Í-su-thiap-kì 6

Í-su-thiap-kì 6 - 現代台語譯本羅馬字版(TTVR)-闽南语

Ông Sù Boa̍t-tí-kái Êng-ū

1Hit-mî, ông khùn bōe khì, chiū kiò lâng the̍h i chāi-jīm ê tāi-sū-lio̍k, tha̍k hō͘ i thiaⁿ.

2Chheh--ni̍h ū kì-chài kóng, ông kò͘-mn̂g ê thài-kàm Phek-thàm kap Thê-lia̍t nn̄g ê lâng, kè-bô͘ beh hāi A-hap-sûi-ló͘-ông; Boa̍t-tí-kái tùi ông pò-kò chit-ê sū.

3Ông kóng, “Boa̍t-tí-kái chòe chit-ê sū, góa kiám ū sù i sím-mi̍h êng-ū kap tōe-ūi?”

Sū-hāu ông ê jîn-sîn ìn kóng, “Bô sù i sím-mi̍h.”

4Ông kóng, “Sím-mi̍h-lâng tī tiâⁿ--ni̍h?”

Hit-sî Hap-bān ji̍p ông-kiong gōa-bīn ê tiâⁿ, beh kiû ông chiong Boa̍t-tí-kái tiàu tī i chhāi hó ê chhâ-kè.

5Ông ê jîn-sîn ìn kóng, “Hap-bān khiā tī tiâⁿ--ni̍h.”

Ông kóng, “Hō͘ i ji̍p--lâi.”

6 Hap-bān chiū ji̍p--khì; ông mn̄g i kóng, “Ông siūⁿ-beh sù êng-ū hō͘ chi̍t ê lâng, tio̍h án-chóaⁿ chòe?”

Hap-bān sim-lāi siūⁿ-kóng, “Ông beh sù êng-ū hō͘ i ê lâng, tong-jiân sī góa lo͘h!”

7 Hap-bān chiū ìn ông kóng, “Ông beh sù êng-ū hō͘ hit-ê lâng, tio̍h án-ni tùi-thāi i:

8Ông tio̍h kiò lâng chiong ông só͘ chhēng ê phàu tòa--lâi, chiong só͘ khiâ tì hoa-koan ê bé khan--lâi;

9thok chi̍t ê ke̍k chun-kùi ê tāi-sîn, kā hit-ê lâng chhēng ông-phàu, hō͘ i khiâ hit-chiah bé, se̍h siâⁿ ê kóng-tiûⁿ, koh tī i ê thâu-chêng hoah kóng, ‘Ông beh sù i êng-ū ê lâng, ông ōe án-ni tùi-thāi i.’”

10Ông kā Hap-bān kóng, “Kóaⁿ-kín khì, chiong ông-phàu kap bé tòa--lâi, chiàu lí só͘ kóng--ê, tùi hit-ê chē tī ông-kiong mn̂g-chêng ê Iû-thài-lâng Boa̍t-tí-kái chòe chiah-ê tāi-chì; liân chi̍t hāng to m̄-thang kiám.”

11 Hap-bān chiū kā Boa̍t-tí-kái chhēng ông-phàu, hō͘ i khiâ-bé, se̍h siâⁿ ê kóng-tiûⁿ, koh tī i ê thâu-chêng soan-pò͘ kóng, “Ông beh sù i êng-ū ê lâng, ông ōe án-ni tùi-thāi i.”

12Jiân-āu, Boa̍t-tí-kái tò-lâi ông-kiong ê mn̂g. Hap-bān iu-būn, khàm-thâu, kóaⁿ-kín tò-khì in tau.

13Hap-bān chiong só͘ hoat-seng ê tāi-chì lóng kā i ê bó͘ Sè-lī-su kap i ê pêng-iú kóng; i hiah-ê chham-bô͘ kap i ê bó͘ Sè-lī-su kā i kóng, “Lí it-tàn tùi khí-thâu chiū su Boa̍t-tí-kái, i nā chin-chiàⁿ sī Iû-thài-lâng, lí it-tēng bōe iâⁿ i, ōe thiat-tóe sit-pāi.”

14In iáu-teh kóng-ōe ê sî, ông ê thài-kàm lâi, chhui Hap-bān kóaⁿ-kín khì hù Í-su-thiap só͘ siat ê iàn-se̍k.

Í-su-thiap-kì 6 - 現代台語譯本羅馬字版(TTVR)-闽南语

Learn More About Us