Sin-bēng-kì 25

Sin-bēng-kì 25 - 現代台語譯本羅馬字版(TTVR)-闽南语

1Lâng nā ū cheng-chip, thê-chhut sò͘-siōng, sím-phòaⁿ-koaⁿ tio̍h tēng chèng-ti̍t--ê chòe bô-chōe, tēng choh-pháiⁿ--ê chòe ū-chōe;

2ū-chōe ê lâng nā eng-kai siū-phah, tio̍h hō͘ hit-ê lâng tī sím-phòaⁿ-koaⁿ ê bīn-chêng phak tī thô͘-kha, chiàu i hoān-chōe ê thêng-tō͘ kā i phah;

3m̄-kú siōng chōe thang phah sì-cha̍p ē, m̄-thang phah kè-thâu; nā chhiau-kè sì-cha̍p ē, chiū-sī bú-jio̍k chit-ê hiaⁿ-tī.

4Gû teh lún ngó͘-kok, m̄-thang kā i kòa chhùi-lam.

Ūi Kè-sin ê Hiaⁿ-tī Thoân-chong-chiap-tāi

5Hiaⁿ-tī tòa chòe-hé, nā kî-tiong chi̍t ê bô kiáⁿ chiū sí, kè-sin ê lâng ê bó͘ m̄-thang kè gōa-lâng, i tiōng-hu ê hiaⁿ-tī tio̍h chhōa i choh-bó͘, kap i tâng-pâng, chīn hiaⁿ-tī ê pún-hūn.

6I siⁿ ê tōa-kiáⁿ, tio̍h sòa-chiap i sí--khì ê tiōng-hu ê bêng-hūn, chiah bián hit-ê tiōng-hu ê miâ tī Í-sek-lia̍t tiong siū tû--khì.

7Hit-ê lâng nā bô beh chhōa i sí--khì ê hiaⁿ-tī ê bó͘, hit-ê hū-jîn-lâng chiū tio̍h khì kóng-tiûⁿ ê tiúⁿ-ló hia, tùi in kóng, “Góa tiōng-hu ê hiaⁿ-tī m̄-khéng tī Í-sek-lia̍t tiong kā i sí--khì ê hiaⁿ-tī lâu hō͘-sû, bô beh chīn hiaⁿ-tī ê pún-hūn.”

8Tī kóng-tiûⁿ ê tiúⁿ-ló tio̍h kiò hit-ê lâng lâi, kā i khó͘-khǹg; i nā kian-chhî bô beh kā chhōa,

9hit-ê hū-jîn-lâng tio̍h tī tiúⁿ-ló ê bīn-chêng kiâⁿ-óa i, kā thǹg-ôe, koh phùi chhùi-nōa tī i ê bīn, kóng, “Só͘-ū bô beh ūi-tio̍h hiaⁿ-tī lâu hō͘-sû ê lâng, tio̍h án-ni kā bú-jio̍k.”

10Tī Í-sek-lia̍t-lâng ê tiong-kan, hit-ê lâng ê ka-têng beh kiò-chòe “Hō͘ lâng thǹg-ôe ê ke”.

Kî-tha ê Tiâu-lē

11Nā ū nn̄g ê lâng sio-phah, kî-tiong chi̍t ê lâng ê bó͘ óa-lâi kiù i ê tiōng-hu, chhun-chhiú lia̍h-tiâu lēng-gōa hit-ê lâng ê hā-thé,

12chiū tio̍h chām-tn̄g hit-ê hū-jîn-lâng ê chhiú, m̄-thang khó-lîn i.

13Lín ê tē-á lāi m̄-thang ū tōa-lia̍p kap sòe-lia̍p ê nn̄g khoán chhìn-thûi;

14chhù-lāi mā m̄-thang ū tōa kap sòe ê nn̄g khoán táu.

15Tio̍h ēng chún-khak kong-tō ê chhìn-thûi kap táu, thang hō͘ lín tī Siōng Chú — lín ê Siōng-tè siúⁿ-sù lín ê tōe chia̍h tn̂g-hè-siū;

16só͘-ū chòe bô kong-tō ê tāi-chì ê lâng, lóng sī Siōng Chú — lín ê Siōng-tè só͘ iàm-ò͘ⁿ.

Tio̍h Siau-bia̍t A-má-le̍k-lâng

17Tio̍h ōe-kì-tit lín chhut Ai-ki̍p ê sî, A-má-le̍k-lâng tī lō͘--ni̍h án-chóaⁿ tùi-thāi lín.

18In tī lō͘--ni̍h kong-kek lín; tng-tán lín ià-siān bô-la̍t ê sî, kong-kek lín āu-bīn loán-jio̍k ê lâng; in lóng bô teh kiaⁿ Siōng-tè.

19Só͘-í, kàu Siōng Chú — lín ê Siōng-tè kiù lín thoat-lī sì-ûi ê tùi-te̍k, hō͘ lín chiàm-léng I siúⁿ-sù lín ê tōe, hióng-siū thài-pêng, hit-sî, lín tio̍h chiong A-má-le̍k ê miâ, tùi thiⁿ-ē chhat-siau. M̄-thang bōe-kì--tit!

Sin-bēng-kì 25 - 現代台語譯本羅馬字版(TTVR)-闽南语

Learn More About Us