Iok-pek-kì 5

Iok-pek-kì 5 - 現代台語譯本羅馬字版(TTVR)-闽南语

1Taⁿ chòe lí kiû-kiò, khòaⁿ ū siáⁿ-lâng ōe kā lí ìn?

Chiah-ê sù-chiá ê tiong-kan, lí beh tùi tó chi̍t ê kiû?

2Siū-khì ōe hāi-sí gōng-lâng;

oàn-tò͘ ōe thâi-sí han-bān ê lâng.

3Góa bat khòaⁿ-tio̍h gōng-lâng heng-ōng,

m̄-kú chai-lān hut-jiân lîm-kàu i ê ke.

4I ê kiáⁿ-jî bô lâng pó-hō͘, sit-khì an-ún;

tī siâⁿ-mn̂g-kháu chhâi-koat ê sî siū khi-ap, bô lâng ūi in chú-chhî kong-tō.

5I só͘ siu-sêng--ê, hō͘ iau ê lâng chia̍h--khì,

liân tī chhì-phè lāi--ê mā chhiúⁿ--khì,

chhùi-ta ê lâng thun i ê châi-hù.

6In-ūi chai-hō m̄-sī tùi thô͘ puh--chhut-lâi,

hoān-lān mā m̄-sī tùi tōe hoat--chhut-lâi.

7Lâng chhut-sì it-tēng ū hoān-lān,

chhin-chhiūⁿ hé-chhiⁿ chhèng chin koân.

8Nā-sī góa, góa beh kiû-kiò Siōng-tè;

chiong góa ê àn-kiāⁿ kau-tài I.

9I chòe ê tāi-chì tōa kah bōe chhek-to̍k--tit;

I kiâⁿ ê kî-sū chōe kah sǹg bōe liáu.

10I lo̍h-hō͘ tī tōe-bīn,

sù hō͘-chúi lūn-te̍k chhân-hn̂g;

11I ko-seng pi-bî ê lâng,

sù an-choân hí-lo̍k hō͘ pi-chhám ê lâng.

12I phò-hoāi khúi-khiat ê lâng ê kè-bô͘,

hō͘ in ê chhiú só͘ chòe--ê bōe sêng-kong.

13I hō͘ khiáu-lâng tiòng-tio̍h ka-kī ê khúi-kè,

hō͘ kan-chà ê lâng ê kè-bô͘ chin kín sit-pāi.

14In ji̍t--sî tú-tio̍h o͘-àm,

ji̍t tiong-tàu chhin-chhiūⁿ mî--sî sì-kòe bong.

15Siōng-tè kiù sàn-chhiah-lâng thoat-lī siong-hāi in ê lâng ê chi̍h,

í-ki̍p koân-le̍k-chiá ê chhiú.

16Tùi án-ni, sàn-chhiah-lâng ū ǹg-bāng;

pháiⁿ-lâng ê chhùi siū that-ba̍t.

17Siū Siōng-tè koán-kàu ê lâng chin ū hok-khì;

só͘-í, m̄-thang khòaⁿ-khin Choân-lêng-chiá ê tok-chek.

18I kā lâng phah-siong, m̄-kú mā kā i pau-chat;

I kā lâng siong-hāi, m̄-kú mā kā i i-hó.

19Lí tú-tio̍h la̍k piàn ê chai-lān, I ōe kiù lí;

sīm-chì chhit piàn, chai-hāi mā bōe kha̍p--tio̍h-lí.

20Ki-hng ê sî, I ōe kiù lí thoat-lī sí-bông;

kau-chiàn ê sî, I ōe kiù lí thoat-lī to-kiàm.

21Lí ōe tit-tio̍h pó-hō͘,

bián siū chhùi-chi̍h ê kong-kek;

chai-hō kàu ê sî, lí mā bián kiaⁿ.

22Chai-hāi kap ki-hng, lí beh kā in thí-chhiò;

tōe-chiūⁿ ê iá-siù, lí mā bián kiaⁿ.

23Lí lôe-chhân ê sî bōe lôe-tio̍h chio̍h-thâu;

iá-siù ōe kap lí hô-hó.

24Lí ōe chai lí ê pò͘-pîⁿ an-choân;

lí sûn iûⁿ-tiâu, bô-pòaⁿ-chiah sit-lo̍h.

25Lí ōe chai lí ê kiáⁿ-sun chin chōe,

lí ê hō͘-tāi chhin-chhiūⁿ tōe-chiūⁿ ê chhiⁿ-chháu hiah ōng-sēng.

26Lí ōe hè-siū móa chiah kè-óng,

chhin-chhiūⁿ be̍h-khún sî kàu chiah siu-khǹg.

27Khòaⁿ leh, chiah-ê tāi-chì goán ū chhâ chheng-chhó,

si̍t-chāi sī án-ni.

Tio̍h thiaⁿ, tio̍h chiap-la̍p!

Iok-pek-kì 5 - 現代台語譯本羅馬字版(TTVR)-闽南语

Learn More About Us