Í-sài-a-su 42

Í-sài-a-su 42 - 現代台語譯本羅馬字版(TTVR)-闽南语

Siōng Chú ê Po̍k-jîn

1Siōng Chú kóng:

“Khòaⁿ leh, góa só͘ hû-chhî ê po̍k-jîn,

i sī góa só͘ kéng-soán, sim só͘ ì-ài--ê!

Góa ū chiong góa ê sîn sù hō͘ i;

i ōe tī bān-pang si-hêng kong-gī.

2I bōe chhut-siaⁿ hoah, bōe tōa-siaⁿ jióng;

i bōe tī koe-thâu-hāng-bé hoah hō͘ lâng thiaⁿ--kìⁿ.

3Siū-siong ê lô͘-úi, i bōe at-tn̄g;

beh hoa ê teng-hé, i bōe pûn-sit.

I ōe khak-si̍t si-hêng kong-gī.

4I bōe hoe-sim, mā bōe sit-chì,

it-ti̍t kàu kong-gī tī tōe-chiūⁿ khak-li̍p.

Chèng hái-tó lóng gióng-bōng i ê kàu-tō.”

5Siōng-tè chhòng-chō thiⁿ, kā thiⁿ thí-khui;

I chō tōe kap tōe-chiūⁿ ê bān-mi̍h,

chiong khùi sù hō͘ sè-kan-lâng,

sù sìⁿ-miā hō͘ tī tōe-chiūⁿ teh seng-oa̍h ê lâng.

Chit-ūi Siōng Chú — lán ê Siōng-tè án-ni kóng,

6“Góa Siōng Chú tiàu lí lâi si̍t-chián kong-gī;

góa ū khan lí ê chhiú pó-siú lí.

Thong-kè lí, góa kap bān-bîn tēng khè-iok,

beh hō͘ lí chòe bān-kok ê kng.

7Lí beh khui sit-bêng ê lâng ê ba̍k-chiu,

hō͘ siū-koaiⁿ--ê chhut kaⁿ-ga̍k,

hō͘ chē tī o͘-àm tōe-lô tiong--ê tit chū-iû.

8Góa sī Siōng Chú, che sī góa ê chheng-ho͘.

Góa bōe chiong góa ê êng-iāu niū hō͘ pa̍t-ê sîn-bêng,

bōe chiong góa ê chheng-chàn kui hō͘ ngó͘-siōng.

9Khòaⁿ leh, chá-chêng ê sū í-keng si̍t-hiān;

hiān-chāi góa tùi lín soan-pò͘ sin ê sū,

tī iáu-bē hoat-seng í-chêng seng kóng hō͘ lín thiaⁿ.”

Siōng-chàn ê Si

10Hái kap hái-tiong it-chhè ê seng-bu̍t,

hái-tó kap tó-lāi ê chū-bîn ah,

tio̍h tùi Siōng Chú chhiùⁿ sin ê koa,

tùi thiⁿ-piⁿ-hái-kak chheng-chàn I.

11Hong-iá kap lāi-bīn ê siâⁿ-tìn, tio̍h chhut tōa-siaⁿ;

Ki-ta̍t-lâng ê chng-siā, tio̍h hoan-ho͘.

Se-la ê chū-bîn, tio̍h hoaⁿ-hí chhiùⁿ-koa,

tùi soaⁿ-téng tōa-siaⁿ hoah.

12In tio̍h chiong êng-kng kui hō͘ Siōng Chú,

tī chèng hái-tó soan-iông chheng-chàn I.

13Siōng Chú ōe chhin-chhiūⁿ chiàn-sū chhut-cheng,

chhin-chhiūⁿ ióng-sū kek-hoat tò͘-chì.

I ōe chhut-siaⁿ hoah, tōa-siaⁿ kiò,

ióng-béng kong-kek I ê tùi-te̍k.

Siōng-tè Èng-ún Pang-chān I ê Chú-bîn

14Siōng-tè kóng, “Góa í-keng lún chin kú,

it-ti̍t tiām-tiām bô chhut-siaⁿ.

Taⁿ góa beh chhái-chhú hêng-tōng,

chhin-chhiūⁿ sán-hū ai-ai-kiò,

ti̍t-ti̍t chhoán, chhoán bōe lī.

15Góa beh hō͘ tōa-soaⁿ sió-soaⁿ lóng hong-hòe,

hō͘ só͘-ū ê hoe-chháu ta-liáu-liáu.

Góa beh hō͘ kang-hô pìⁿ-chòe ta-tōe,

hō͘ ô͘-chúi lóng ta--khì.

16Góa beh chhōa sit-bêng ê lâng kiâⁿ-lō͘,

kiâⁿ in m̄-bat kiâⁿ--kè ê lō͘.

Góa beh hō͘ o͘-àm tī in bīn-chêng pìⁿ-chòe kng-bêng,

hō͘ oan-khiau ê lō͘ pìⁿ-chòe ti̍t-ti̍t.

Chiah-ê sū góa lóng beh chòe, choa̍t-tùi bōe hòng-khì.

17Óa-khò tiau-khek ê ngó͘-siōng--ê,

tùi chù-chō ê siōng kóng ‘Lín sī goán ê sîn’ ê lâng,

chit-khoán lâng it-tēng sit-pāi siū tōa thí-jio̍k.”

Í-sek-lia̍t Bô Siū-kà

18Lín chiah-ê chhàu-hī--ê, tio̍h thiaⁿ!

Lín chiah-ê chhiⁿ-mî--ê, tio̍h khòaⁿ!

19Siáⁿ-lâng pí góa ê po̍k-jîn koh-khah chhiⁿ-mî?

Siáⁿ-lâng pí góa chhe ê sù-chiá koh-khah chhàu-hī?

20 Í-sek-lia̍t ah, lí khòaⁿ chin chōe, m̄-kú bōe bêng-pe̍k;

lí hī-á phah chin khui, m̄-kú bōe léng-ngō͘.

21Siōng Chú ì-ài péng-kong-hêng-gī,

chiong ka-kī ê kàu-tō hoat-iông-kong-tāi.

22M̄-kú chiah-ê siū chhiúⁿ-kiap pak-toa̍t ê chú-bîn,

lóng koaiⁿ tī tōe-hia̍t, kìm tī kaⁿ-ga̍k.

In hō͘ lâng chòe la̍h-bu̍t kng-cháu, bô lâng kái-kiù;

in hō͘ lâng kiap--khì, bô lâng iau-kiû pàng in.

23Lín tiong-kan ū siáⁿ-lâng ōe koan-sim chit-ê tāi-chì?

Tùi hiān-chāi khí ū siáⁿ-lâng ōe chù-ì chit-hāng sū?

24Siáⁿ-lâng chiong Ngá-kok kau hō͘ lâng chòe la̍h-bu̍t,

hō͘ Í-sek-lia̍t chhut-chāi lâng chhiúⁿ-kiap?

Sī in só͘ tek-chōe hit-ūi Siōng Chú pún-sin!

In m̄-khéng kiâⁿ I ê tō-lō͘,

m̄-khéng chun-siú I ê lu̍t-hoat.

25Só͘-í, I chiong béng-lia̍t ê siū-khì, chiàn-cheng ê pō-le̍k

lóng piàⁿ tī Í-sek-lia̍t sin-chiūⁿ.

In hō͘ lia̍t-hé pau-ûi, m̄-kú lóng bô-iàu-bô-kín,

hō͘ hé sio--tio̍h, mā iáu phî-phî.

Í-sài-a-su 42 - 現代台語譯本羅馬字版(TTVR)-闽南语

Learn More About Us