Ngá-ko 6

Ngá-ko 6 - 現代台語譯本羅馬字版(TTVR)-闽南语

(Iâ-lō͘-sat-léng ê Cha-bó͘ Gín-á)

1Lí chit-ê cha-bó͘ gín-á tiong siōng-súi--ê ah,

lí chhin-ài--ê khì tó-ūi?

Lí chhin-ài--ê oa̍t-tńg khì tó-ūi?

Goán thang kap lí chòe-hé khì chhē.

(Lú)

2Góa chhin-ài--ê lo̍h-khì i ê hn̂g,

khì chhèng-chhut phang-bī ê hoe-hn̂g;

i tī hn̂g-lāi chhī iûⁿ,

koh bán pek-ha̍p-hoe.

3Góa sio̍k góa chhin-ài--ê, góa chhin-ài--ê mā sio̍k góa;

i tī pek-ha̍p-hoe tiong teh chhī iûⁿ.

Tē-gō͘ Siú(Lâm)

4Góa ê ài-jîn ah, lí súi chhin-chhiūⁿ Tek-sat,

khó-ài chhin-chhiūⁿ Iâ-lō͘-sat-léng,

ui-gî chhin-chhiūⁿ gia̍h tōa-kî ê kun-tūi.

5Lí ê ba̍k-chiu m̄-thang khòaⁿ góa,

in-ūi ōe toa̍t góa ê sim.

Lí ê thâu-mn̂g chhin-chhiūⁿ kui-kûn ê soaⁿ-iûⁿ,

tùi Ki-lia̍t ê soaⁿ-phiâⁿ tiô--lo̍h-lâi.

6Lí ê chhùi-khí chhin-chhiūⁿ kui-kûn ê iûⁿ-bú,

sóe chheng-khì tùi chúi--ni̍h peh--khí-lâi;

ta̍k-chiah lóng siⁿ siang-siⁿ,

bô chi̍t chiah phah-sńg.

7Lí ê pìn-piⁿ tī phè ê lāi-bīn,

chhin-chhiūⁿ peh-khui ê sia̍h-liû.

8Chiū-sī-kóng ū la̍k-cha̍p ê ông-hō͘, poeh-cha̍p ê pîn-hui,

koh ū sǹg bōe liáu ê kiong-lú,

9lí sī góa î-it sûn-choân ê hún-chiáu,

sī lāu-bú to̍k-siⁿ,

te̍k-pia̍t thiàⁿ-sioh ê cha-bó͘-kiáⁿ.

Cha-bó͘ gín-á khòaⁿ--tio̍h, lóng kóng i ū hok-khì;

ông-hō͘ pîn-hui mā chheng-chàn i.

10Kong-chhái chhin-chhiūⁿ chheng-chá ê kng,

súi chhin-chhiūⁿ ge̍h, chhàn-lān chhin-chhiūⁿ ji̍t,

ui-gî chhin-chhiūⁿ gia̍h tōa-kî ê kun-tūi, hit-ê sī siáⁿ-lâng?

11Góa lo̍h-khì hu̍t-thô-hn̂g,

beh khòaⁿ soaⁿ-kok tiong ê ké-chí,

khòaⁿ phû-tô hoat-íⁿ á bē,

sia̍h-liû khui-hoe á bē.

12Put-ti-put-kak, góa ná chhin-chhiūⁿ chē tī chun-kùi ê lâng ê bé-chhia téng.

(Iâ-lō͘-sat-léng ê Cha-bó͘ Gín-á)

13Thiàu ah, Su-la-bi̍t, thiàu!

Se̍h--kè-lâi, se̍h--kè-khì, hō͘ goán khòaⁿ lí teh thiàu-bú.

(Lú)

Lín ná teh khòaⁿ Su-la-bi̍t,

chhin-chhiūⁿ teh khòaⁿ nn̄g tūi ê peng thiàu-bú?

Ngá-ko 6 - 現代台語譯本羅馬字版(TTVR)-闽南语

Learn More About Us