Í-su-la-kì 9

Í-su-la-kì 9 - 現代台語譯本羅馬字版(TTVR)-闽南语

Khiàn-chek kap Gōa-cho̍k Thong-hun

1Chiah-ê tāi-chì oân-sêng liáu-āu, ū chi̍t-kóa Í-sek-lia̍t ê léng-siù lâi kìⁿ góa, kóng, “Í-sek-lia̍t jîn-bîn, chè-si kap Lī-bī-lâng, bô kap chit só͘-chāi ê Ka-lâm-lâng, Hek-lâng, Pí-lī-sé-lâng, Iâ-pò͘-su-lâng, A-bûn-lâng, Mô͘-ap-lâng, Ai-ki̍p-lâng, A-mô͘-lī-lâng keh-lī, koh o̍h in chòe khó-ò͘ⁿ ê sū.

2In ūi-tio̍h ka-kī kap in ê kiáⁿ, chhōa gōa-cho̍k ê lú-chú chòe bó͘, tì-kàu Siōng Chú sèng-kiat ê chú-bîn kap chit só͘-chāi ê lâng chham-chhap; koh léng-siù kap koaⁿ-tiúⁿ tī chit-hāng sū chhōa-thâu chòe pháiⁿ.”

3Góa chi̍t-ē thiaⁿ-tio̍h chit-ê tāi-chì, chiū thiah-li̍h saⁿ kap gōa-phàu, chhoah thâu-mn̂g kap chhùi-chhiu, tio̍h-kiaⁿ thòng-sim chē--teh.

4In-ūi liû-hòng--tò-lâi ê lâng só͘ hoān ê chōe, só͘-ū ūi-tio̍h Í-sek-lia̍t Siōng-tè ê ōe ngia̍uh-ngia̍uh-chhoah ê lâng lóng chū-chi̍p lâi góa chia; góa tio̍h-kiaⁿ thòng-sim chē--teh, kàu hiàn ē-hng-chè ê sî.

5Hiàn ē-hng-chè ê sî, góa bô koh kìm-chia̍h, chiū chhēng thiah-li̍h ê saⁿ kap gōa-phàu, siang-kha kūi--lo̍h-khì, ǹg Siōng Chú — góa ê Siōng-tè gia̍h-khí siang-chhiú kî-tó,

6kóng, “Góa ê Siōng-tè ah, góa hui-siông kiàn-siàu, m̄-káⁿ gia̍h-thâu ǹg góa ê Siōng-tè, in-ūi goán ê chōe im-kè thâu-khak, goán ê chōe-kò tú-thiⁿ.

7Tùi goán lia̍t-chó͘ ê sî kàu kin-á-ji̍t, goán ê chōe-kò chin tāng; in-ūi goán ê chōe, lí chiong goán kap goán ê lia̍t-ông, chè-si, lóng kau tī gōa-pang lia̍t-ông ê chhiú, siū sat-hāi, siū lia̍h, siū chhiúⁿ-kiap, siū bú-jio̍k, chhin-chhiūⁿ kin-á-ji̍t án-ni.

8Hiān-chāi, Siōng Chú — goán ê Siōng-tè tú-chiah si-un hō͘ goán, koh lâu goán chiah-ê chhun--lo̍h-lâi ê lâng, hō͘ goán thang an-choân khiā-khí tī lí sèng ê só͘-chāi, thang koh khòaⁿ-tio̍h kng-bêng, tī siū ap-chè chòe lô͘-lē ê tiong-kan ū ho̍k-heng ê ki-hōe.

9Goán sī lô͘-lē, m̄-kú chòe lô͘-lē ê sî, Siōng-tè lí bô khì-sak goán, hō͘ goán tùi Pho-su ê hông-tè tit-tio̍h un-tián, koh hō͘ goán ho̍k-heng, ōe-tàng tiông-kiàn Siōng-tè lí ê sèng-tiān, siu-lí húi-hoāi ê só͘-chāi, hō͘ goán tī Iû-tāi kap Iâ-lō͘-sat-léng ū siâⁿ-chhiûⁿ pó-hō͘.

10“Goán ê Siōng-tè, kì-jiân lí si-un hō͘ goán, goán iáu ū sím-mi̍h ōe thang kóng, in-ūi goán í-keng khì-sak lí ê bēng-lēng.

11Lí ū thong-kè lí ê po̍k-jîn chèng sian-ti bēng-lēng goán, kóng, ‘Lín beh khì chiàm-léng chòe sán-gia̍p ê tōe sī siū ù-jiám ê tōe, in-ūi hiah-ê kok ê jîn-bîn ê ù-òe, kap in só͘ chòe khó-ò͘ⁿ ê sū, chit-ê tōe tùi chit-pêng kàu hit-pêng chhiong-móa ù-òe.

12Lín nā beh kiông-sēng, hióng-siū chit-ê thó͘-tōe ê hó-mi̍h, koh lâu chit-ê tōe hō͘ lín ê kiáⁿ-sun chòe éng-oán ê sán-gia̍p, lín chiū m̄-thang hō͘ lín ê kiáⁿ í-ki̍p cha-bó͘-kiáⁿ kap in thong-hun, éng-oán m̄-thang pang-chān in tit-tio̍h pêng-an hoân-êng.’

13Goán tú-tio̍h chiah-ê chai-lān, lóng sī in-ūi goán ê pháiⁿ só͘-kiâⁿ kap goán ê tōa-chōe, m̄-kú, Siōng-tè, lí hêng-hoa̍t goán, pí goán eng-kai sêng-siū--ê khah khin, koh lâu goán chiah-ê chhun--lo̍h-lâi ê lâng.

14Goán kiám thang koh ûi-pōe lí ê bēng-lēng, kap chòe khó-ò͘ⁿ ê sū ê jîn-bîn thong-hun? Goán nā án-ni chòe, lí it-tēng ōe tùi goán hoat siū-khì, siau-bia̍t goán, hō͘ goán bô chi̍t ê lâu--lo̍h-lâi, bô chi̍t ê tô-thoat.

15Siōng Chú — Í-sek-lia̍t ê Siōng-tè, lí sī kong-gī--ê, goán chiah-ê chhun--lo̍h-lâi ê lâng chiah tit-tio̍h tô-thoat, chhin-chhiūⁿ kin-á-ji̍t án-ni. Taⁿ, goán tī lí ê bīn-chêng ū chōe; bô chi̍t ê lâng ōe-kham-tit khiā tī lí ê bīn-chêng.”

Í-su-la-kì 9 - 現代台語譯本羅馬字版(TTVR)-闽南语

Learn More About Us