Si-phian 57

Si-phian 57 - 現代台語譯本羅馬字版(TTVR)-闽南语

Tāi-pi̍t siám-pī Sò-lô, bih tī tōng-lāi ê sî chòe chit-siú kim-si, kau hō͘ sèng-ga̍k-tiúⁿ; tiāu, ēng “M̄-thang Húi-hoāi”.Kiû Pang-chān ê Kî-tó

1Siōng-tè ah, kiû lí khó-lîn góa, khó-lîn góa;

góa beh bih tī lí hia,

bih tī lí si̍t-kó͘ ê pó-hō͘-ē,

thèng-hāu chai-lān lóng kè--khì.

2Góa beh kiû-kiò Chì-koân ê Siōng-tè,

ta̍k-hāng sū lóng kā góa oân-sêng ê Siōng-tè.

3Siōng-tè ōe tùi thiⁿ si-un kiù góa,

hō͘ thún-ta̍h góa ê lâng sit-pāi kiàn-siàu.

Siōng-tè ōe tùi góa si-lo̍h chû-ài kap sìn-si̍t.

4Góa tó tī hiong-ok ê lâng tiong-kan,

in chhin-chhiūⁿ sai tng-tán beh thun-chia̍h lâng;

in ê chhùi-khí chhin-chhiūⁿ chhiuⁿ, chhin-chhiūⁿ chìⁿ,

in ê chi̍h chhin-chhiūⁿ lāi ê to.

5Siōng-tè ah, goān lí ê úi-tāi pôaⁿ-kè thiⁿ,

lí ê êng-kng piàn-chiò choân-tōe.

6In tī góa ê kha-chêng siat lô-bāng,

beh hō͘ góa khut-ho̍k;

tī góa ê bīn-chêng khui hām-khiⁿ,

ka-kī tian-tò poa̍h-lo̍h hit lāi-bīn.

7Siōng-tè ah, góa ê sim pêng-chēng, góa ê sim kian-tēng;

góa beh gîm-si, góa beh chhiùⁿ-koa chheng-chàn.

8Góa ê sim-sîn ah, tio̍h chhíⁿ--khí-lâi!

Khîm ah, sek ah, tio̍h chhíⁿ--khí-lâi!

Góa beh kā ji̍t-thâu kiò-chhíⁿ.

9Chú ah, góa beh tī bān-bîn tiong kám-siā lí,

tī lia̍t-pang tiong chhiùⁿ-koa chheng-chàn lí.

10Lí ê chû-ài ná thiⁿ hiah-ni̍h koân;

lí ê sìn-si̍t thàu kàu kiong-chhong.

11Siōng-tè ah, goān lí ê úi-tāi pôaⁿ-kè thiⁿ;

goān lí ê êng-kng piàn-chiò choân-tōe.

Si-phian 57 - 現代台語譯本羅馬字版(TTVR)-闽南语

Learn More About Us