Iâ-lī-bí-su 38

Iâ-lī-bí-su 38 - 現代台語譯本羅馬字版(TTVR)-闽南语

Iâ-lī-bí tī Thiok-chúi-tî Lāi-bīn

1 Má-thán ê kiáⁿ Sī-hoat-thê-ngá, Pa-si-hō͘-ní ê kiáⁿ Ki-tāi-lī, Sī-lī-bí-ngá ê kiáⁿ Iû-kah, Má-ki-ngá ê kiáⁿ Pa-si-hō͘-ní, thiaⁿ-tio̍h Iâ-lī-bí tùi bîn-chiòng kóng,

2“Siōng Chú án-ni kóng: Só͘-ū lâu tī chit-ê siâⁿ lāi-bīn ê lâng, lóng ōe in-ūi chiàn-loān, ki-hng, un-e̍k sí, m̄-kú chhut-khì tâu-hâng Pa-pí-lûn-lâng--ê chiū ōe oa̍h, chhin-chhiūⁿ sìⁿ-miā koh khioh--tio̍h.

3Siōng Chú koh kóng: Góa beh chiong chit-ê siâⁿ kau hō͘ Pa-pí-lûn-ông ê kun-tūi, i it-tēng ōe kong-chiàm chit-ê siâⁿ.”

4Hit kúi ê koaⁿ-oân chiū khì kā Se-tí-ka-ông pò-kò, kóng, “Chhiáⁿ ông kā chit-ê lâng chhú-sí, in-ūi i kā siâⁿ-lāi chhun--lo̍h-lâi ê kun-peng kap jîn-bîn kóng chit-khoán ōe, hō͘ in ê sū-khì siau-tîm sit-chì. Chit-ê lâng m̄-sī beh hō͘ jîn-bîn an-choân, sī beh hō͘ jîn-bîn siū chai-hāi.”

5Ông kā in kóng, “Góa kā lín kóng, góa kā i kau hō͘ lín; lín án-chóaⁿ kā i chhú-lí, góa bōe kā lín hoán-tùi.”

6In chiū kā Iâ-lī-bí lia̍h--khí-lâi, ēng soh-á kā i lūi lo̍h-khì ông-chú Má-ki-ngá tī hō͘-ōe-tūi ê tiâⁿ ê thiok-chúi-tî. Chit-ê thiok-chúi-tî bô chúi, chí-ū thô͘-bê. Iâ-lī-bí chiū hām tī thô͘-bê lāi-bīn.

7 Se-tí-ka-ông tī Piān-ngá-bín-mn̂g teh chhú-lí àn-kiāⁿ ê sî, ông-kiong lāi-bīn ê thài-kàm Kó͘-si̍t-lâng Í-pek Bí-le̍k thiaⁿ-tio̍h lâng kā Iâ-lī-bí lūi lo̍h-khì thiok-chúi-tî,

8chiū chhut ông-kiong khì tùi ông pò-kò,

9“Góa ê chú, góa ê ông, hiah-ê lâng án-ni chhú-lí sian-ti Iâ-lī-bí ū khah kè-hūn. In kā i pàng lo̍h-khì thiok-chúi-tî; i ōe gō--sí, in-ūi siâⁿ-lāi í-keng bô niû-si̍t lah.”

10Ông chiū bēng-lēng Kó͘-si̍t-lâng Í-pek Bí-le̍k, kóng, “Lí tùi chia chhōa saⁿ-cha̍p ê lâng, thàn sian-ti Iâ-lī-bí iáu-bē sí, kā i tùi thiok-chúi-tî kiù--chhut-lâi.”

11Í-pek Bí-le̍k chiū chhōa hiah-ê lâng ji̍p-khì ông-kiong ê chhng-khò͘, the̍h chi̍t-kóa kū-saⁿ phòa-pò͘, ēng soh-á lūi lo̍h-khì thiok-chúi-tî lāi-bīn hō͘ Iâ-lī-bí.

12I kā Iâ-lī-bí kóng, “Lí ēng hiah-ê kū-saⁿ phòa-pò͘ hē tī soh-á téng-bīn, gia̍p tī lí ê koh-ē-khang.” Iâ-lī-bí chiū chiàu án-ni chòe.

13Án-ni, in chiū kā Iâ-lī-bí tùi thiok-chúi-tî khiú--khí-lâi. Iâ-lī-bí kè-sio̍k hō͘ lâng khu-liû tī hō͘-ōe-tūi ê tiâⁿ--ni̍h.

Se-tí-ka Chhéng-kàu Iâ-lī-bí

14 Se-tí-ka-ông phài lâng khì kā sian-ti Iâ-lī-bí chhōa-lâi Siōng Chú sèng-tiān tē-saⁿ ê mn̂g ê ji̍p-kháu, ông tùi Iâ-lī-bí kóng, “Ū chi̍t ê būn-tôe góa beh chhiáⁿ-mn̄g lí, lí tio̍h chiàu-si̍t kóng.”

15 Iâ-lī-bí tùi Se-tí-ka kóng, “Góa nā chiàu-si̍t kā lí kóng, lí it-tēng ōe kā góa thâi-sí. Góa kā lí khó͘-khǹg, lí mā bōe thiaⁿ.”

16 Se-tí-ka-ông chiū su-hā chiù-chōa kóng, “Góa kí chhòng-chō lán sìⁿ-miā éng-oa̍h ê Siōng Chú chiù-chōa, góa it-tēng bōe thâi lí, mā bōe kā lí kau hō͘ hiah-ê siàu-siūⁿ lí sìⁿ-miā ê lâng.”

17 Iâ-lī-bí chiū tùi Se-tí-ka-ông kóng, “Siōng Chú — Bān-kun ê Thóng-sòe, Í-sek-lia̍t ê Siōng-tè án-ni kóng: Lí nā chhut-khì tâu-hâng Pa-pí-lûn-ông ê chiong-kun, lí chiū ōe oa̍h, chit-ê siâⁿ mā bōe hō͘ in pàng-hé sio; lí kap lín choân-ke lóng ōe-tàng oa̍h--lo̍h-lâi.

18Lí nā m̄ tâu-hâng Pa-pí-lûn ê chiong-kun, chit-ê siâⁿ chiū ōe kau tī Pa-pí-lûn-lâng ê chhiú; in ōe kā siâⁿ pàng-hé sio; lí mā bōe-tàng thoat-lī in ê chhiú-thâu.”

19 Se-tí-ka-ông tùi Iâ-lī-bí kóng, “Góa chin kiaⁿ hiah-ê í-keng tâu-hâng Pa-pí-lûn ê Iû-tāi-lâng; kiaⁿ Pa-pí-lûn-lâng kā góa kau hō͘ in, in ōe kā góa hì-lāng lêng-jio̍k.”

20 Iâ-lī-bí kóng, “Pa-pí-lûn-lâng bōe kā lí kau hō͘ in lah! Chhiáⁿ lí tio̍h chiàu góa tùi lí kóng Siōng Chú ê ōe khì chòe, án-ni, lí chiū ōe pêng-an bô-sū, lí mā ōe oa̍h.

21Lí nā m̄ chhut-khì tâu-hâng, Siōng Chú í-keng án-ni chí-sī góa:

22Só͘-ū lâu tī ông-kiong ê kiong-lú ōe hō͘ lâng lia̍h-khì Pa-pí-lûn-ông ê chiong-kun hia. Hiah-ê kiong-lú ōe chí-chek lí, kóng:

Lí sìn-nāi ê pêng-iú siàn-tōng lí,

lí hō͘ in phiàn--khì;

in hō͘ lí ê kha hām-lo̍h lō͘-kô͘-bê,

chiū oa̍t-tńg-sin chòe in cháu.

23Lí ê pîn-hui kap hāu-siⁿ cha-bó͘-kiáⁿ lóng ōe hō͘ lâng lia̍h-khì Pa-pí-lûn, lí mā bōe-tàng tô-thoat. Lí beh hō͘ Pa-pí-lûn-ông lia̍h--khì, chit-ê siâⁿ mā ōe hō͘ lâng pàng-hé sio.”

24 Se-tí-ka-ông kā Iâ-lī-bí kóng, “Lí bōe-ēng-tit hō͘ lâng chai-iáⁿ lán kóng-ōe ê lōe-iông, án-ni lí chiū bōe sí.

25Nā ū koaⁿ-oân chai-iáⁿ góa ū kap lí kóng-ōe, in lâi mn̄g lí, kóng, ‘Lí kā ông kóng sím-mi̍h? Ông kā lí kóng sím-mi̍h? Lí tio̍h chiàu-si̍t kā goán kóng, nā bô, goán beh kā lí thâi--sí.’

26Lí tio̍h kā in kóng, ‘Góa kan-ta chhéng-kiû ông m̄-thang kā góa sàng tò-khì Iok-ná-tan ê chhù, chiah bián góa sí tī hia.’”

27Āu-lâi, só͘-ū ê koaⁿ-oân kó-jiân lâi mn̄g Iâ-lī-bí; i chiū chiàu ông ê hoan-hù kā in tap-ho̍k. Hiah-ê koaⁿ-oân bô koh tui-mn̄g, in-ūi tāi-chì lóng bô lāu-sia̍p--chhut-khì.

28Án-ni, Iâ-lī-bí kè-sio̍k koaiⁿ tī hō͘-ōe-tūi ê tiâⁿ--ni̍h, koaiⁿ kàu Iâ-lō͘-sat-léng siū kong-chiàm hit-ji̍t.

Iâ-lī-bí-su 38 - 現代台語譯本羅馬字版(TTVR)-闽南语

Learn More About Us