Si-phian 84 - 現代台語譯本羅馬字版(TTVR)-闽南语

Khó-la hō͘-tāi ê si, kau hō͘ sèng-ga̍k-tiúⁿ; ēng Ka-te̍k ê ga̍k-khì phōaⁿ-chàu.Him-bō͘ Siōng-tè ê Tiān-īⁿ

1Siōng Chú — Bān-kun ê Thóng-sòe ah,

lí khiā-khí ê só͘-chāi hō͘ lâng hiah-ni̍h ì-ài!

2Góa loân-bō͘ Siōng Chú ê tiâⁿ kàu beh hūn--khì!

Góa ê sim-sîn ǹg éng-oa̍h ê Siōng-tè hoaⁿ-hí chhiùⁿ-koa.

3Siōng Chú — Bān-kun ê Thóng-sòe, góa ê Ông, góa ê Siōng-tè ah,

chhek-chiáu-á tī lí ê chè-tôaⁿ piⁿ choh-siū;

liân ìⁿ-á mā tī hia ūi-tio̍h ka-kī chhē-tio̍h áⁿ-kiáⁿ ê siū.

4Khiā-khí tī lí tiān ê tiâⁿ ê lâng chin ū hok-khì!

In chheng-chàn lí bô-soah!

5Tùi lí tit-tio̍h khùi-la̍t ê lâng chin ū hok-khì!

In pek-chhiat ài chiūⁿ Sek-an-soaⁿ tiâu-sèng.

6In keng-kè ê ta-sò soaⁿ-kok lóng pìⁿ-chòe chôaⁿ-goân;

chhiu-ú kàng-lo̍h, hok-khì móa-móa.

7In ná kiâⁿ ná ū la̍t,

lóng beh tī Sek-an tiâu-kìⁿ Siōng-tè.

8Siōng Chú — Bān-kun ê Thóng-sòe Siōng-tè ah, kiû lí thiaⁿ góa ê kî-tó!

Ngá-kok ê Siōng-tè ah, kiû lí àⁿ hī-khang lâi thiaⁿ!

9Pó-hō͘ goán ê Siōng-tè ah, kiû lí koàn-kò͘!

Kiû lí sù-hok hō͘ lí só͘ siat-li̍p ê ông!

10Tī lí ê tiâⁿ tiàm chi̍t ji̍t,

khah iâⁿ tī pa̍t-ūi tiàm chi̍t-chheng ji̍t!

Góa lêng-khó tī góa Siōng-tè ê chhù kò͘-mn̂g,

mā m̄-goān tiàm tī siâ-ok ê lâng ê chhù-lāi.

11In-ūi Chú Siōng-tè sī ji̍t-thâu, sī tún-pâi:

I hō͘ lán un-hūi kap kong-êng;

I m̄-bat lâu chi̍t hāng hó-mi̍h bô hō͘ chèng-ti̍t ê lâng.

12Siōng Chú — Bān-kun ê Thóng-sòe ah, sìn-khò lí ê lâng chin ū hok-khì!

Learn More About Us