Í-sài-a-su 36

Í-sài-a-su 36 - 現代台語譯本羅馬字版(TTVR)-闽南语

Se-ná-ki-li̍p Ui-hia̍p Iâ-lō͘-sat-léng(2 Ông 18.13-37; 2 Tāi 32.1-19)

1 Hi-se-ka-ông tē-cha̍p-sì nî, A-su̍t-ông Se-ná-ki-li̍p chiūⁿ-lâi kong-kek Iû-tāi só͘-ū kian-kò͘ ê siâⁿ, koh kā in chiàm-léng.

2A-su̍t-ông tùi La-kiat phài chóng-su-lēng tòa tāi-kun khì Iâ-lō͘-sat-léng Hi-se-ka-ông hia. Chóng-su-lēng khiā tī Siōng-tî ê chúi-kau piⁿ, tī Phiò-pò͘-tiûⁿ ê tōa-lō͘ hia.

3Hit-sî, Hi-le̍k-ka ê kiáⁿ kiong-têng chóng-koán Í-lī-a-kèng, su-kì Sià-pek-ná, í-ki̍p A-sat ê kiáⁿ sú-koaⁿ Iok-a, chhut-lâi kìⁿ i.

4Chóng-su-lēng tùi in kóng, “Khì kā Hi-se-ka kóng, A-su̍t tāi-ông án-ni kóng, ‘Lí teh khò-sè sím-mi̍h?

5Lí siūⁿ-kóng ū chhek-lio̍k kap kun-le̍k, kî-si̍t sī phòng-hong ê ōe. Tàu-tóe lí sī khò siáⁿ-lâng, kèng-jiân káⁿ hoán-poān góa?

6Lí só͘ óa-khò ê Ai-ki̍p sī chi̍t ki tn̄g--khì ê lô͘-tek-á-koáiⁿ; lâng nā khò i, chhiú ōe hō͘ i chha̍k--ji̍p-khì. Só͘-ū óa-khò Ai-ki̍p-ông Hoat-ló ê lâng lóng ōe án-ni.

7Lín nā tùi góa kóng: Goán óa-khò Siōng Chú — goán ê Siōng-tè; Hi-se-ka kiám m̄-sī ū hòe-tû Siōng-tè ê soaⁿ-thâu-tôaⁿ kap chè-tôaⁿ, koh kā Iû-tāi kap Iâ-lō͘-sat-léng ê lâng kóng: Lín it-tēng tio̍h tī Iâ-lō͘-sat-léng chit-ê chè-tôaⁿ kèng-pài?’

8Taⁿ lâi, lâi kap góa ê chú-lâng A-su̍t-ông sio-su. Góa hō͘ lín nn̄g-chheng chiah bé, lín kiám ū hoat-tō͘ chhē kàu-gia̍h ê lâng thang khiâ?

9Nā bô hoat-tō͘, lín ná ōe-tàng phah-pāi góa ê chú siōng-sòe ê chi̍t ê pō͘-hā? Lín kiám beh koh óa-khò Ai-ki̍p ê chiàn-chhia kap bé-peng?

10Hiān-chāi, góa lâi kong-kek húi-bia̍t chit-ê thó͘-tōe, kiám m̄-sī Siōng Chú ê chí-ì? Siōng Chú chhin-sin kā góa kóng, ‘Chiūⁿ-khì kong-chhú chit-tè thó͘-tōe, kā i húi-bia̍t.’”

11 Í-lī-a-kèng, Sià-pek-ná, kap Iok-a tùi chóng-su-lēng kóng, “Chhiáⁿ ēng A-lân-ōe tùi lí ê po̍k-jîn kóng, goán thiaⁿ ū. Chhiáⁿ m̄-thang ēng Hi-pek-lâi-ōe kóng, kiaⁿ-liáu hō͘ siâⁿ-chhiûⁿ téng ê jîn-bîn thiaⁿ--tio̍h.”

12M̄-kú chóng-su-lēng kóng, “Lín siūⁿ-kóng goán chú-lâng chhe góa kóng chiah-ê ōe, chí-ū beh hō͘ lín kap lín ê kok-ông thiaⁿ sī--bô? M̄-sī, góa mā beh kóng hō͘ siâⁿ-chhiûⁿ téng ê lâng thiaⁿ. In kap lín kâng-khoán tio̍h chia̍h ka-kī ê pùn, lim ka-kī ê jiō.”

13Chóng-su-lēng koh khiā khí-lâi tōa-siaⁿ ēng Hi-pek-lâi-ōe hoah kóng, “Tio̍h thiaⁿ A-su̍t tāi-ông ê ōe.

14Ông án-ni kóng, ‘M̄-thang hō͘ Hi-se-ka phiàn--khì, in-ūi i bōe-tàng kiù lín.

15I kiò lín sìn-khò Siōng Chú, kóng: Siōng Chú it-tēng ōe kiù lán; chit-ê siâⁿ bōe hām-lo̍h tī A-su̍t-ông ê chhiú.’

16M̄-thang thiaⁿ Hi-se-ka ê ōe. A-su̍t-ông án-ni kóng, ‘Kap góa kóng-hô, chhut-lâi tâu-hâng. Án-ni, lín ta̍k-ê lâng chiū ōe-tàng chia̍h ka-kī chèng ê phû-tô kap bû-hoa-kó, lim lín ka-kī ê chíⁿ-chúi,

17thèng-hāu góa chhōa lín kàu chi̍t ê só͘-chāi, chhin-chhiūⁿ lín ê thó͘-tōe, ū ngó͘-kok kap sin-chiú, ū bí-niû kap phû-tô-hn̂g.

18M̄-thang hō͘ Hi-se-ka khi-phiàn kóng: Siōng Chú it-tēng ōe kiù lán. Bān-kok ê chèng sîn-bêng tó chi̍t ê bat kiù i ka-kī ê kok thoat-lī A-su̍t-ông ê chhiú?

19Hap-má kap A-ní-poa̍t ê sîn-bêng tī tó-ūi? Se-hoat-óa-im ê sîn-bêng tī tó-ūi? In kiám ū kái-kiù Sat-má-lī-a thoat-lī góa ê chhiú?

20Chiah-ê kok-ka ê sîn-bêng ū tó chi̍t ê bat tùi góa ê chhiú kiù-chhut i ka-kī ê kok-ka? Án-ni, Siōng Chú ná ōe-tàng kiù Iâ-lō͘-sat-léng thoat-lī góa ê chhiú-thâu?’”

21M̄-kú jîn-bîn lóng chēng-chēng, bô ìn pòaⁿ-kù ōe, in-ūi Hi-se-ka-ông ū kā in hoan-hù, “M̄-thang ìn i!”

22Hit-sî, Hi-le̍k-ka ê kiáⁿ kiong-têng chóng-koán Í-lī-a-kèng, su-kì Sià-pek-ná, kap A-sat ê kiáⁿ sú-koaⁿ Iok-a, lóng thiah-li̍h in ê saⁿ, tùi Hi-se-ka pò-kò A-su̍t ê chóng-su-lēng kā in kóng ê ōe.

Í-sài-a-su 36 - 現代台語譯本羅馬字版(TTVR)-闽南语

Learn More About Us