Í-sài-a-su 1

Í-sài-a-su 1 - 現代台語譯本羅馬字版(TTVR)-闽南语

1Ē-bīn sī A-mô͘-su ê kiáⁿ Í-sài-a só͘ khòaⁿ--kìⁿ ê īⁿ-siōng; che sī O͘-se-a, Iok-thán, A-hap-su, Hi-se-ka chòe Iû-tāi-ông ê sî, i só͘ tit--tio̍h iú-koan Iû-tāi kap Iâ-lō͘-sat-léng ê sìn-sit.

Iû-tāi ê Siâ-ok

2Thiⁿ ah, tio̍h thiaⁿ!

Tōe ah, tio̍h chù-ì thiaⁿ!

In-ūi Siōng Chú kóng,

“Góa ióng-io̍k kiáⁿ-jî, kā in chhī tōa-hàn,

in kèng-jiân pōe-poān góa.

3Gû bat ka-kī ê chú-lâng,

lû ōe-jīn-tit chú-lâng ê chô;

m̄-kú Í-sek-lia̍t m̄ bat góa,

góa ê chú-bîn lóng bōe-hiáu siūⁿ.”

4Ài, hoān-chōe ê bîn-cho̍k!

Chōe-ok ke̍k-tāng ê chú-bîn!

Chok-ok-to-toan ê cho̍k-lūi!

Hêng-ûi pāi-hoāi ê kiáⁿ-sun!

In khì-sak Siōng Chú,

biáu-sī Í-sek-lia̍t sîn-sèng ê Siōng-tè.

In lóng oa̍t-tńg-sin lī-khui I.

5Sī-án-chóaⁿ lín ài koh siū piⁿ-phah?

Sī-án-chóaⁿ lín beh kè-sio̍k pōe-poān?

Lín kui-lia̍p thâu-khak lóng ū pīⁿ,

kui-ê sim lóng siū-siong;

6tùi thâu kàu kha, bô chi̍t ūi kiān-choân,

lóng sī siong-hûn, o͘-chhiⁿ, teh lâu huih ê khang-chhùi;

khang-chhùi iáu-bē sóe chheng-khì, iáu-bē pau-chat,

mā iáu-bē ēng iû boah.

7Lín ê kok-thó͘ pha-hng;

lín ê siâⁿ-chhī hō͘ hé sio-húi.

Lín chhin-ba̍k khòaⁿ-tio̍h chhân-hn̂g hō͘ gōa-kok-lâng thun-chia̍h,

hō͘ siⁿ-hūn-lâng thún-ta̍h, pìⁿ-chòe hong-po͘.

8Chí-ū chhun Iâ-lō͘-sat-léng lâu--teh,

chhin-chhiūⁿ phû-tô-hn̂g lāi ê chháu-liâu-á,

chhì-koe-á-hn̂g lāi ê chháu-pîⁿ-á,

chhin-chhiūⁿ chi̍t ê siū ûi-khùn ê siâⁿ.

9Nā m̄-sī Siōng Chú — Bān-kun ê Thóng-sòe

kā lán lâu kúi-ê-á chhun--lo̍h-lâi ê chú-bîn,

lán chá chiū chhin-chhiūⁿ Só͘-to-má hiah hāi,

chhin-chhiūⁿ Gô-mô͘-la hiah chhám!

10Lín chiah-ê Só͘-to-má ê koaⁿ-tiúⁿ ah,

tio̍h thiaⁿ Siōng Chú ê ōe!

Lín chiah-ê Gô-mô͘-la ê jîn-bîn ah,

tio̍h chù-ì thiaⁿ lán ê Siōng-tè ê kà-sī!

11Siōng Chú kóng,

“Lín hiàn hiah chōe chè-mi̍h hō͘ góa,

ū sím-mi̍h lō͘-ēng?

Góa bô hi-hán mî-iûⁿ-káng ê sio-hòa-chè;

pûi-chut-chut ê cheng-siⁿ ê iû, góa chin ià.

Góa mā bô kah-ì gû-káng, iûⁿ-ko, kap soaⁿ-iûⁿ-káng ê huih.

12“Lín lâi tiâu-kìⁿ góa,

sī siáⁿ-lâng kiò lín tòa chiah-ê cheng-siⁿ

lâi thún-ta̍h góa sèng-tiān ê tiâⁿ?

13M̄-thang koh the̍h bô lō͘-ēng ê chè-mi̍h lâi;

hiuⁿ ê bī góa chin iàm-ò͘ⁿ.

Chhoe-it, An-hioh-ji̍t, tiàu-chi̍p ê chū-hōe,

góa lún bōe tiâu.

Góa bōe-tàng iông-jím lín hoān-chōe koh siú giâm-siok-hōe.

14Lín chhoe-it kap tēng-kî ê choeh-khèng,

góa hui-siông thó-ià;

chiah-ê lóng pìⁿ-chòe góa ê tāng-tàⁿ,

góa chin hoân, bô ài koh taⁿ.

15Lín chhiú gia̍h-koân-koân kî-tó ê sî,

góa ōe ng ba̍k-chiu m̄ khòaⁿ lín;

lín kî-tó jōa-chōe piàn,

góa mā m̄ thiaⁿ;

in-ūi lín siang-chhiú lóng bak-tio̍h thâi-lâng ê huih.

16Lín tio̍h sóe, sóe hō͘ chheng-khì;

tio̍h tû-khì it-chhè siâ-ok ê hêng-ûi,

hō͘ góa bô koh khòaⁿ-tio̍h lín teh chòe pháiⁿ.

17Tio̍h ha̍k-si̍p kiâⁿ-hó.

Tio̍h tui-kiû chèng-gī, kái-kiù siū khi-ap--ê;

tio̍h ūi ko͘-jî sin-oan, ūi kóaⁿ-hū piān-hō͘.”

18Siōng Chú kóng,

“Lâi, lán lâi piān-lūn!

Sui-jiân lín ê chōe chhin-chhiūⁿ chu-âng,

iáu ōe pìⁿ-chòe chhin-chhiūⁿ seh hiah pe̍h;

sui-jiân chhin-chhiūⁿ o͘-tò͘-âng,

iáu ōe pìⁿ-chòe chhin-chhiūⁿ iûⁿ-mn̂g hiah pe̍h.

19Lín nā goān-ì thiaⁿ-thàn,

lín ōe-tàng chia̍h thó͘-tōe chhut-sán siōng-hó ê mi̍h.

20M̄-kú lín nā m̄ sūn-thàn, hoán-poān,

lín ōe siū to-kiàm thun-bia̍t.”

Siōng Chú chhin-chhùi án-ni soan-pò͘.

Tūi-lo̍h ê Siâⁿ

21Pún-lâi tiong-sêng ê siâⁿ kèng-jiân pìⁿ-chòe chhiong-ki!

Í-chêng siâⁿ-lāi chhiong-móa chèng-ti̍t,

kong-gī tī lāi-bīn khiā-khí;

kin-á-ji̍t tòa tī hia--ê sī thâi-lâng ê hiong-siú!

22Lí ê gûn í-keng pìⁿ-chòe che-tái;

lí ê chiú lóng thàu chúi.

23Lí ê koaⁿ-tiúⁿ pōe-poān,

pìⁿ-chòe chha̍t ê tâng-phōaⁿ;

in lóng ài siu hóe-lō͘,

sì-kòe iau-kiû lâng sàng-lé.

In bô ūi ko͘-jî chú-chhî kong-tō;

kóaⁿ-hū ê khòng-sò͘, in m̄ chhap.

24Só͘-í, Siōng Chú — Bān-kun ê Thóng-sòe,

Í-sek-lia̍t ê Tāi-lêng-chiá án-ni kóng,

“Ah, lí chiâⁿ-chòe góa ê tùi-te̍k!

Góa beh chiong tōa siū-khì piàⁿ tī lí téng-bīn;

góa beh pò-ho̍k te̍k-tùi góa ê lâng!

25Góa beh hē-chhiú chhú-hoa̍t lí;

góa beh chiong lí ê che-tái liān chheng-khì,

chiong cha̍p-chit lóng tû-chīn.

26Góa beh têng-sin siat-li̍p lí ê sím-phòaⁿ-koaⁿ,

chhin-chhiūⁿ chá-chêng chi̍t-iūⁿ;

koh siat-li̍p lí ê chham-bô͘,

kap khí-chho͘ siâng-khoán.

Jiân-āu, lí ōe koh kiò-chòe Kong-gī ê Siâⁿ, Tiong-sêng chi To͘.”

27 Iâ-lō͘-sat-léng ōe in-ūi kong-pêng tit-tio̍h kiù-sio̍k;

siâⁿ-lāi hoán-hóe ê lâng ōe in-ūi kong-gī tit-tio̍h kái-kiù.

28M̄-kú pōe-ge̍k--ê kap chōe-jîn ōe chòe-chi̍t-ē siū phah-chhùi;

khì-choa̍t Siōng Chú ê lâng ōe bia̍t-bông.

29Lín í-chêng só͘ ì-ài sèng ê siōng-chhiū,

lín ōe in-ūi i kám-kak kiàn-siàu.

Lín chá-chêng soán-te̍k ê hn̂g-á,

taⁿ ōe in-ūi i kám-kak pháiⁿ-sè.

30In-ūi lín ōe chhin-chhiūⁿ hio̍h teh-beh ta--khì ê siōng-chhiū,

chhin-chhiūⁿ bô chúi ê hn̂g-á.

31Ū koân-sè--ê ōe pìⁿ-chòe hé-chéng,

i ê só͘-chòe chhin-chhiūⁿ hé-chhiⁿ,

nn̄g hāng chòe-chi̍t-ē to̍h--khí-lâi,

bô lâng ōe-tàng kā i phah-hoa.

Í-sài-a-su 1 - 現代台語譯本羅馬字版(TTVR)-闽南语

Learn More About Us