Khé-sī-lio̍k 19

Khé-sī-lio̍k 19 - 現代台語譯本羅馬字版(TTVR)-闽南语

1Āu-lâi, góa ū thiaⁿ-kìⁿ tī thiⁿ-téng chhin-chhiūⁿ ū chi̍t tōa-kûn lâng tōa-siaⁿ teh hoah:

Ha-lé-lú-iah, chheng-chàn Siōng Chú!

Chín-kiù, êng-kng, koân-lêng lóng tùi lán ê Siōng-tè lâi!

2I ê sím-phòaⁿ chin-si̍t kong-gī;

in-ūi I ū sím-phòaⁿ hit-ê ēng îm-hēng pāi-hoāi tōe-chiūⁿ jîn-lūi ê tōa îm-hū,

ū hêng-hoa̍t i lâu Siōng-tè po̍k-jîn ê huih ê chōe.

3In tē-jī piàn hoah:

Ha-lé-lú-iah, chheng-chàn Siōng Chú!

Siâⁿ tio̍h-hé-sio ê ian chhèng-koân éng-oán bōe thêng.

4Hit jī-cha̍p-sì ê tiúⁿ-ló kap hit sì ê oa̍h-mi̍h phak lo̍h-khì kèng-pài chē tī pó-chō ê Siōng-tè, kóng:

Amen. Ha-lé-lú-iah!

Iûⁿ-ko ê Hun-iàn

5Tùi pó-chō ū siaⁿ chhut--lâi, kóng:

Só͘-ū Siōng-tè ê po̍k-jîn,

só͘-ū kèng-ùi Siōng-tè ê lâng,

bô-lūn pi-chiān chun-kùi,

lóng tio̍h chheng-chàn lán ê Siōng-tè!

6Góa koh thiaⁿ-kìⁿ chhin-chhiūⁿ chi̍t tōa-kûn lâng ê siaⁿ, chhin-chhiūⁿ chin chōe tiâu hô-liû ê siaⁿ, chhin-chhiūⁿ lûi tōa-tân ê siaⁿ, kóng:

Ha-lé-lú-iah, chheng-chàn Siōng Chú!

In-ūi lán ê Chú, Choân-lêng ê Siōng-tè choh-ông lah!

7Lán tio̍h hoaⁿ-hí khoài-lo̍k,

chiong êng-kng kui hō͘ I!

In-ūi Iûⁿ-ko hun-lé ê ji̍t kàu lah;

I ê sin-niû í-keng chún-pī hó-sè lah.

8Siōng-tè í-keng hō͘ sin-niû chhēng iù-môa-pò͘

kng-liāng chheng-pe̍h ê saⁿ.

Iù-môa-pò͘ ê saⁿ sī sìn-tô͘ gī ê hêng-ûi.

9Āu-lâi, thiⁿ-sài kā góa kóng, “Lí tio̍h siá--khí-lâi; siū iau-chhiáⁿ chham-ka Iûⁿ-ko hun-iàn ê lâng chin ū hok-khì!”

Thiⁿ-sài koh kā góa kóng, “Chiah-ê sī Siōng-tè chin-si̍t ê ōe.”

10Góa chiū phak tī thiⁿ-sài ê kha-chêng beh kā i pài. M̄-kú i kā góa kóng, “Choa̍t-tùi m̄-thang! Góa kap lí, í-ki̍p hiah-ê chhî-siú Iâ-so͘ kiàn-chèng ê lâng lóng pîⁿ-pîⁿ chòe po̍k-jîn; lí tio̍h pài Siōng-tè!”

In-ūi Iâ-so͘ ê kiàn-chèng sī sian-ti siū kám-tōng só͘ kóng sìn-sit ê tiong-sim.Khiâ Pe̍h-bé ê Lâng

11Āu-lâi, góa khòaⁿ-kìⁿ thiⁿ khui, khòaⁿ-tio̍h chi̍t chiah pe̍h-bé. Khiâ tī bé téng--ê kiò-chòe “Tiong-sìn” kap “Chin-si̍t”; I chiàu kong-gī sím-phòaⁿ kap chok-chiàn.

12I ê ba̍k-chiu chhin-chhiūⁿ hé-iām; thâu-khak ū tì chin chōe ông-koan; seng-khu ū siá chi̍t ê miâ, chit-ê miâ i ka-kī í-gōa bô lâng bat.

13I chhēng bak-tio̍h huih ê tn̂g-phàu, I ê miâ kiò-chòe Siōng-tè ê Tō.

14Thian-kun chhēng iù-môa-pò͘ ê tn̂g-phàu, pe̍h koh chheng-khì, khiâ pe̍h-bé teh tè I.

15Tùi I ê chhùi thò͘-chhut chi̍t ki lāi-kiàm, beh ēng lâi phah-pāi lia̍t-kok; I beh ēng thih-koáiⁿ tī-lí in; I mā beh ta̍h Choân-lêng ê Siōng-tè ê chiú-khut, hō͘ I ê tōa siū-khì hoat-chhut.

16Tī I ê tn̂g-phàu kap tōa-thúi ū siá chi̍t ê miâ “Bān-ông ê Ông, bān-chú ê Chú”.

17Góa ū koh khòaⁿ-kìⁿ chi̍t ê thiⁿ-sài khiā tī ji̍t-thâu téng, tōa-siaⁿ tùi hiah-ê tī khong-tiong teh pe lóng-chóng ê pe-chiáu hoah, “Lâi! Chū-chi̍p lâi hù Siōng-tè ê tōa iàn-se̍k!

18Lâi chia̍h chiah-ê kun-ông ê bah, chiong-kun ê bah, ióng-sū ê bah, chiah-ê bé kap khiâ-bé ê lâng ê bah, mā chia̍h lóng-chóng chū-iû ê lâng kap lô͘-lē ê bah, pi-chiān kap chun-kùi ê lâng ê bah.”

19Góa ū koh khòaⁿ-kìⁿ hit-chiah siù, tōe-chiūⁿ ê kun-ông kap in ê kun-tūi chū-chi̍p beh kap Hit-ūi khiâ pe̍h-bé--ê í-ki̍p I ê kun-tūi kau-chiàn.

20Hit-chiah siù siū lia̍h, hit-ê ké sian-ti, chiū-sī chêng bat tī siù ê bīn-chêng kiâⁿ kî-chek--ê, mā kap siù chòe-hé siū lia̍h. Chit-ê ké sian-ti bat ēng kî-chek bê-he̍k hiah-ê ū siù ê kì-hō kap bat pài siù ê siōng ê lâng. Hit-chiah siù kap hit-ê ké sian-ti nn̄g ê lóng hō͘ lâng oa̍h-oa̍h hiat-lo̍h liû-hông teh to̍h ê hé-ô͘.

21Só͘ chhun ê kun-tūi lóng hō͘ Hit-ūi khiâ-bé--ê ê chhùi thò͘-chhut ê kiàm sat-hāi; só͘-ū ê chiáu lóng lâi chia̍h in ê bah, chia̍h kàu pá.

Khé-sī-lio̍k 19 - 現代台語譯本羅馬字版(TTVR)-闽南语

Learn More About Us