Í-se-kiat-su 24

Í-se-kiat-su 24 - 現代台語譯本羅馬字版(TTVR)-闽南语

Siⁿ-sian ê Tâng-e

1Tē-káu nî cha̍p-ge̍h chhoe-cha̍p, Siōng Chú tùi góa kóng,

2“Jîn-chú ah, lí tio̍h ūi kin-á-ji̍t chit-ê te̍k-pia̍t ê ji̍t-chí chòe kì-lio̍k, in-ūi kin-á-ji̍t Pa-pí-lûn-ông khai-sí ûi-kong Iâ-lō͘-sat-léng.

3Lí tio̍h ǹg chit-ê pōe-ge̍k ê chú-bîn kóng phì-jū, kā in kóng, ‘Chì-koân ê Siōng Chú án-ni kóng:

Kā e-á hē tī hé téng-bīn,

hē hó-sè, tò-chúi tī e-á lāi-bīn.

4Chiong chhiat-chòe chi̍t-tè chi̍t-tè siōng-hó ê bah,

chiū-sī keng-thâu-bah kap thúi-bah,

kap siōng-hó ê kut-thâu, kā e-á tóe-móa-móa;

5chhú iûⁿ-kûn tiong siōng-hó ê iûⁿ-á.

Chiong chhâ khǹg tī e-á ē-bīn,

kā hiah-ê kut-thâu kap bah chú hō͘ kún.

6“‘Chì-koân ê Siōng Chú án-ni kóng: Chhám ah, chit-ê lâu lâng ê huih ê siâⁿ, siⁿ-sian m̄-bat lù--kè ê e-á! Lāi-bīn ê bah m̄-bián thiu-chhiam kéng, tio̍h chi̍t-tè chi̍t-tè lóng kā ngoeh--chhut-lâi.

7Chit-ê siâⁿ iáu ū thâi-lâng lâu-chhut ê huih; huih piàⁿ tī kng-ku̍t ê chio̍h-pôaⁿ téng-bīn, m̄-sī tò tī thô͘-kha, ōe-tàng ēng thô͘ khàm.

8Sī góa hō͘ chit-ê siâⁿ chiong thâi-lâng lâu-chhut ê huih piàⁿ tī kng-ku̍t ê chio̍h-pôaⁿ téng-bīn; bōe-tàng ēng thô͘ khàm, sī beh kek-tōng góa ê siū-khì, kā in pò-èng.

9“‘Só͘-í, Chì-koân ê Siōng Chú án-ni kóng: Chhám ah, chit-ê lâu lâng ê huih ê siâⁿ! Góa beh chhin-sin thia̍p chi̍t-tōa-tui chhâ.

10Thiⁿ khah chōe chhiū-oe, hō͘ hé khah iām, kā bah chú hō͘ nōa, thng khòng kah ta--khì, liân kut to chhàu-hé-ta!

11Liáu-āu, chiong khang ê e-á hē tī hé téng-bīn, hō͘ e-á jia̍t, kā tâng sio âng, hō͘ lāi-bīn ê lah-sap iûⁿ--khì, e-á chiū bô koh ū sian.

12M̄-kú só͘-ū ê lô-lo̍k lóng bô-chhái-kang, e-á kāu-kāu ê sian ēng hé mā tû bōe khì.

13Iâ-lō͘-sat-léng ah, e-á ê sian chiū-sī lí ê îm-hēng. Góa siūⁿ-beh kā lí sóe chheng-khì, m̄-kú lí m̄-khéng. Só͘-í, tī góa tùi lí hoat tōa siū-khì í-chêng, lí ê lah-sap bōe-tàng tû--khì.

14Góa Siōng Chú bat kóng: Góa chhái-chhú hêng-tōng ê sî-ki kàu lah. Góa bōe kái-piàn sim-ì, bô beh lîn-bín, mā bô beh khoan-iông. Góa beh chiàu lí ê só͘-kiâⁿ-só͘-chòe kā lí sím-phòaⁿ. Chì-koân ê Siōng Chú án-ni soan-kò.’”

Sian-ti ê Bó͘ Sí

15Siōng Chú tùi góa kóng,

16“Jîn-chú ah, góa beh hō͘ lí sim-ài ê lâng hut-jiân sí--khì, m̄-kú lí bōe-ēng-tit ai-siong, thî-khàu, mā bōe-ēng-tit lâu ba̍k-sái.

17Lí thang tiām-tiām-á thó͘-khùi, m̄-kú bōe-ēng-tit kā i pān song-sū. Lí tio̍h pa̍k thâu-kun, kha chhēng-ôe; m̄-thang ng chhùi-chhiu piáu-sī ai-siong, m̄-thang chia̍h ūi-tio̍h song-ka chún-pī ê chia̍h-mi̍h.”

18Hit chá-khí góa kā lâng kóng chit-ê sū, hit-mî góa ê bó͘ chiū sí--khì. Keh-chá-khí, góa chiàu Siōng Chú ê bēng-lēng khì chòe.

19Lâng mn̄g góa, “Lí ná bô beh kā goán kóng, lí chòe chiah-ê tāi-chì tùi goán ū sím-mi̍h ì-sù?”

20Góa kā in kóng, “Siōng Chú tùi góa kóng-ōe,

21kiò góa kā Í-sek-lia̍t-lâng kóng, ‘Chì-koân ê Siōng Chú án-ni kóng: Lín chiong sèng-tiān tòng-chòe siōng khoa-iāu ê óa-khò, ba̍k-chiu só͘ ì-ài, sim-lêng ê kià-thok, m̄-kú góa beh hō͘ góa ê sèng-tiān siū siat-to̍k. Lín lâu tī Iâ-lō͘-sat-léng ê kiáⁿ cha-bó͘-kiáⁿ lóng beh hō͘ lâng thâi-sí.

22Hit-sî, lín beh chiàu góa só͘ chòe--ê khì chòe. Lín m̄-thang ng chhùi-chhiu piáu-sī ai-siong, m̄-thang chia̍h ūi-tio̍h song-ka chún-pī ê chia̍h-mi̍h;

23lín mā tio̍h pa̍k thâu-kun, kha chhēng-ôe, m̄-thang ai-siong thî-khàu. Lín beh in-ūi ka-kī ê chōe-ok soe-lám, bīn-tùi-bīn haiⁿ-haiⁿ-chhan.

24Siōng Chú kóng: Í-se-kiat chiū-sī lín ê tiāu-thâu; i chòe--ê, lín mā lóng beh chòe. Kàu hit-sî, lín chiū chai góa sī Chì-koân ê Siōng Chú.’”

25Siōng Chú kóng, “Jîn-chú ah, hit-ji̍t góa beh thiah-húi lín óa-khò ê pó-lúi, khoa-iāu ê êng-kng, ba̍k-chiu ì-ài ê sèng-tiān, mā beh thâi-sí lín ê kiáⁿ cha-bó͘-kiáⁿ;

26kâng hit-ji̍t, tùi Iâ-lō͘-sat-léng tô-cháu--chhut-lâi ê lâng beh lâi lí chia, kā lí kóng chiah-ê tāi-chì.

27Hit-ji̍t, lí bô koh tiām-tiām bōe kóng-ōe; lí beh khui-chhùi tùi chiah-ê tô-thoat ê lâng kóng-ōe. Án-ni, lí beh chiâⁿ-chòe in ê tiāu-thâu, in chiū chai góa sī Siōng Chú.”

Í-se-kiat-su 24 - 現代台語譯本羅馬字版(TTVR)-闽南语

Learn More About Us