Si-phian 108 - 現代台語譯本羅馬字版(TTVR)-闽南语

Tāi-pi̍t ê si-koa.Khò Chú Chiah Ōe Tek-sèng(Si 57.7-11; 60.5-12)

1Siōng-tè ah, góa ê sim kian-tēng;

góa ê sim-sîn beh chhiùⁿ-koa chheng-chàn.

2Khîm ah, sek ah, tio̍h chhíⁿ--khí-lâi!

Góa beh kā ji̍t-thâu kiò-chhíⁿ.

3Siōng Chú ah, góa beh tī bān-bîn tiong kám-siā lí,

tī lia̍t-pang tiong chhiùⁿ-koa chheng-chàn lí.

4Lí ê chû-ài pí thiⁿ khah koân;

lí ê sìn-si̍t thàu kàu kiong-chhong.

5Siōng-tè ah, goān lí ê úi-tāi pôaⁿ-kè thiⁿ;

goān lí ê êng-kng piàn-chiò choân-tōe.

6Kiû lí ēng chiàⁿ-chhiú khan-kiù goán lâi hôe-èng goán,

hō͘ lí só͘ thiàⁿ ê lâng tit-tio̍h kái-kiù.

7Siōng-tè tī I ê sèng-só͘ kóng,

“Góa tōa sèng-lī lah!

Góa beh hun-koah Sī-kiàm, hun-phòe So͘-kat ê soaⁿ-kok.

8 Ki-lia̍t sī góa ê, Má-ná-se mā sio̍k góa;

Í-hoat-liân sī góa ê thâu-khoe;

Iû-tāi sī góa koân-pèng ê koáiⁿ.

9 Mô͘-ap chòe góa ê e̍k-phûn;

góa hiat góa ê ôe tī Í-tong

;

góa in-ūi khah iâⁿ Hui-lī-sū tōa-siaⁿ hoah.”

10Siáⁿ-lâng beh chhōa góa ji̍p-khì kian-kò͘ ê siâⁿ?

Siáⁿ-lâng beh chhōa góa ji̍p-khì Í-tong ê tōe?

11Siōng-tè ah, lí kiám ū khì-sak goán?

Siōng-tè ah, lí kiám bōe koh kap goán ê kun-tūi tàu-tīn chhut-cheng?

12Kiû lí oān-chō͘ goán kong-kek tùi-te̍k,

in-ūi lâng ê pang-chān bōe-khò--tit.

13Khò Siōng-tè goán chiah ōe tek-sèng;

I ōe phah-pāi goán ê tùi-te̍k.

Learn More About Us