Iok-hān Hok-im 2

Iok-hān Hok-im 2 - 現代台語譯本羅馬字版(TTVR)-闽南语

Ka-ná ê Hun-lé

1Nn̄g ji̍t āu, tī Ka-lī-lī ê Ka-ná ū hun-lé; Iâ-so͘ ê lāu-bú ū tī hia.

2Iâ-so͘ kap I ê bûn-tô͘ mā siū iau-chhiáⁿ khì chham-ka.

3Chiú ēng-liáu ê sî, Iâ-so͘ ê lāu-bú tùi I kóng, “In í-keng bô chiú lah.”

4Iâ-so͘ kóng, “A-bú, che kap lí góa ū sím-mi̍h koan-hē; góa ê sî iáu-bē kàu.”

5I ê lāu-bú hoan-hù chhe-ēng ê lâng kóng, “I kā lín kóng sím-mi̍h, chiàu án-ni khì chòe.”

6Chiàu Iû-thài-lâng kiat-chēng ê kui-lē, tī hia ū la̍k ê chio̍h-àng, ta̍k-ê ōe-tàng tóe chha-put-to chi̍t-pah kong-seng.

7Iâ-so͘ kā hiah-ê chhe-ēng kóng, “Chiah-ê chúi-àng, chúi lóng tò hō͘ i tīⁿ.” In chiū chiong chúi tò ji̍p-khì chúi-àng, tò kàu móa.

8Jiân-āu Iâ-so͘ kā in kóng, “Taⁿ lín kā chúi iúⁿ--chhut-lâi, the̍h hō͘ pān-toh ê chóng-koán.” In chiū phâng-khì hō͘ i.

9Pān-toh ê chóng-koán chi̍t-ē tam-tio̍h í-keng pìⁿ-chòe chiú ê chúi, m̄ chai chit-ê chiú tùi tó-ūi lâi, put-kò iúⁿ-chúi ê chhe-ēng chai; chóng-koán chiū kiò sin-lông lâi,

10tùi i kóng, “Lâng lóng seng chhut hó chiú, tán lâng-kheh lim kàu chùi chiah chhut khah bái ê chiú, lí tian-tò chiong hó chiú lâu kàu chit-chūn.”

11Iâ-so͘ tī Ka-lī-lī ê Ka-ná kiâⁿ chit-ê tē-it ê sîn-jiah, tī hia hián-sī I ê êng-kng; I ê bûn-tô͘ lóng sìn I.

12Chit-ê tāi-chì í-āu, Iâ-so͘ kap I ê lāu-bú, hiaⁿ-tī, í-ki̍p bûn-tô͘ lo̍h-khì Ka-pek-lông, tī hia tòa kúi-nā ji̍t.

Iâ-so͘ Kiat-chēng Sèng-tiān(Thài 21.12-13; Khó 11.15-17; Lō͘ 19.45-46)

13 Iû-thài-lâng ê Pôaⁿ-kè-choeh teh-beh kàu, Iâ-so͘ chiūⁿ-khì Iâ-lō͘-sat-léng.

14I khòaⁿ-tio̍h ū lâng tī Sèng-tiān ê gōa-tiâⁿ teh bōe gû, iûⁿ, hún-chiáu; mā ū ōaⁿ-chîⁿ ê lâng teh hō͘ lâng ōaⁿ-chîⁿ.

15Iâ-so͘ chiū ēng soh-á chòe piⁿ, chiong gû, iûⁿ lóng tùi Sèng-tiān kóaⁿ--chhut-khì, chhia-tó chîⁿ-toh-á, kā in ê chîⁿ iā-sòaⁿ.

16I koh tùi bōe hún-chiáu ê lâng kóng, “Chiah-ê lóng poaⁿ-poaⁿ--chhut-khì; m̄-thang kā góa ê Pē ê chhù pìⁿ-chòe bóe-bōe ê chhù!”

17I ê bûn-tô͘ ōe-kì-tit Sèng-keng ū kì-chài, “Siōng-tè ah, góa ūi-tio̍h lí ê tiān sim hé-jia̍t, kui-ê lâng lóng hō͘ thun--lo̍h-khì.”

18 Iû-thài-kàu tong-kio̍k ê lâng hoán-mn̄g Iâ-so͘, “Lí beh ēng sím-mi̍h sîn-jiah kā goán chèng-bêng lí ū koân-pèng chòe chiah-ê tāi-chì?”

19Iâ-so͘ ìn kóng, “Lín thiah-húi chit-keng Sèng-tiān, saⁿ ji̍t lāi góa beh koh kā i khí--khí-lâi.”

20In kóng, “Chit-keng Sèng-tiān sì-cha̍p-la̍k nî kú chiah khí hó, lí saⁿ ji̍t lāi chiū beh khí--khí-lâi o͘h?”

21Kî-si̍t, Iâ-so͘ só͘ kóng ê Sèng-tiān sī chí I ê seng-khu.

22I tùi sí-lâng tiong koh-oa̍h í-āu, I ê bûn-tô͘ chiah ōe-kì-tit I bat án-ni kóng, in chiū sìn Sèng-keng kap Iâ-so͘ kóng ê ōe.

Iâ-so͘ Liáu-kái Lâng ê Sim

23Iâ-so͘ tī Iâ-lō͘-sat-léng kè Pôaⁿ-kè-choeh ê sî, chin chōe lâng khòaⁿ-tio̍h I kiâⁿ ê sîn-jiah chiū sìn I.

24Put-kò Iâ-so͘ bô sìn-jīm in, in-ūi I liáu-kái só͘-ū ê lâng.

25Koan-hē lâng ê tāi-chì, I bô su-iàu lâng kā I soat-bêng, in-ūi I chin-chiàⁿ liáu-kái lâng ê lāi-sim.

Iok-hān Hok-im 2 - 現代台語譯本羅馬字版(TTVR)-闽南语

Learn More About Us