Le̍k-tāi-chì Hā-koàn 11

Le̍k-tāi-chì Hā-koàn 11 - 現代台語譯本羅馬字版(TTVR)-闽南语

Sī-má-ngá ê Ū-giân(1 Ông 12.21-24)

1 Lô-pho-an kàu Iâ-lō͘-sat-léng, chiū chū-chi̍p Iû-tāi-ke kap Piān-ngá-bín chi-cho̍k te̍k-soán ê chiàn-sū, kiōng cha̍p-poeh-bān lâng, beh kap Í-sek-lia̍t-ke kau-chiàn, hō͘ kui-ê ông-kok koh kui-sio̍k i ka-kī.

2M̄-kú Siōng Chú ê ōe lîm-kàu Siōng-tè tiōng-iōng ê lâng Sī-má-ngá, kóng,

3“Lí khì kā Só͘-lô-bûn ê kiáⁿ Iû-tāi-ông Lô-pho-an, Iû-tāi kap Piān-ngá-bín ê jîn-bîn, kóng,

4‘Siōng Chú án-ni kóng: Lín m̄-thang khì kap lín ê hiaⁿ-tī kau-chiàn; ta̍k-ê lâng tò-khì ka-kī ê chhù, in-ūi chit-ê tāi-chì chhut tī góa.’” In chiū thiaⁿ-thàn Siōng Chú ê ōe tò--khì, bô khì kong-kek Iâ-lô-pho-an.

Lô-pho-an Khí Kian-kò͘ ê Siâⁿ

5 Lô-pho-an tòa tī Iâ-lō͘-sat-léng. I tī Iû-tāi-tōe khí kúi-nā ê kian-kò͘ ê siâⁿ,

6chiū-sī Pek-lī-hêng, Í-thán, Thê-ko-a,

7Pek Siok, So-ko, A-tō͘-lân,

8Ka-te̍k, Má-lī-sa, Se-hut,

9A-to-lâi-im, La-kiat, A-se-ka,

10Só-la, A-ngá-lûn, kap Hi-pek-lûn; chiah-ê lóng sī Iû-tāi kap Piān-ngá-bín kian-kò͘ ê siâⁿ.

11Lô-pho-an koh kiông-hòa hiah-ê kian-kò͘ ê siâⁿ, siat chí-hui-koaⁿ, tún-chek niû-si̍t, kaⁿ-ná-iû, kap chiú;

12koh chún-pī tún-pâi kap chhiuⁿ, hō͘ chiah-ê siâⁿ koh-khah kian-kò͘. Iû-tāi kap Piān-ngá-bín lóng siū i thóng-tī.

Chè-si kap Lī-bī-lâng Kui Iû-tāi

13 Í-sek-lia̍t choân-tōe ê chè-si kap Lī-bī-lâng lóng tùi ta̍k só͘-chāi lâi kui-sūn Lô-pho-an.

14Lī-bī-lâng hòng-khì in ê chháu-po͘ kap sán-gia̍p, lâi kàu Iû-tāi kap Iâ-lō͘-sat-léng, in-ūi Iâ-lô-pho-an kap i hiah-ê kiáⁿ m̄-chún in chip-hêng chè-si ê chit-bū, ho̍k-sāi Siōng Chú.

15Iâ-lô-pho-an ūi soaⁿ-thâu-tôaⁿ, soaⁿ-iûⁿ-kúi, kap i só͘ chō ê gû-á-siōng, ka-kī siat-li̍p chè-si.

16Í-sek-lia̍t kok chi-cho̍k, só͘-ū koat-sim beh chhē-kiû Siōng Chú — Í-sek-lia̍t ê Siōng-tè ê lâng, lóng tè Lī-bī-lâng khì Iâ-lō͘-sat-léng, beh hiàn-chè hō͘ Siōng Chú — in lia̍t-chó͘ ê Siōng-tè.

17Án-ni, in hō͘ Iû-tāi-kok ún-kò͘; saⁿ nî kú ióng-hō͘ Só͘-lô-bûn ê kiáⁿ Lô-pho-an, in-ūi in chun-hêng Tāi-pi̍t kap Só͘-lô-bûn ê lō͘ saⁿ nî kú.

Lô-pho-an ê Ka-têng

18 Lô-pho-an chhōa Má-hap-la chòe bó͘; Má-hap-la ê lāu-pē sī Tāi-pi̍t ê kiáⁿ Iâ-lī-mô͘, lāu-bú sī Iâ-se ê cha-bó͘-sun, Í-lī-ap ê cha-bó͘-kiáⁿ A-pí-hâi.

19Má-hap-la siⁿ saⁿ ê kiáⁿ, Iâ-o͘-si, Sī-má-lī-ngá, kap Sat-hán.

20Āu-lâi Lô-pho-an koh chhōa Ap-sa-liông ê cha-bó͘-kiáⁿ Má-ka chòe bó͘; i siⁿ sì ê kiáⁿ, A-pí-ngá, A-thài, Sè-sat, kap Sī-lô-bi̍t.

21Lô-pho-an ū cha̍p-poeh ê bó͘, la̍k-cha̍p ê hui, siⁿ jī-cha̍p-poeh ê kiáⁿ, la̍k-cha̍p ê cha-bó͘-kiáⁿ; tī chiah-ê bó͘ kap hui ê tiong-kan, i siōng thiàⁿ Ap-sa-liông ê cha-bó͘-kiáⁿ Má-ka.

22Lô-pho-an siat-li̍p Má-ka ê kiáⁿ A-pí-ngá chòe thài-chú, tī i ê hiaⁿ-tī tiong chòe thâu, beh siat-li̍p i sòa-chiap choh-ông.

23Lô-pho-an chòe sū cheng-bêng, hun-phài i só͘-ū ê kiáⁿ khì Iû-tāi kap Piān-ngá-bín choân-tōe ta̍k-ê kian-kò͘ ê siâⁿ; koh hō͘ in chhiong-chiok ê niû-si̍t, kā in chhōa chin chōe bó͘.

Le̍k-tāi-chì Hā-koàn 11 - 現代台語譯本羅馬字版(TTVR)-闽南语

Learn More About Us