Lī-bī-kì 4

Lī-bī-kì 4 - 現代台語譯本羅馬字版(TTVR)-闽南语

Sio̍k-chōe-chè

1Siōng Chú koh bēng-lēng Mô͘-se

2tio̍h tùi Í-sek-lia̍t-lâng soan-pò͘:

Nā ū lâng bô-ì-tiong hoān-chōe, ûi-hoān jīm-hô chi̍t hāng Siōng Chú só͘ bēng-lēng bōe-ēng-tit chòe ê sū, i tio̍h chiàu ē-bīn ê tiâu-lē pān-lí:

3Tōa-chè-si nā hoān-chōe, liân-lūi jîn-bîn, chiū tio̍h in-ūi só͘ hoān ê chōe ēng bô hâ-chhû ê gû-káng-á hiàn hō͘ Siōng Chú chòe sio̍k-chōe-chè.

4I tio̍h kā hit-chiah gû-káng-á khan-lâi Siōng Chú ê hōe-bō͘ mn̂g-kháu, hōaⁿ-chhiú tī gû-káng-á ê thâu-khak téng, tī Siōng Chú ê bīn-chêng kā thâi.

5Tōa-chè-si tio̍h kā chi̍t-kóa gû-káng-á ê huih the̍h-lâi hōe-bō͘,

6ēng chńg-thâu-á ùn huih, tī Siōng Chú ê bīn-chêng tùi sèng-só͘ ê tiùⁿ-lî hiù chhit piàn.

7I koh tio̍h ēng chi̍t-kóa huih, tī Siōng Chú ê bīn-chêng boah tī hōe-bō͘ lāi hiuⁿ-tôaⁿ ê sì ki khiàu--khí-lâi ê kak; jiân-āu chiong gû-káng-á chhun ê huih lóng tò tī hōe-bō͘ mn̂g-kháu hiàn sio-hòa-chè ê chè-tôaⁿ kha.

8I tio̍h tùi hit-chiah sio̍k-chōe-chè ê gû-káng-á chhú iû, chiū-sī chiong pak-lāi kap i téng-bīn ê iû,

9nn̄g lia̍p io-chí kap in piⁿ--á ê iû, í-ki̍p koaⁿ kap i ê bāng-se lóng the̍h--khí-lâi,

10kap tùi pêng-an-chè ê gû-káng-á the̍h--khí-lâi ê choh-hoat kâng-khoán. I tio̍h chiong chiah-ê hē tī hiàn sio-hòa-chè ê chè-tôaⁿ téng sio.

11Gû-káng-á ê phê, só͘-ū ê bah, í-ki̍p i ê thâu, thúi, pak-lāi, kap pùn,

12chiū-sī kui-chiah gû-káng-á, tio̍h tòa chhut-khì iâⁿ-gōa teh piàⁿ hé-hu, lé-gî-siōng chheng-khì ê só͘-chāi, hē tī teh to̍h ê chhâ téng-bīn sio.

13 Í-sek-lia̍t choân-thé hōe-chiòng nā bô-ì-tiong hoān-chōe, ûi-hoān jīm-hô chi̍t hāng Siōng Chú só͘ bēng-lēng bōe-ēng-tit chòe ê sū, m̄-kú hōe-chiòng iáu-bē hoat-kiàn,

14kàu in chi̍t-ē chai ka-kī ū hoān-chōe, chiū tio̍h khan chi̍t chiah gû-káng-á lâi kàu hōe-bō͘ mn̂g-kháu hiàn chòe sio̍k-chōe-chè.

15Hōe-chiòng ê tiúⁿ-ló tio̍h tī Siōng Chú ê bīn-chêng, hōaⁿ-chhiú tī hit-chiah gû-káng-á ê thâu-khak téng, tī hōe-bō͘ mn̂g-kháu kā thâi.

16Tōa-chè-si tio̍h kā chi̍t-kóa gû-káng-á ê huih tòa-lâi hōe-bō͘,

17ēng chńg-thâu-á ùn huih, tī Siōng Chú ê bīn-chêng tùi sèng-só͘ ê tiùⁿ-lî hiù chhit piàn.

18I koh tio̍h ēng chi̍t-kóa huih, tī Siōng Chú ê bīn-chêng boah tī hōe-bō͘ lāi hiuⁿ-tôaⁿ ê sì ki khiàu--khí-lâi ê kak; jiân-āu chiong chhun ê huih lóng tò tī hōe-bō͘ mn̂g-kháu hiàn sio-hòa-chè ê chè-tôaⁿ kha.

19I tio̍h chiong só͘-ū ê iû the̍h--khí-lâi, hē tī chè-tôaⁿ téng sio.

20Chit-chiah gû-káng-á chhú-lí ê hong-hoat, kap ūi-tio̍h tōa-chè-si sio̍k-chōe hit-chiah gû-káng-á ê choh-hoat kâng-khoán; tōa-chè-si tio̍h án-ni thòe in sio̍k-chōe, in chiū beh tit-tio̍h sià-bián.

21Chè-si tio̍h chiong gû-káng-á tòa chhut-khì iâⁿ-gōa sio, chhin-chhiūⁿ sio thâu chi̍t chiah gû-káng-á án-ni. Che sī hōe-chiòng ê sio̍k-chōe-chè.

22Nā ū koaⁿ-tiúⁿ bô-ì-tiong hoān-chōe, ûi-hoān jīm-hô chi̍t hāng Siōng Chú — i ê Siōng-tè só͘ bēng-lēng bōe-ēng-tit chòe ê sū,

23kàu i chi̍t-ē chai ka-kī ū hoān-chōe, chiū tio̍h khan chi̍t chiah bô hâ-chhû ê soaⁿ-iûⁿ-káng chòe chè-mi̍h.

24I tio̍h tī Siōng Chú ê bīn-chêng, hōaⁿ-chhiú tī soaⁿ-iûⁿ-káng ê thâu-khak téng, tī thâi sio-hòa-chè ê cheng-siⁿ ê só͘-chāi thâi hit-chiah soaⁿ-iûⁿ-káng. Che sī sio̍k-chōe-chè.

25Chè-si tio̍h ēng chńg-thâu-á ùn sio̍k-chōe-chè ê huih, boah tī hiàn sio-hòa-chè ê chè-tôaⁿ sì ki khiàu--khí-lâi ê kak, koh chiong chhun ê huih lóng tò tī hiàn sio-hòa-chè ê chè-tôaⁿ kha.

26Iûⁿ-káng-á só͘-ū ê iû tio̍h hē tī tôaⁿ-téng sio, kap chhú-lí pêng-an-chè ê iû ê choh-hoat kâng-khoán; chè-si án-ni ūi hit-ê lâng sio̍k-chōe, i chiū tit-tio̍h sià-bián.

27Tòa tī chit-ê tōe ê jîn-bîn nā ū lâng bô-ì-tiong hoān-chōe, ûi-hoān jīm-hô chi̍t hāng Siōng Chú só͘ bēng-lēng bōe-ēng-tit chòe ê sū,

28kàu i chi̍t-ē chai ka-kī ū hoān-chōe, chiū tio̍h ūi-tio̍h i ê chōe, hiàn chi̍t chiah bô hâ-chhû ê soaⁿ-iûⁿ-bú chòe chè-mi̍h.

29I tio̍h hōaⁿ-chhiú tī hit-chiah sio̍k-chōe cheng-siⁿ ê thâu-khak téng, tī thâi sio-hòa-chè ê cheng-siⁿ ê só͘-chāi thâi hit-chiah sio̍k-chōe ê cheng-siⁿ.

30Chè-si tio̍h ēng chńg-thâu-á ùn soaⁿ-iûⁿ-bú ê huih, boah tī hiàn sio-hòa-chè ê chè-tôaⁿ sì ki khiàu--khí-lâi ê kak; chhun ê huih lóng tio̍h tò tī chè-tôaⁿ kha.

31Hōng-hiàn ê lâng tio̍h chiong só͘-ū ê iû the̍h--khí-lâi, kap the̍h pêng-an-chè cheng-siⁿ ê iû kâng-khoán. Chè-si tio̍h tī tôaⁿ-téng sio hiah-ê iû, chòe phang-phang ê chè-mi̍h hiàn hō͘ Siōng Chú. Chè-si án-ni ūi hit-ê lâng sio̍k-chōe, i chiū tit-tio̍h sià-bián.

32Lâng nā beh hiàn mî-iûⁿ chòe sio̍k-chōe-chè ê chè-mi̍h, tio̍h hiàn chi̍t chiah bô hâ-chhû bú ê mî-iûⁿ.

33I tio̍h hōaⁿ-chhiú tī hit-chiah sio̍k-chōe cheng-siⁿ ê thâu-khak téng, tī thâi sio-hòa-chè ê cheng-siⁿ ê só͘-chāi thâi hit-chiah sio̍k-chōe ê cheng-siⁿ.

34Chè-si tio̍h ēng chńg-thâu-á ùn mî-iûⁿ-bú ê huih, boah tī hiàn sio-hòa-chè ê chè-tôaⁿ sì ki khiàu--khí-lâi ê kak; chhun ê huih lóng tio̍h tò tī chè-tôaⁿ kha.

35Hōng-hiàn ê lâng tio̍h chiong só͘-ū ê iû lóng the̍h--khí-lâi, kap the̍h pêng-an-chè cheng-siⁿ ê iû kâng-khoán. Chè-si tio̍h tī tôaⁿ-téng ēng hé sio hiah-ê iû chòe chè-mi̍h, hiàn hō͘ Siōng Chú. Chè-si án-ni ūi hit-ê lâng sio̍k-chōe, i chiū tit-tio̍h sià-bián.

Lī-bī-kì 4 - 現代台語譯本羅馬字版(TTVR)-闽南语

Learn More About Us