Tān-í-lí-su 9

Tān-í-lí-su 9 - 現代台語譯本羅馬字版(TTVR)-闽南语

Tān-í-lí ūi Tông-pau Kî-tó

1 Bí-tí-a-lâng A-hap-sûi-ló͘ ê kiáⁿ Tāi-liû-sū thóng-tī Pa-pí-lûn-kok tē-it nî,

2chiū-sī i choh-ông ê goân-nî, góa Tān-í-lí tī keng-tián tha̍k-tio̍h Siōng Chú khé-sī sian-ti Iâ-lī-bí koan-hē Iâ-lō͘-sat-léng ōe hong-hòe chhit-cha̍p nî ê kì-chài.

3Góa chiū ǹg Chú Siōng-tè kî-tó, khún-kiû, kìm-chia̍h, chhēng môa-saⁿ, sám hé-hu, tùi I kiû-mn̄g chit-ê sū.

4Góa ǹg Siōng Chú — góa ê Siōng-tè kî-tó, jīn-chōe kóng, “Chú ah, lí sī chì-tōa thang kiaⁿ-ùi ê Siōng-tè, siú-iok si chû-ài hō͘ só͘-ū thiàⁿ lí, chun-hêng lí kài-bēng ê lâng.

5“Goán ū hoān-chōe, kiâⁿ put-gī ê sū, chòe pháiⁿ, pōe-poān lí ê kài-bēng kap kui-lē;

6lí ê po̍k-jîn chèng sian-ti bat hōng lí ê miâ tùi goán ê kun-ông, koaⁿ-tiúⁿ, chó͘-sian, kap choân-kok jîn-bîn kóng-ōe, m̄-kú goán lóng bô thiaⁿ-thàn.

7Chú ah, lí sī kong-gī--ê; goán chiah-ê Iû-tāi-lâng, Iâ-lō͘-sat-léng chū-bîn, í-ki̍p hō͘ lí kóaⁿ-khì hn̄g-kūn ta̍k-kok ê Í-sek-lia̍t jîn-bîn, tùi kó͘-chá kàu hiān-chāi lóng kâng-khoán chū-chhú-kiàn-siàu, in-ūi goán pōe-ge̍k lí.

8Siōng Chú ah, goán kap goán ê kun-ông, koaⁿ-tiúⁿ, chó͘-sian ū tek-chōe lí, tì-kàu móa-bīn kiàn-siàu.

9-10M̄-kú sui-jiân goán pōe-poān lí, m̄ thiaⁿ lí ê ōe, bô sūn-thàn lí thong-kè lí ê po̍k-jîn chèng sian-ti tùi goán soan-pò͘ ê lu̍t-hoat, Chú — goán ê Siōng-tè, lí iáu-kú chhiong-móa chû-ài, koh it-ti̍t sià-bián goán.

11Goán só͘-ū ê Í-sek-lia̍t-lâng ū ûi-hoán lí ê lu̍t-hoat, phian-lī, m̄ thiaⁿ-thàn lí ê ōe, só͘-í lí ê po̍k-jîn Mô͘-se ê lu̍t-hoat só͘ kì-chài ê chiù-chó͘, kap Siōng-tè li̍p-sè beh kàng ê chai-hō, chiū piàⁿ tī goán sin-chiūⁿ. Goán si̍t-chāi ū tek-chōe lí!

12Lí ū si̍t-hiān lí tùi goán kap thóng-tī goán ê koaⁿ-tiúⁿ só͘ kóng kéng-kài ê ōe, hō͘ tōa chai-hō lîm-kàu goán; Iâ-lō͘-sat-léng siū--tio̍h-ê, sī thiⁿ-ē bô chi̍t ê siâⁿ-chhī bat tú--tio̍h ê chai-lān.

13Lí hō͘ Mô͘-se lu̍t-hoat só͘ kì-chài ê chai-hō, lóng lîm-kàu goán sin-chiūⁿ, m̄-kú goán kèng-jiân bô khún-kiû Siōng Chú — goán ê Siōng-tè si-un, hō͘ goán oa̍t-tńg-sin lī-khui chōe-ok, bêng-pe̍k lí sìn-si̍t ê ōe.

14Tùi án-ni, Siōng Chú koat-ì hō͘ chai-hō lîm-kàu goán, in-ūi Siōng Chú — goán ê Siōng-tè ê só͘-chòe lóng sī kong-gī; m̄-kú goán bô thiaⁿ-thàn lí ê ōe.

15“Chú — goán ê Siōng-tè, lí bat ēng tōa koân-lêng ê chhiú chhōa lí ê chú-bîn thoat-lī Ai-ki̍p; tī hit-sî, lí chiū hián-chhut kap kin-á-ji̍t kâng-khoán ê miâ-siaⁿ. M̄-kú, kàu taⁿ goán iáu-teh hoān-chōe chòe pháiⁿ.

16Chú ah, kiû lí chiàu lí ê kong-gī, bô hō͘ lí ke̍k-tōa ê siū-khì koh lîm-kàu chit-ê siâⁿ, chiū-sī lí ê sèng-soaⁿ Iâ-lō͘-sat-léng, in-ūi Iâ-lō͘-sat-léng kap lí ê chú-bîn ūi-tio̍h goán kap goán ê chó͘-sian ê chōe-kò siū chiu-ûi ê lâng lêng-jio̍k.

17Goán ê Siōng-tè, taⁿ kiû lí àⁿ-lo̍h thiaⁿ lí ê po̍k-jîn ê kî-tó khún-kiû. Chú ah, kiû lí in-ūi lí ka-kī ê iân-kò͘, khòaⁿ-kò͘ lí hong-hòe ê sèng-só͘.

18Góa ê Siōng-tè ah, kiû lí àⁿ hī-khang thiaⁿ lí po̍k-jîn ê kî-tó, khui lí ê ba̍k-chiu khòaⁿ goán hiah-ê pha-hng ê thó͘-tōe í-ki̍p ēng lí ê miâ kiàn-li̍p ê siâⁿ; goán ǹg lí kî-tó, m̄-sī khò ka-kī ê hó hêng-ûi, sī in-ūi lí hong-hù ê chû-pi lîn-bín.

19Chú ah, kiû lí thiaⁿ! Chú ah, kiû lí sià-bián! Chú ah, kiû lí chhái-chhú hêng-tōng! Góa ê Siōng-tè, kiû lí ūi-tio̍h lí ka-kī ê iân-kò͘ m̄-thang iân-tî, in-ūi chit-ê siâⁿ, chiah-ê chú-bîn lóng sī lí ê.”

Ka-pek-lia̍t Kóe-seh Īⁿ-siōng

20Góa kè-sio̍k kóng-ōe kî-tó, sêng-jīn góa kap góa ê tông-pau Í-sek-lia̍t ê chōe, ūi-tio̍h góa ê Siōng-tè ê sèng-soaⁿ ǹg Siōng Chú — góa ê Siōng-tè khún-kiû.

21Góa tú-teh kî-tó ê sî, tú-chiah tī īⁿ-siōng tiong khòaⁿ--kìⁿ hit-ūi Ka-pek-lia̍t, tāi-iok tī hiàn ē-hng-chè ê sî chin-kín pe-lâi góa chia.

22I kā góa kóe-seh, kóng, “Tān-í-lí, góa hiān-chāi lâi sī beh hō͘ lí oân-choân bêng-pe̍k.

23Lí khai-sí kî-tó ê sî, Siōng-tè chiū bēng-lēng góa lâi kā lí kóng: Lí sī Siōng-tè só͘ thiàⁿ ê lâng, só͘-í tio̍h chù-ì chit-ê sìn-sit, liáu-kái chit-ê īⁿ-siōng.

24“Siōng-tè ūi-tio̍h lí ê tông-pau kap Sèng-siâⁿ chí-tēng chi̍t tōaⁿ sî-kan, chiū-sī chhit-cha̍p lé-pài. Hit-sî, lín bô koh pōe-poān, chōe tit-tio̍h sià-bián, chōe-kò tit-tio̍h chhat-siau, éng-oán ê kong-gī khai-sí si̍t-chián, īⁿ-siōng kap ū-giân tit-tio̍h èng-giām, koh-chài kā Chì-sèng-só͘ boah-iû.

25Só͘-í lí tio̍h chheng-chhó liáu-kái, tùi hā-lēng tiông-kiàn Iâ-lō͘-sat-léng kàu siū boah-iû soán-li̍p ê léng-siù chhut-hiān, chit tiong-kan tio̍h ū chhit lé-pài, koh keng-kè la̍k-cha̍p-jī lé-pài, Iâ-lō͘-sat-léng í-ki̍p i ê koe-lō͘ kap hô-kau ōe tī kan-lân ê tiong-kan tiông-kiàn oân-sêng.

26La̍k-cha̍p-jī lé-pài kè-liáu, siū boah-iû soán-li̍p ê léng-siù ōe siū chián-tû, bô lâng sòa-chiap i. Āu-lâi ū chi̍t ê ông ōe chhōa kun-tūi lâi húi-bia̍t chit-ê siâⁿ kap sèng-só͘, i ê kiat-kio̍k ōe chhin-chhiūⁿ tōa-chúi chhiong--lâi, koh ōe ū chiàn-cheng, chòe-āu ta̍k sì-kòe lóng pìⁿ-chòe pha-hng.

27I ōe tī chi̍t lé-pài lāi kap chin chōe lâng kiat-bêng; tī chi̍t lé-pài ê chi̍t-pòaⁿ kìm-chí lâng ǹg Siōng-tè hiàn-chè kap hōng-hiàn lé-mi̍h, koh chiong khó-ò͘ⁿ, ōe chō-sêng húi-bia̍t ê mi̍h chhāi tī sèng-tiān, ti̍t-kàu chí-tēng ê kiat-kio̍k si̍t-hiān tī hit-ê húi-bia̍t-chiá sin-chiūⁿ.”

Tān-í-lí-su 9 - 現代台語譯本羅馬字版(TTVR)-闽南语

Learn More About Us