Lia̍t-ông-kì Hā-koàn 9

Lia̍t-ông-kì Hā-koàn 9 - 現代台語譯本羅馬字版(TTVR)-闽南语

Soán-li̍p Iâ-hō͘ Chòe Í-sek-lia̍t-ông

1Sian-ti Í-lī-sa kiò chi̍t ê sian-ti ê ha̍k-seng lâi, kā i kóng, “Lí tio̍h chún-pī chhut-hoat, the̍h chit-pân iû, khì Ki-lia̍t ê La-boa̍t.

2Kàu hia, tio̍h chhē Lêng-sī ê sun, Iok-sa-hoat ê kiáⁿ Iâ-hō͘, tùi i tâng-phōaⁿ ê tiong-kan chhiáⁿ i chhut--lâi, chhōa i ji̍p lāi-pâng;

3chiong pân-lāi ê iû tò tī i ê thâu-khak, kóng, ‘Siōng Chú án-ni kóng: Góa soán-li̍p lí chòe Í-sek-lia̍t ê ông.’ Liáu-āu lí tio̍h khui-mn̂g, kóaⁿ-kín tô-cháu.”

4Chit-ê siàu-liân ê sian-ti chiū khì Ki-lia̍t ê La-boa̍t.

5I kàu hia, khòaⁿ-tio̍h chèng kun-koaⁿ chòe-hé chē tī hia; i chiū kóng, “Chiong-kun, góa ū tāi-chì beh kā lí kóng.”

Iâ-hō͘ kóng, “Lí beh kā goán tó chi̍t ê kóng?”

Siàu-liân-lâng ìn kóng, “Chiong-kun, chiū-sī lí.”

6Iâ-hō͘ chiū khí--lâi, ji̍p-khì chhù-lāi; siàu-liân-lâng ēng iû tò tī i ê thâu-khak, tùi i kóng, “Siōng Chú — Í-sek-lia̍t ê Siōng-tè án-ni kóng, ‘Góa soán-li̍p lí chòe Siōng Chú ê chú-bîn Í-sek-lia̍t ê ông.

7Lí tio̍h thâi-sí lí ê chú-lâng A-hap choân-ke, hō͘ góa thang pò-ho̍k Iâ-sé-phek lâu Siōng Chú ê po̍k-jîn chèng sian-ti kap kî-tha só͘-ū po̍k-jîn ê huih.

8A-hap choân-ke lóng tio̍h bia̍t-bông; só͘-ū tī Í-sek-lia̍t tiong sio̍k A-hap ê ta-po͘-lâng, bô-lūn sī chū-iû--ê á-sī bô chū-iû--ê, góa lóng beh kā in siau-bia̍t.

9Góa beh hō͘ A-hap ê ke kap Nî-pat ê kiáⁿ Iâ-lô-pho-an ê ke kâng-khoán, mā kap A-hi-ngá ê kiáⁿ Pa-sa ê ke kâng-khoán.

10Káu beh tī Iâ-su-lia̍t ê chhân-hn̂g chia̍h Iâ-sé-phek, mā bô lâng kā i bâi-chòng.’” Siàu-liân-lâng chiū khui-mn̂g tô-cháu.

11 Iâ-hō͘ chhut--khì, lâi kàu i chú-lâng ê kun-koaⁿ hia; ū chi̍t ê mn̄g i kóng, “Kiám ū sím-mi̍h tāi-chì? Sī-án-chóaⁿ chit-ê siáu--ê lâi chhē lí?”

I kā in kóng, “Lín bat hit-ê lâng, mā chai i ōe kóng sím-mi̍h.”

12In kóng, “Mài phiàn--goán, lí tio̍h kā goán kóng.”

Iâ-hō͘ ìn kóng, “I kā góa kóng, ‘Siōng Chú án-ni kóng: Góa soán-li̍p lí chòe Í-sek-lia̍t ê ông.’”

13In ta̍k-ê lâng kóaⁿ-kín ēng ka-kī ê gōa-saⁿ pho͘ tī kiā-á ê téng-chàn, hō͘ Iâ-hō͘ khiā tī téng-bīn. In pûn sàu-kak soan-pò͘ kóng, “Iâ-hō͘ choh-ông lah!”

Í-sek-lia̍t-ông Iok-hô-lân Siū Sat-hāi

14Án-ni Lêng-sī ê sun, Iok-sa-hoat ê kiáⁿ Iâ-hō͘ pōe-poān Iok-hô-lân. Iok-hô-lân kap Í-sek-lia̍t kun-peng bat hông-siú Ki-lia̍t ê La-boa̍t, in-ūi Sū-lī-a-ông Hap-sih kong-kek Í-sek-lia̍t.

15Āu-lâi, Iok-hô-lân-ông tò-khì Iâ-su-lia̍t, beh i-tī i kap Sū-lī-a-ông Hap-sih kau-chiàn ê sî siū ê siong. Iâ-hō͘ tùi hiah-ê kun-koaⁿ kóng, “Kì-jiân lín ióng-hō͘ góa choh-ông, tio̍h m̄-thang hō͘ lâng tô-cháu khì Iâ-su-lia̍t pò siau-sit.”

16Iâ-hō͘ chiū sái chiàn-chhia khì Iâ-su-lia̍t, in-ūi Iok-hô-lân iáu tó tī chhn̂g--ni̍h. Iû-tāi-ông A-hap-siā í-keng khì tī hia thàm-hóng Iok-hô-lân.

17Ū chi̍t ê siú-bōng--ê khiā tī Iâ-su-lia̍t siâⁿ-chhiûⁿ téng ê siú-bōng-tâi, khòaⁿ-tio̍h Iâ-hō͘ ê kun-tūi lâi, chiū kóng, “Góa khòaⁿ-tio̍h chi̍t tīn kun-tūi.”

Iok-hô-lân kóng, “Phài chi̍t ê bé-peng khì chiap i, sòa mn̄g i kóng, ‘Ū pêng-an--bô?’”

18Hit-ê bé-peng khì gêng-chiap Iâ-hō͘, kóng, “Ông teh mn̄g, ū pêng-an--bô?”

Iâ-hō͘ kóng, “Pêng-an bô pêng-an, bô lí ê tāi-chì. Tè góa āu-bīn!”

Siú-bōng--ê pò-kò ông, kóng, “Sù-chiá kàu in hia, soah bô tò-tńg--lâi.”

19Ông koh phài chi̍t ê bé-peng khì. I kàu in hia, kóng, “Ông teh mn̄g, ū sūn-lī--bô?”

Iâ-hō͘ kóng, “Sūn-lī bô sūn-lī, bô lí ê tāi-chì. Tè góa āu-bīn!”

20Siú-bōng--ê pò-kò ông kóng, “I khì in hia, mā bô tò-tńg--lâi; sái-chhia--ê chhiong chin hiông, khòaⁿ--khí-lâi ná-chhin-chhiūⁿ sī Lêng-sī ê sun Iâ-hō͘.”

21 Iok-hô-lân chiū kóng, “Chún-pī chiàn-chhia.” In chiū kā i chún-pī. Í-sek-lia̍t-ông Iok-hô-lân kap Iû-tāi-ông A-hap-siā chē ka-kī ê chiàn-chhia, chhut-khì kìⁿ Iâ-hō͘; in tī Iâ-su-lia̍t-lâng Ná-pek ê hn̂g tú-tio̍h i.

22 Iok-hô-lân khòaⁿ-tio̍h Iâ-hō͘ chiū kóng, “Iâ-hō͘, ū pêng-an--bô?”

Iâ-hō͘ ìn kóng, “Lí ê lāu-bú Iâ-sé-phek ê îm-hēng siâ-su̍t iáu hiah chōe, ná ōe pêng-an?”

23 Iok-hô-lân chiū kā chhia se̍h hoan-thâu tô-cháu, tùi A-hap-siā hoah kóng, “A-hap-siā, hoán lah, hoán lah.”

24Iâ-hō͘ chhut-la̍t khui keng, siā-tio̍h Iok-hô-lân ê ka-chiah-phiaⁿ, chìⁿ tùi i ê sim-chōng thàng--chhut-khì. I chiū lek--lo̍h-khì, sí tī chhia-lāi.

25Iâ-hō͘ tùi i ê kun-koaⁿ Pit-kah kóng, “Kā i hiat tī Iâ-su-lia̍t-lâng Ná-pek ê hn̂g--ni̍h. Lí tio̍h ōe-kì-tit lí kap góa chòe-hé chē-chhia tè i ê lāu-pē A-hap ê sî, Siōng Chú tùi A-hap ê ū-giân.

26Siōng Chú ū kóng, ‘Góa chā-hng ū khòaⁿ-kìⁿ Ná-pek kap i ê kiáⁿ-jî ê huih. Góa li̍p-sè, góa beh tī chit-khu hn̂g pò-èng A-hap.’ Taⁿ tio̍h chiàu Siōng Chú ê ōe chiong Iok-hô-lân hiat tiàm chit-khu hn̂g.”

Iû-tāi-ông A-hap-siā Siū Sat-hāi

27 Iû-tāi-ông A-hap-siā khòaⁿ-tio̍h án-ni, chiū ǹg Pek Hap-kan ê lō͘ tô-cháu. Iâ-hō͘ jip i, hoah kóng, “Mā tio̍h kā phah-sí.” Chiap-kūn Í-pek-liân chiūⁿ Ko͘-ní ê soaⁿ-phiâⁿ ê sî, A-hap-siā tī chhia-lāi siū phah-siong. I tô-cháu khì Bí-kiat-to, chiū sí tī hia.

28I ê jîn-sîn ēng chhia kā i ê si-thé chài-khì Iâ-lō͘-sat-léng, kā i an-chòng tī Tāi-pi̍t-siâⁿ i ka-kī ê bōng, kap i ê lia̍t-chó͘ chòe-hé.

29 A-hap-siā chòe Iû-tāi-ông ê sî, sī tī A-hap ê kiáⁿ Iok-hô-lân cha̍p-it nî.

Iâ-sé-phek Ông-hō͘ Siū Thâi-sí

30 Iâ-hō͘ kàu Iâ-su-lia̍t, Iâ-sé-phek thiaⁿ--kìⁿ, chiū soe-chng-táⁿ-pān, tùi thang-á khòaⁿ gōa-bīn.

31Iâ-hō͘ ji̍p-siâⁿ ê sî, Iâ-sé-phek tùi i kóng, “Thâi-sí chú-lâng ê Sim-lī

, lí ū pêng-an--bô?”

32 Iâ-hō͘ gia̍h-thâu ǹg thang-á khòaⁿ, kóng, “Ióng-hō͘ góa ê lâng tī tó-ūi?” Ū nn̄g saⁿ ê thài-kàm tùi thang-á àⁿ-teh khòaⁿ i.

33Iâ-hō͘ kóng, “Kā i hiat--lo̍h-lâi.” In chiū chiong Iâ-sé-phek hiat--lo̍h-khì; i ê huih phùn-tio̍h chhiûⁿ-piah kap bé; Iâ-hō͘ sái chiàn-chhia kā i ê si-thé kauh--kè.

34Iâ-hō͘ ji̍p--khì, ia̍h-chia̍h-ia̍h-lim, kóng, “Lín khì chhú-lí hit-ê siū chiù-chó͘ ê hū-jîn-lâng, sòa kā i bâi-chòng, in-ūi i mā-sī ông ê cha-bó͘-kiáⁿ.”

35M̄-kú in khì beh kā i bâi-chòng, kan-ta chhē-tio̍h i ê thâu-khak kap kha chhiú ê kut-thâu.

36In tò-lâi kā Iâ-hō͘ pò-kò, i chiū kóng, “Che tú-tú chiàu Siōng Chú thong-kè i ê po̍k-jîn Thê-su-pí-lâng Í-lī-a só͘ kóng ê ōe, ‘Káu beh tī Iâ-su-lia̍t ê chhân-hn̂g chia̍h Iâ-sé-phek ê bah.

37Iâ-sé-phek ê sin-si tī Iâ-su-lia̍t ê chhân-hn̂g ōe kap pùn siâng-khoán, bô lâng jīn ōe chhut.’”

Lia̍t-ông-kì Hā-koàn 9 - 現代台語譯本羅馬字版(TTVR)-闽南语

Learn More About Us