Si-phian 42 - 現代台語譯本羅馬字版(TTVR)-闽南语

TĒ-JĪ KOÀN (42-72 phiⁿ)Khó-la hō͘-tāi kà-sī ê si, kau hō͘ sèng-ga̍k-tiúⁿ.Liû-bông-chiá ê Kî-tó

1Siōng-tè ah, góa ê sim pek-chhiat him-bō͘ lí,

chhin-chhiūⁿ lo̍k pek-chhiat him-bō͘ khoe-chúi.

2Góa ê sim chhùi-ta him-bō͘ Siōng-tè, éng-oa̍h ê Siōng-tè;

góa sím-mi̍h sî ōe-tàng kàu Siōng-tè bīn-chêng khì tiâu-kìⁿ?

3Góa mî-ji̍t ēng ba̍k-sái chún pn̄g thun;

góa ê tùi-te̍k it-ti̍t mn̄g góa, “Lí ê Siōng-tè tī tó-ūi?”

4Góa chá-chêng chhōa chèng-lâng chòe-tīn khì Siōng-tè ê chhù,

ēng hoaⁿ-hí chheng-chàn ê siaⁿ tāi-ke siú-choeh.

Góa tui-liām chiah-ê tāi-chì,

sim hui-siông pi-siong.

5Góa ê sim ah, lí sī-án-chóaⁿ ut-chut,

sī-án-chóaⁿ tī góa lāi-bīn haiⁿ-haiⁿ-chhan?

Tio̍h gióng-bōng Siōng-tè;

góa iáu-kú beh chheng-chàn I,

in-ūi I sī góa ê Chín-kiù-chiá, góa ê Siōng-tè.

6Góa ê sim tī góa lāi-bīn ut-chut,

só͘-í góa beh tùi Iok-tàn ê tōe, Hek-bûn, Bí-sat ê soaⁿ siàu-liām lí.

7Lí ê pho̍k-pò͘ chhut-siaⁿ, chhim-ian kap chhim-ian saⁿ ho͘-èng;

lí ê pho-lōng, lí ê tōa-éng im-ba̍t góa.

8Ji̍t--sî, Siōng Chú si-lo̍h I ê chû-ài;

mî--sî, I hō͘ góa chhiùⁿ-koa,

tùi sù góa oa̍h-miā ê Siōng-tè kî-kiû.

9Góa beh tùi Siōng-tè — góa ê chio̍h-pôaⁿ kóng,

“Lí sī-án-chóaⁿ bōe-kì-tit góa?

Góa sī-án-chóaⁿ tio̍h in-ūi tùi-te̍k ê ap-pek pi-siong kiâⁿ-lâi-kiâⁿ-khì?”

10Góa ê tùi-te̍k khi-hū góa, phah-chhùi góa ê kut-thâu;

in it-ti̍t mn̄g góa, “Lí ê Siōng-tè tī tó-ūi?”

11Góa ê sim ah, lí sī-án-chóaⁿ ut-chut,

sī-án-chóaⁿ tī góa lāi-bīn haiⁿ-haiⁿ-chhan?

Tio̍h gióng-bōng Siōng-tè;

góa iáu-kú beh chheng-chàn I,

in-ūi I sī góa ê Chín-kiù-chiá, góa ê Siōng-tè.

Learn More About Us