Iâ-lī-bí-su 36

Iâ-lī-bí-su 36 - 現代台語譯本羅馬字版(TTVR)-闽南语

Pa-lio̍k tī Sèng-tiān Soan-tho̍k Chheh-kǹg

1 Iok-se-a ê kiáⁿ Iok-ngá-kèng thóng-tī Iû-tāi tē-sì nî, Siōng Chú tùi Iâ-lī-bí kóng,

2“Lí the̍h chi̍t kńg chheh lâi, chiong Iok-se-a choh-ông ê sî kàu kin-á-ji̍t, góa tùi lí kóng só͘-ū iú-koan Í-sek-lia̍t kap Iû-tāi, í-ki̍p lia̍t-kok ê ōe, lóng kì-lio̍k--khí-lâi.

3Iû-tāi-ke thiaⁿ-tio̍h góa beh kàng chai-hō hō͘ in, in ta̍k-ê lâng ū khó-lêng ōe hóe-kái, bô koh kiâⁿ siâ-ok ê lō͘, án-ni góa chiū ōe sià-bián in ê chōe-gia̍t kap chōe-ok.”

4 Iâ-lī-bí kiò Nî-lī-a ê kiáⁿ Pa-lio̍k lâi, chiong Siōng Chú tùi i só͘ kóng it-chhè ê ōe kā Pa-lio̍k kóng, Pa-lio̍k chiū chiong chiah-ê ōe lóng kì-lio̍k tī chheh-kǹg.

5Iâ-lī-bí hoan-hù Pa-lio̍k, kóng, “Góa hō͘ lâng kìm-chí, bōe-ēng-tit ji̍p-khì Siōng Chú ê sèng-tiān,

6só͘-í lí tio̍h tī kìm-chia̍h ê ji̍t ji̍p-khì Siōng Chú ê tiān, chiong góa kā lí kóng, lí siá tī chheh-kǹg Siōng Chú ê ōe, tha̍k hō͘ jîn-bîn kap tùi ta̍k-ê siâⁿ-tìn lâi ê Iû-tāi-lâng thiaⁿ.

7In ū khó-lêng ōe tī Siōng Chú ê bīn-chêng kî-tó hóe-kái, ta̍k-ê lâng bô koh kiâⁿ siâ-ok ê lō͘, in-ūi Siōng Chú ū kóng, I tùi chit-ê bîn-cho̍k hoat ê siū-khì hui-siông béng-lia̍t.”

8Nî-lī-a ê kiáⁿ Pa-lio̍k chiū chiàu sian-ti Iâ-lī-bí só͘ hoan-hù it-chhè ê ōe, tī Siōng Chú ê sèng-tiān soan-tho̍k chheh-kǹg só͘ kì-chài Siōng Chú ê ōe.

9 Iok-se-a ê kiáⁿ Iok-ngá-kèng choh Iû-tāi-ông tē-gō͘ nî káu--ge̍h, tòa tī Iâ-lō͘-sat-léng ê lâng kap só͘-ū tùi Iû-tāi ta̍k siâⁿ-tìn lâi Iâ-lō͘-sat-léng ê jîn-bîn, tī Siōng Chú ê bīn-chêng chun-siú kìm-chia̍h.

10Hit-sî, Pa-lio̍k tī Siōng Chú sèng-tiān ê téng-bīn-tiâⁿ, óa-kūn sèng-tiān Sin-mn̂g mn̂g-kháu, Sa-hoan ê kiáⁿ su-kì Ki-má-lī-ngá ê pâng-keng, soan-tho̍k chheh-kǹg lāi-bīn Iâ-lī-bí ê ōe hō͘ só͘-ū ê jîn-bîn thiaⁿ.

Tùi Koaⁿ-oân Soan-tho̍k Chheh-kǹg

11 Sa-hoan ê sun, Ki-má-lī-ngá ê kiáⁿ Bí-kai-ngá thiaⁿ-tio̍h chheh-kǹg só͘ kì-chài Siōng Chú ê ōe,

12chiū khì ông-kiong, ji̍p-khì kiong-tiān su-kì ê pâng-keng. Hit-sî, chin chōe koaⁿ-oân í-keng chē tī hia, pau-koat su-kì-koaⁿ Í-lī-sa-má, Sī-má-ngá ê kiáⁿ Tē-lâi-ngá, A-kek-pho ê kiáⁿ Í-lī-ná-tan, Sa-hoan ê kiáⁿ Ki-má-lī-ngá, Hap-ná-nî-ngá ê kiáⁿ Se-tí-ka, í-ki̍p kî-tha ê koaⁿ-oân.

13Bí-kai-ngá chiong i só͘ thiaⁿ--tio̍h, Pa-lio̍k tùi só͘-ū jîn-bîn soan-tho̍k hit-ê chheh-kǹg ê ōe, lóng kā in kóng.

14In chiū phài Kó͘-sī ê kan-á-sun, Sī-lī-bí-ngá ê sun, Nî-thàm-ngá ê kiáⁿ Iû-tí khì Pa-lio̍k hia, kiò i chhin-sin kā hit-kńg chheh tòa--lâi. Nî-lī-a ê kiáⁿ Pa-lio̍k chiū the̍h chheh-kǹg khì in hia.

15In kā i kóng, “Chhiáⁿ-chē. Chhiáⁿ tha̍k hō͘ goán thiaⁿ.” Pa-lio̍k chiū tha̍k hō͘ in thiaⁿ.

16In thiaⁿ-liáu, chin kiaⁿ-hiâⁿ, hō͘-siōng khòaⁿ-lâi-khòaⁿ-khì. In kā Pa-lio̍k kóng, “Goán it-tēng tio̍h chiong chiah-ê ōe lóng tùi ông pò-kò.”

17In koh mn̄g Pa-lio̍k, “Chhiáⁿ kā goán kóng, lí án-chóaⁿ kā chiah-ê siá--khí-lâi? Sī Iâ-lī-bí chhin-chhùi kóng--ê sī--bô?”

18 Pa-lio̍k ìn kóng, “Só͘-ū chiah-ê ōe lóng sī i chhin-chhùi kā góa kóng--ê, góa chiū ēng pit-ba̍k siá tī chheh-kǹg.”

19Hiah-ê koaⁿ-oân kā Pa-lio̍k kóng, “Lí kap Iâ-lī-bí tio̍h khì bih--khí-lâi, m̄-thang hō͘ lâng chai lín tī tó-ūi.”

20Hiah-ê koaⁿ-oân chiong hit-kńg chheh hē tī su-kì-koaⁿ Í-lī-sa-má ê pâng-keng, jiân-āu ji̍p-khì ông-kiong ê tiâⁿ khì kìⁿ ông, chiong chiah-ê ōe tùi ông pò-kò.

21Ông chiū phài Iû-tí khì su-kì-koaⁿ Í-lī-sa-má ê pâng-keng, the̍h hit-kńg chheh lâi, tha̍k hō͘ ông kap khiā tī ông chó-iū ê jîn-sîn thiaⁿ.

22Hit-chūn sī káu--ge̍h, ông chē tī tang-kiong; i thâu-chêng hé-lô͘ ê hé teh to̍h.

23Iû-tí ta̍k-piàn tha̍k saⁿ sì lân, ông chiū ēng su-kì ê to-á kā chheh-kǹg koah-phòa, hiat-lo̍h hé-lô͘, kàu kui-kńg chheh lóng sio-liáu-liáu.

24Ông kap hiah-ê jîn-sîn thiaⁿ-tio̍h chiah-ê ōe lóng bô teh kiaⁿ, mā bô thiah-li̍h in ê saⁿ.

25Í-lī-ná-tan, Tē-lâi-ngá, Ki-má-lī-ngá chhéng-kiû ông m̄-thang sio hit-kńg chheh, m̄-kú ông lóng m̄ thiaⁿ.

26Ông tian-tò bēng-lēng ông-chú Iâ-la-bia̍t, A-su-lia̍t ê kiáⁿ Se-lâi-ngá, kap A-pek-tia̍p ê kiáⁿ Sī-lī-bí-ngá khì lia̍h su-kì Pa-lio̍k kap sian-ti Iâ-lī-bí; m̄-kú Siōng Chú kā in nn̄g ê chhàng--khí-lâi.

27 Iok-ngá-kèng-ông chiong Iâ-lī-bí kóng hō͘ Pa-lio̍k siá--lo̍h-lâi hit-kńg chheh sio--khì liáu-āu, Siōng Chú tùi Iâ-lī-bí kóng-ōe, kóng,

28“Lí koh the̍h chi̍t kńg chheh-kǹg, chiong Iû-tāi-ông Iok-ngá-kèng sio--khì hit-kńg chheh lāi-bīn ê ōe koh siá chi̍t piàn.

29Koan-hē Iû-tāi-ông Iok-ngá-kèng, lí tio̍h kóng, Siōng Chú án-ni kóng: Lí sio hit-kńg chheh, koh kóng, ‘Iâ-lī-bí sī-án-chóaⁿ tī hit lāi-bīn siá, Pa-pí-lûn-ông ōe lâi húi-bia̍t chit-tè thó͘-tōe, siau-bia̍t chiah-ê jîn-bîn kap cheng-siⁿ?’

30Só͘-í, Siōng Chú chiam-tùi Iû-tāi-ông Iok-ngá-kèng án-ni kóng: I ê kiáⁿ-sun it-tēng bô lâng ōe-tàng chē Tāi-pi̍t ê ông-ūi; i ê si-thé ōe hō͘ lâng hiat tī gōa-bīn, ji̍t--sî hō͘ ji̍t pha̍k, mî--sî hō͘ sng tàng.

31Góa beh in-ūi i, i ê kiáⁿ-jî, kap i ê jîn-sîn ê chōe-gia̍t kā in hêng-hoa̍t, mā beh chiong góa tùi in kóng--kè ê chai-hō kàng hō͘ in kap Iâ-lō͘-sat-léng ê chū-bîn, í-ki̍p Iû-tāi jîn-bîn. M̄-kú in iáu-sī m̄ thiaⁿ-thàn.”

32 Iâ-lī-bí chiū koh the̍h chi̍t kńg chheh-kǹg, kau hō͘ Nî-lī-a ê kiáⁿ su-kì Pa-lio̍k, kiò i chiong hō͘ Iû-tāi-ông Iok-ngá-kèng sio--khì hit-kńg chheh-kǹg ê lōe-iông koh siá chi̍t piàn, lēng-gōa koh pó͘-chhiong chin chōe lūi-sū ê ōe.

Iâ-lī-bí-su 36 - 現代台語譯本羅馬字版(TTVR)-闽南语

Learn More About Us