Lī-bī-kì 9

Lī-bī-kì 9 - 現代台語譯本羅馬字版(TTVR)-闽南语

A-lûn Hiàn-chè

1Kàu tē-poeh ji̍t, chiū-sī siū-chit-lé liáu-āu ê keh-ji̍t, Mô͘-se tiàu A-lûn kap i ê kiáⁿ, í-ki̍p Í-sek-lia̍t ê tiúⁿ-ló lâi.

2Mô͘-se tùi A-lûn kóng, “Lí tio̍h khan chi̍t chiah gû-káng-á chòe sio̍k-chōe-chè, chi̍t chiah mî-iûⁿ-káng chòe sio-hòa-chè, lóng tio̍h bô hâ-chhû--ê, hiàn hō͘ Siōng Chú.

3Lí mā tio̍h hoan-hù Í-sek-lia̍t-lâng, tio̍h chhú chi̍t chiah bô hâ-chhû ê soaⁿ-iûⁿ-káng chòe sio̍k-chōe-chè, koh chhú bô hâ-chhû chi̍t-hè ê gû-á-kiáⁿ kap mî-iûⁿ-á kok chi̍t chiah chòe sio-hòa-chè.

4Koh tio̍h chhú chi̍t chiah gû-káng kap chi̍t chiah mî-iûⁿ-káng chòe pêng-an-chè, kap chhiau-iû ê sò͘-chè chòe-hé hiàn hō͘ Siōng Chú. Kin-á-ji̍t Siōng Chú beh tùi lín hián-hiān.”

5Án-ni, in chiàu Mô͘-se ê bēng-lēng chiong chiah-ê tòa-lâi hōe-bō͘ thâu-chêng; choân-thé hōe-chiòng lóng óa-lâi khiā tī Siōng Chú ê bīn-chêng.

6Mô͘-se kóng, “Che sī Siōng Chú ê bēng-lēng, lín chiàu án-ni chòe, I ê êng-kng chiū beh tùi lín hián-hiān.”

7Mô͘-se tùi A-lûn kóng, “Lí tio̍h lâi chè-tôaⁿ chêng, chiàu Siōng Chú ê bēng-lēng hiàn lí ê sio̍k-chōe-chè kap sio-hòa-chè, ūi lí ka-kī kap jîn-bîn sio̍k-chōe, koh hiàn jîn-bîn ê chè-mi̍h ūi in sio̍k-chōe.”

8 A-lûn chiū lâi kàu tôaⁿ-chêng, thâi hit-chiah ūi i ka-kī chòe sio̍k-chōe-chè ê gû-káng-á.

9A-lûn hiah-ê kiáⁿ phâng huih hō͘ i, i chiū ēng chńg-thâu-á ùn huih, boah tī chè-tôaⁿ téng-bīn sì ki khiàu--khí-lâi ê kak; chiong chhun ê huih tò tī chè-tôaⁿ kha.

10I koh chiàu Siōng Chú bēng-lēng Mô͘-se--ê, chiong sio̍k-chōe-chè ê iû, io-chí, kap koaⁿ ê bāng-se, hē tī tôaⁿ-téng sio;

11koh chiong bah kap phê the̍h-khì iâⁿ-gōa sio.

12 A-lûn koh thâi sio-hòa-chè ê cheng-siⁿ; i hiah-ê kiáⁿ phâng huih hō͘ i, i chiū chiong huih hiù tī chè-tôaⁿ ê sì-chiu-ûi.

13In koh chiong sio-hòa-chè cheng-siⁿ ê thâu kap chi̍t-tè chi̍t-tè ê bah the̍h hō͘ A-lûn; i chiū kā chiah-ê hē tī tôaⁿ-téng sio.

14I koh sóe pak-lāi kap tōa-thúi, hē tī chè-tôaⁿ téng sio-hòa-chè ê téng-bīn sio.

15 A-lûn koh ūi-tio̍h jîn-bîn hiàn-chè. I khan hit-chiah ūi jîn-bîn chòe sio̍k-chōe-chè ê soaⁿ-iûⁿ-káng lâi, kā thâi, jiân-āu hiàn-chòe chè-mi̍h; choh-hoat kap hiàn thâu-chêng hit-chiah siâng-khoán.

16I mā chiàu kui-lē hiàn sio-hòa-chè.

17Chá-khí-sî ê sio-hòa-chè í-gōa, A-lûn koh hiàn sò͘-chè, tùi hit tiong-kan mi chi̍t pé mī-hún hē tī tôaⁿ-téng sio.

18I koh thâi gû-káng kap mî-iûⁿ-káng, ūi jîn-bîn hiàn chòe pêng-an-chè; A-lûn hiah-ê kiáⁿ phâng huih hō͘ i, i chiū chiong huih hiù tī chè-tôaⁿ ê sì-chiu-ûi.

19In koh the̍h gû-káng kap mî-iûⁿ-káng ê iû, pûi ê bé, pak-lāi ê iû, io-chí, kap koaⁿ ê bāng-se hō͘ i.

20In chiong chiah-ê iû hē tī heng-khám-bah téng-bīn, A-lûn chiū tī tôaⁿ-téng kā iû sio-tiāu.

21A-lûn chiong chiah-ê heng-khám-bah kap chiàⁿ-pêng ê tōa-thúi, iô-iô--leh chòe chè-mi̍h hiàn hō͘ Siōng Chú; lóng chiàu Mô͘-se ê bēng-lēng chòe.

22 A-lûn hiàn sio̍k-chōe-chè, sio-hòa-chè, pêng-an-chè liáu-āu, ǹg jîn-bîn gia̍h siang-chhiú, kā in chiok-hok. I chiū tùi chè-tôaⁿ lo̍h--lâi.

23Mô͘-se kap A-lûn ji̍p-khì hōe-bō͘ lāi, koh chhut-lâi kā jîn-bîn chiok-hok; Siōng Chú ê êng-kng tùi jîn-bîn hián-hiān.

24Ū hé tùi Siōng Chú ê bīn-chêng chhut--lâi, sio tôaⁿ-téng ê sio-hòa-chè kap iû; choân-thé jîn-bîn khòaⁿ--kìⁿ, chiū hoan-ho͘, phak tī thô͘-kha kèng-pài.

Lī-bī-kì 9 - 現代台語譯本羅馬字版(TTVR)-闽南语

Learn More About Us