kài-bēng sûn-kiat,

hō͘ lâng ê ba̍k-chiu kng-bêng.

9Kèng-ùi Siōng Chú sī sûn-chin, éng-oán bô kái-piàn;

Siōng Chú ê phòaⁿ-toàn chin-si̍t, oân-choân kong-tō,

10pí kim, pí chin chōe sûn-kim khah kùi-tiōng;

pí bi̍t, pí sûn ê phang-bi̍t koh-khah tiⁿ.

11Lu̍t-hoat hō͘ lí ê po̍k-jîn tit-tio̍h kéng-kài;

siú kài-bēng chiū ū tōa pò-siúⁿ.

12Siáⁿ-lâng ōe chai ka-kī ê chhò-gō͘?

Kiû lí sià-bián góa bô-ì-tiong hoān ê kè-sit!

13Kiû lí pó-siú lí ê po̍k-jîn, hō͘ i bōe kò͘-ì hoān-chōe;

kiû lí m̄-thang iông-ún chōe-ok koán-hat góa,

góa chiū chiâⁿ-chòe bô thang chí-chek ê lâng,

bōe hoān tāng-chōe.

14Siōng Chú — góa ê pī-lān-só͘, góa ê Kiù-sio̍k-chú ah,

goān góa ê chhùi só͘ kóng--ê ha̍h lí ê chí-ì;

goān góa ê sim só͘ siūⁿ--ê tit-tio̍h lí chiap-la̍p.

Learn More About Us