Hui-li̍p-pí-su 2

Hui-li̍p-pí-su 2 - 現代台語譯本羅馬字版(TTVR)-闽南语

Ki-tok Sī Lán ê Bô͘-iūⁿ

1Kì-jiân lín kap Ki-tok kiat-liân ū tit-tio̍h kek-lē; kì-jiân lín tùi I ê thiàⁿ ū tit-tio̍h an-ùi; kì-jiân lín kap Sèng Sîn ū thoân-khè; kì-jiân lín ū keng-giām Siōng-tè ê chû-pi lîn-bín;

2lín tio̍h ū siâng-khoán ê sim-chì, siâng-khoán ê thiàⁿ-sim, hô-hâi ê kám-chêng, it-tì ê siūⁿ-hoat, thang hō͘ góa chhiong-móa hoaⁿ-hí.

3M̄-thang chū-su-chū-lī, mā m̄-thang tui-kiû hu-êng; hoán-tńg tio̍h ū khiam-sùn ê sim, khòaⁿ pa̍t-lâng pí ka-kī khah gâu.

4Lín ta̍k-ê lâng m̄-thang chí-ū kò͘ ka-kī ê tāi-chì, mā tio̍h kò͘ pa̍t-lâng ê tāi-chì.

5Lín tio̍h ū Ki-tok Iâ-so͘ ê sim-chì:

6I goân-pún ū Siōng-tè ê sin-hūn,

khiok bô lām-iōng kap Siōng-tè pêng-téng ê tōe-ūi.

7I hoán-tńg piàⁿ-khang ka-kī,

chhú lô͘-po̍k ê sin-hūn,

chhut-sì kap lâng kâng-khoán,

ēng lâng ê hêng-thé chhut-hiān.

8I chū-goān khiam-pi,

sūn-ho̍k kàu sí,

sīm-chì sí tī si̍p-jī-kè téng.

9In-ūi án-ni, Siōng-tè thê-seng I kàu siōng-koân ê tōe-ūi,

sù I chhiau-oa̍t bān miâ ê miâ-hō.

10Án-ni, ūi-tio̍h kèng-tiōng Iâ-so͘ ê miâ,

thiⁿ-téng, tōe-chiūⁿ, tōe-ē,

it-chhè ê kha-thâu-u lóng ōe kūi-pài,

11ta̍k-ê chhùi lóng soan-jīn,

“Iâ-so͘ Ki-tok sī Chú”,

lâi êng-iāu Pē Siōng-tè.

Chhin-chhiūⁿ Kng Chiò Sè-kan

12Só͘-í, chhin-ài ê hiaⁿ-tī chí-bē, góa tī lín hia ê sî, lín lóng ū sūn-thàn góa; hiān-chāi góa bô tī lín hia, lín koh-khah tio̍h án-ni. Tio̍h kè-sio̍k kiaⁿ-hiâⁿ ngia̍uh-ngia̍uh-chhoah lâi oân-sêng lín ê tit-kiù;

13in-ūi Siōng-tè sî-siông tī lín tiong-kan teh chòe kang, hō͘ lín ū ì-goān koh ōe si̍t-chián I ê hó chí-ì.

14Bô-lūn chòe sím-mi̍h tāi-chì, lóng m̄-thang bâi-oàn á-sī cheng-lūn,

15hō͘ lín thang chheng-pe̍k sûn-kiat, tī chit-ê siâ-ok hú-pāi ê sè-tāi choh Siōng-tè bô khoat-tiám ê kiáⁿ-jî. Tio̍h tī in tiong-kan hoat-kng, chhin-chhiūⁿ kng teh chiò sè-kan,

16lâi kian-siú sù oa̍h-miā ê sìn-sit, hō͘ góa tī Ki-tok ê Ji̍t thang khoa-kháu kóng ka-kī bô khang-khang phun-pho, bô khang-khang lô-khó͘.

17Góa nā tio̍h ēng ka-kī ê huih chòe tiān-chiú-chè lâm tī lín ê sìn-sim só͘ hiàn ê chè-mi̍h, góa mā hoaⁿ-hí, mā beh kap lín chòe-hé hoaⁿ-hí.

18Siâng-khoán, lín mā tio̍h hoaⁿ-hí, kap góa hun-hióng hoaⁿ-hí.

Thê-mô͘-thài kap Í-pa-hut-thê

19Góa ǹg-bāng Chú Iâ-so͘ hō͘ góa ōe-tàng kín chhe Thê-mô͘-thài khì lín hia, hō͘ góa thang thiaⁿ-tio̍h lín ê siau-sit lâi tit-tio̍h kek-lē.

20Chí-ū i ū kap góa tâng-sim chin-chiàⁿ teh koan-sim lín ê tāi-chì.

21Chèng-lâng lóng teh tui-kiû ka-kī ê sū, m̄-sī Iâ-so͘ Ki-tok ê sū.

22M̄-kú Thê-mô͘-thài ê choh-lâng lín lóng chai, i kap góa chhin-chhiūⁿ pē kap kiáⁿ chòe-hé ūi-tio̍h thoân hok-im teh ho̍k-sāi.

23Án-ni, góa chi̍t-ē chai góa ê tāi-chì ū sím-mi̍h kiat-kio̍k, ǹg-bāng ōe-tàng sûi-sî chhe i khì lín hia.

24Góa khak-sìn Chú mā ōe hō͘ góa chin kín khì kìⁿ lín.

25Put-kò, góa siūⁿ-kóng tio̍h chhe Í-pa-hut-thê khì lín hia; i sī góa ê hiaⁿ-tī, tâng-kang, kap chiàn-iú, tī góa su-iàu ê sî lín ū phài i lâi ho̍k-sāi góa.

26I chin siàu-liām lín tāi-ke, mā in-ūi chai-iáⁿ lín ū thiaⁿ-tio̍h i phòa-pīⁿ ê tāi-chì, sim chin kan-khó͘.

27I khak-si̍t ū phòa-pīⁿ, sīm-chì hiám sí--khì. M̄-kú Siōng-tè ū lîn-bín i, m̄-nā i nā-tiāⁿ, mā ū lîn-bín góa, hō͘ góa m̄-bián koh ke-thiⁿ iu-siong.

28In-ūi án-ni, góa kóaⁿ-kín beh chhe i tńg-khì lín hia, hō͘ lín ōe-tàng koh kìⁿ-tio̍h i lâi hoaⁿ-hí, mā thang kiám-chió góa ê khòa-lū.

29Só͘-í, lín tio̍h tī Chú ê lāi-bīn hoaⁿ-hoaⁿ-hí-hí kā i chiap-la̍p. Tio̍h chun-tiōng chhin-chhiūⁿ i chit-khoán ê lâng,

30in-ūi i ūi-tio̍h Ki-tok ê kang-chok mō͘ sìⁿ-miā ê gûi-hiám hiám-hiám-á sí, beh pó͘ lín chòe bô-kàu--ê, thòe lín lâi ho̍k-sāi góa.

Hui-li̍p-pí-su 2 - 現代台語譯本羅馬字版(TTVR)-闽南语

Learn More About Us