Chim-giân 13

Chim-giân 13 - 現代台語譯本羅馬字版(TTVR)-闽南语

1Tì-hūi ê kiáⁿ thiaⁿ-thàn lāu-pē ê kàu-tō;

chū-ko chū-tāi ê lâng m̄ thiaⁿ chek-pī.

2Lâng kóng hó-ōe ū hó ê sêng-kó;

kan-chà ê lâng tô͘-bô͘ kiông-pō.

3Iok-sok chhùi-chi̍h, pó-choân sìⁿ-miā;

sûi-piān khui-chhùi, tì-kàu húi-bia̍t.

4Pîn-tōaⁿ ê lâng sim him-bō͘, mā tit bōe tio̍h;

phah-piàⁿ ê lâng ōe sim-móa-ì-chiok.

5Gī-lâng iàm-ò͘ⁿ pe̍h-chha̍t-ōe;

pháiⁿ-lâng sit thé-biān, lâu chhàu-miâ.

6Kong-gī pó-hō͘ chèng-ti̍t ê lâng;

siâ-ok pāi-hoāi ū-chōe ê lâng.

7Ū lâng chng-chòe hó-gia̍h, kî-si̍t bô-pòaⁿ-hāng;

ū lâng chng-chòe sàn-chhiah, kî-si̍t ū chin chōe châi-bu̍t.

8Hó-gia̍h-lâng ēng chîⁿ sio̍k-miā;

sàn-chhiah-lâng m̄ kiaⁿ lâng ui-hia̍p.

9Gī-lâng ê kng ōe bêng-liāng;

pháiⁿ-lâng ê teng ōe sit--khì.

10Kiau-ngō͘ it-tēng khí saⁿ-chiⁿ;

thiaⁿ lâng khó͘-khǹg ū tì-hūi.

11M̄-sī phah-piàⁿ tit--tio̍h ê chîⁿ ōe ná kiám-chió;

lâu-kōaⁿ chek-chū ê chîⁿ ōe ná ke-thiⁿ.

12Só͘ ǹg-bāng--ê kú bô si̍t-hiān, sim chiū thòng-khó͘ sit-chì;

só͘ ì-ài--ê chi̍t-ē si̍t-hiān, sìⁿ-miā chiū chhiong-móa oa̍h-le̍k.

13Biáu-sī kà-sī, chū-chhú-bia̍t-bông;

chun-tiōng kài-bēng, tit-tio̍h pò-siúⁿ.

14Chhong-bêng-lâng ê kà-sī sī oa̍h-miā ê chúi-chôaⁿ,

hō͘ lâng bián hām-lo̍h sí-bông ê lô-bāng.

15Bêng-lí ê lâng ōe siū chun-tiōng, siū chiap-la̍p;

kan-chà ê lâng ê lō͘ khâm-khia̍t pháiⁿ-kiâⁿ.

16Thong-ta̍t ê lâng ēng tì-hūi chòe tāi-chì;

gōng-lâng hián-lō͘ ka-kī ê gû-gōng.

17Pháiⁿ ê sù-chiá hō͘ lâng hām-lo̍h chai-hō;

tiong-sìn ê chhe-sài hō͘ lâng tit-tio̍h i-tī kiù-chō͘.

18Kū-choa̍t kàu-tok, ōe tì-kàu sàn-chhiah kiàn-siàu;

goān-ì siū chek-pī, ōe siū kèng-tiōng.

19Só͘ ì-ài--ê si̍t-hiān, sim chiū hoaⁿ-hí;

lī-khui pháiⁿ-tāi, gōng-lâng m̄-goān.

20Kap tì-hūi ê lâng tâng-kiâⁿ chiū ū tì-hūi;

kap gōng-lâng choh-phōaⁿ ōe siū siong-hāi.

21Chai-hō ōe tui-jip chōe-jîn;

hoân-êng sī gī-lâng ê pò-siúⁿ.

22Hó-lâng lâu sán-gia̍p hō͘ kiáⁿ-sun;

chōe-jîn chek-chū ê châi-hù chòe-āu kui gī-lâng.

23Sàn-chhiah-lâng ê chhân-hn̂g seng-sán chin chōe bí-niû,

m̄-kú in-ūi bô kong-gī soah lóng siū chhiúⁿ-toa̍t.

24M̄-kam chek-hoa̍t kiáⁿ-jî sī bô thiàⁿ in;

nā thiàⁿ in, chiū tio̍h chiàu-sî chek-tok.

25Gī-lâng ōe-tàng chia̍h kah sim-móa-ì-chiok;

pháiⁿ-lâng ê pak-tó͘ put-sî iau-iau.

Chim-giân 13 - 現代台語譯本羅馬字版(TTVR)-闽南语

Learn More About Us