Bîn-sò͘-kì 34

Bîn-sò͘-kì 34 - 現代台語譯本羅馬字版(TTVR)-闽南语

Ka-lâm ê Tōe-kài

1Siōng Chú tùi Mô͘-se kóng,

2“Lí tio̍h bēng-lēng Í-sek-lia̍t-lâng, tùi in kóng: Lín chìn-ji̍p góa sù hō͘ lín chòe sán-gia̍p ê Ka-lâm-tōe í-āu, lín ê tōe-kài sī án-ni:

3Lín lâm-pêng ê tōe-kài sī tùi Sîm ê khòng-iá, sūn Í-tong ê pian-kài, chiū-sī tùi Iâm-hái tang-pêng ê chīn-thâu,

4se̍h-kè A-khek-la-pin-kiā ê lâm-pêng, keng-kè Sîm thàng kàu Ka-te-su Pa-nî-a ê lâm-pêng, koh ǹg sai-pak kàu Hap-sat A-ta̍t, jiân-āu khì kàu Ap-bûn,

5tùi Ap-bûn choán-ǹg Ai-ki̍p pian-kài ê khoe-kok kàu Tōe-tiong-hái ûi-chí.

6“Sai-pêng ê tōe-kài sī Tōe-tiong-hái.

7“Pak-pêng ê tōe-kài tùi Tōe-tiong-hái khai-sí ōe kài-sòaⁿ, ōe kàu Hô-ní-soaⁿ,

8koh kàu Hap-má ài-kháu, thàng kàu Se-ta̍t-ta̍t

9kap Se-húi-lûn, kàu Hap-sat Í-lân ûi-chí.

10“Tang-pêng ê tōe-kài tùi Hap-sat Í-lân khai-sí, ōe kàu Sī-hoan,

11jiân-āu lo̍h-khì kàu A-in tang-pêng ê Lī-pí-la, koh sòa kàu Ka-lī-lī-ô͘ ê tang-pêng,

12sūn Iok-tàn-hô, thàng kàu Iâm-hái ûi-chí.

“Í-siōng chiū-sī lín ê léng-thó͘ sì pêng ê tōe-kài.”

13 Mô͘-se koh bēng-lēng Í-sek-lia̍t-lâng kóng, “Che chiū-sī lín beh thiu-chhiam pun-chòe sán-gia̍p ê tōe, mā-sī Siōng Chú bēng-lēng beh hō͘ lín káu-ê-pòaⁿ ê chi-cho̍k ê tōe.

14-15Lū-piān kap Ka-tek nn̄g ê chi-cho̍k, í-ki̍p Má-ná-se pòaⁿ chi-cho̍k í-keng chiàu chong-cho̍k hun-phòe, tit-tio̍h Iok-tàn-hô tang-pêng, Iâ-lī-ko tùi-bīn hōaⁿ ê thó͘-tōe chòe sán-gia̍p.”

Hū-chek Pun Thó͘-tōe ê Léng-siù

16Siōng Chú koh tùi Mô͘-se kóng,

17“Chiah-ê sī beh kā lín pun thó͘-tōe chòe sán-gia̍p ê lâng: Chè-si Í-lī-a-sat kap Lūn ê kiáⁿ Iok-su-a;

18lēng-gōa, lín tio̍h tùi ta̍k chi-cho̍k kéng chi̍t ê léng-siù, hia̍p-chō͘ in hun-phòe thó͘-tōe.

19Chiah-ê léng-siù sī: Iû-tāi chi-cho̍k Iâ-hu-nî ê kiáⁿ Ka-le̍k,

20Se-biān chi-cho̍k A-bí-hut ê kiáⁿ Sat-bó-ní,

21Piān-ngá-bín chi-cho̍k Ki-su-lûn ê kiáⁿ Í-lī-ta̍t,

22Tān chi-cho̍k Iok-lī ê kiáⁿ Pò͘-ki,

23Iok-sek ê hō͘-tāi Má-ná-se chi-cho̍k Í-hut ê kiáⁿ Hàn-nî-gia̍p,

24Í-hoat-liân chi-cho̍k Si̍p-hut-tān ê kiáⁿ Ki-bō͘-lī,

25Se-pò͘-lûn chi-cho̍k Phà-la̍p ê kiáⁿ Í-lī-sat-hoán,

26Í-sat-ka chi-cho̍k A-sàn ê kiáⁿ Phà-thiat,

27A-siat chi-cho̍k Sī-lô-bí ê kiáⁿ A-hi-hut,

28Ná-hut-tha-lī chi-cho̍k A-bí-hut ê kiáⁿ Pí-tāi-hek.”

29Í-siōng chiah-ê sī Siōng Chú jīm-bēng chiong Ka-lâm-tōe pun hō͘ Í-sek-lia̍t-lâng chòe sán-gia̍p ê léng-siù.

Bîn-sò͘-kì 34 - 現代台語譯本羅馬字版(TTVR)-闽南语

Learn More About Us