Si-phian 137 - 現代台語譯本羅馬字版(TTVR)-闽南语

Hu-ló͘ ê Ai-ko

1Goán chē tī Pa-pí-lûn ê hô-piⁿ,

chi̍t-ē siūⁿ-tio̍h Sek-an, ba̍k-sái chiū lâu.

2Goán chiong khîm

tiàu tī hia ê liú-chhiū.

3Tī hia, lia̍h goán ê lâng kiò goán chhiùⁿ-koa;

khó͘-chhó͘ goán ê lâng ài goán hō͘ in khoài-lo̍k,

kóng, “Kā goán chhiùⁿ chi̍t tiâu Sek-an ê koa.”

4Goán tī īⁿ-pang

ná chhiùⁿ ōe chhut kèng-pài Siōng Chú ê si-koa?

5 Iâ-lō͘-sat-léng ah, góa nā bōe-kì-tit lí,

tio̍h hō͘ góa ê chiàⁿ-chhiú khê--khì, bōe tôaⁿ-khîm.

6Góa nā bōe-kì-tit lí,

nā bô khòaⁿ Iâ-lō͘-sat-léng chòe góa ê tē-it hoaⁿ-hí,

tio̍h hō͘ góa ê chi̍h liâm tī téng-kiuⁿ bōe chhiùⁿ-koa.

7 Iâ-lō͘-sat-léng lûn-hām ê ji̍t,

Í-tong-lâng kóng, “Kā i thiah-húi! Kā i thiah-húi!

Kā i thiah kàu tōe-ki!”

Siōng Chú ah, kiû lí ōe-kì-tit hit-ji̍t.

8 Pa-pí-lûn-siâⁿ ah, lí eng-kai siū húi-bia̍t!

Lí án-chóaⁿ tùi-thāi goán,

hiah-ê chiàu án-ni tùi-thāi lí ê lâng ū hok-khì.

9Lia̍h lí ê eⁿ-á siak tī chio̍h-pôaⁿ téng

hit-khoán lâng ū hok-khì.

Learn More About Us