Hi-pek-lâi-su 3

Hi-pek-lâi-su 3 - 現代台語譯本羅馬字版(TTVR)-闽南语

Iâ-so͘ Chhiau-oa̍t Mô͘-se

1Só͘-í, lín tâng siū Siōng-tè soán-tiàu sèng ê hiaⁿ-tī chí-bē, lín tio̍h siūⁿ lán só͘ soan-jīn hit-ūi choh sù-chiá, choh Tōa-chè-si ê Iâ-so͘.

2I tùi chí-phài I ê Siōng-tè chīn-tiong, tú kap Mô͘-se tī Siōng-tè ê ke chīn-tiong kâng-khoán.

3Khí-chhù ê lâng pí i khí ê chhù khah chun-kùi; án-ni, Iâ-so͘ pí Mô͘-se eng-kai siū koh-khah tōa ê êng-kng.

4Só͘-ū ê chhù lóng sī lâng khí--ê, m̄-kú khí-chō bān-mi̍h--ê sī Siōng-tè.

5Mô͘-se choh po̍k-jîn, tùi Siōng-tè ê choân-ke chīn-tiong, ūi-tio̍h Siōng-tè āu-lâi só͘ beh kóng ê ōe choh-chèng;

6m̄-kú, Ki-tok choh Kiáⁿ tī-lí Siōng-tè ê ke. Tùi só͘ ǹg-bāng--ê, lán nā ēng khak-sìn kap ióng-khì lâi chhî-siú, lán chiū-sī Siōng-tè ke-lāi ê lâng.

Siōng-tè Chú-bîn ê An-hioh

7Só͘-í, chiàu Sèng Sîn só͘ kóng:

Kin-á-ji̍t lín nā thiaⁿ Siōng-tè ê siaⁿ,

8m̄-thang ngī-sim, chhin-chhiūⁿ lín ê chó͘-sian tī pōe-ge̍k ê sî,

tī khòng-iá chhì-thàm I ê ji̍t.

9Siōng-tè kóng:

Lín ê chó͘-sian sui-jiân ū khòaⁿ-tio̍h góa ê chok-ûi,

in iû-goân tī hia chhì-thàm góa, khó-giām góa

10sì-cha̍p nî kú.

Só͘-í, góa tùi hit sè-tāi ê lâng siū-khì, kóng:

In ê sim sit-bê;

in m̄ bat góa ê tō-lō͘.

11Góa tī siū-khì tiong li̍p-sè, kóng:

In choa̍t-tùi bōe-tàng chìn-ji̍p góa só͘ sù ê an-hioh.

12Hiaⁿ-tī chí-bē, lín tio̍h chù-ì, chiah bián lín tiong-kan ū lâng sim siâ-ok m̄ sìn, tì-kàu lī-khui éng-oa̍h ê Siōng-tè.

13Tio̍h thàn iáu ū hit-ê kiò-chòe “kin-á-ji̍t” ê sî, ji̍t-ji̍t saⁿ khoàn-bián, lín tiong-kan chiah bián ū lâng siū chōe-ok bê-he̍k tì-kàu ngī-sim.

14Lán nā kian-siú tong-chho͘ ê khak-sìn kàu lō͘-bé, chiū chiâⁿ-chòe Ki-tok ê tâng-kang.

15Sèng-keng án-ni kóng:

Kin-á-ji̍t lín nā thiaⁿ Siōng-tè ê siaⁿ,

m̄-thang ngī-sim, chhin-chhiūⁿ lín ê chó͘-sian tī pōe-ge̍k ê sî án-ni.

16Thiaⁿ-kìⁿ Siōng-tè ê siaⁿ iáu-kú pōe-ge̍k I ê sī sím-mi̍h-lâng? Kiám m̄-sī hiah-ê Mô͘-se tùi Ai-ki̍p chhōa--chhut-lâi só͘-ū ê lâng?

17Siōng-tè tī hit sì-cha̍p nî kú tùi sím-mi̍h-lâng hoat siū-khì? Kiám m̄-sī hiah-ê in-ūi hoān-chōe sí tī khòng-iá ê lâng?

18Hiah-ê pōe-ge̍k ê lâng í-gōa, Siōng-tè kiám bat tùi lâng li̍p-sè kóng, in bōe-tàng chìn-ji̍p I só͘ sù ê an-hioh?

19Án-ni, in bōe-tàng chìn-ji̍p an-hioh sī in-ūi in m̄ sìn.

Hi-pek-lâi-su 3 - 現代台語譯本羅馬字版(TTVR)-闽南语

Learn More About Us