Si-phian 115 - 現代台語譯本羅馬字版(TTVR)-闽南语

To̍k-it ê Chin Sîn Siōng-tè

1Siōng Chú ah, êng-kng chí-ū kui hō͘ lí, chí-ū kui hō͘ lí,

in-ūi lí ê chû-ài kap sìn-si̍t, goān êng-kng kui hō͘ lí.

2Lí ná beh hō͘ gōa-pang-lâng kóng,

“In ê Siōng-tè tī tó-ūi?”

3Goán ê Siōng-tè tī thiⁿ-téng,

lóng chiàu I ê chí-ì chòe tāi-chì.

4In ê ngó͘-siōng sī lâng ê chhiú

ēng gûn, ēng kim chù-chō--ê;

5in ū chhùi, bōe kóng-ōe;

ū ba̍k-chiu, mā bōe khòaⁿ--kìⁿ.

6In ū hī-khang, bōe thiaⁿ--kìⁿ;

ū phīⁿ-khang, mā bōe phīⁿ--tio̍h.

7In ū chhiú, bōe the̍h;

ū kha, bōe kiâⁿ.

In mā bô ēng nâ-âu chhut-siaⁿ.

8Chō in--ê, óa-khò in--ê,

lóng kap in kâng-khoán.

9 Í-sek-lia̍t ah, tio̍h óa-khò Siōng Chú;

I sī lí ê pang-chān, lí ê tún-pâi.

10 A-lûn chè-si ê ke ah, tio̍h óa-khò Siōng Chú;

I sī lín ê pang-chān, lín ê tún-pâi.

11Lín kèng-ùi Siōng Chú ê lâng ah, tio̍h óa-khò Siōng Chú;

I sī lín ê pang-chān, lín ê tún-pâi.

12Siōng Chú koan-sim lán, beh sù-hok hō͘ lán,

beh sù hok-khì hō͘ Í-sek-lia̍t ê ke,

beh sù hok-khì hō͘ A-lûn chè-si ê ke.

13Kèng-ùi Siōng Chú ê lâng,

bô-lūn tōa-sòe, I beh sù-hok hō͘ in.

14Goān Siōng Chú ke-thiⁿ lín ê jîn-sò͘,

ke-thiⁿ lín kap lín ê kiáⁿ-sun.

15Goān chhòng-chō thiⁿ tōe ê Siōng Chú

sù hok-khì hō͘ lín.

16Thiⁿ chí-ū sio̍k Siōng Chú;

I chiong tōe sù hō͘ sè-kan-lâng.

17Sí-lâng bōe chheng-chàn Siōng Chú;

lo̍h-khì éng-oán chēng-be̍k ê só͘-chāi ê lâng mā lóng bōe.

18Chóng-sī goán beh chheng-chàn Siōng Chú,

tùi hiān-chāi ti̍t-kàu éng-oán.

Ha-lé-lú-iah, chheng-chàn Siōng Chú!

Learn More About Us