Lī-bī-kì 15

Lī-bī-kì 15 - 現代台語譯本羅馬字版(TTVR)-闽南语

Iú-koan Hā-siau ê Tiâu-lē

1Siōng Chú bēng-lēng Mô͘-se kap A-lûn

2tio̍h hoan-hù Í-sek-lia̍t-lâng, kóng:

Nā ū ta-po͘-lâng tì-tio̍h hā-siau, i chiū bô chheng-khì.

3I in-ūi hā-siau, bô-lūn iáu-teh lâu, á-sī í-keng thêng-chí, lóng sī bô chheng-khì.

4Tì-tio̍h hā-siau ê lâng, tó--kè ê bîn-chhn̂g kap chē--kè ê mi̍h-kiāⁿ lóng sī bô chheng-khì.

5Bong-tio̍h i ê bîn-chhn̂g--ê, tio̍h sóe ka-kī ê saⁿ, koh sóe seng-khu, tī ji̍t lo̍h í-chêng sī bô chheng-khì.

6Chē-tio̍h i chē--kè ê mi̍h-kiāⁿ--ê, tio̍h sóe ka-kī ê saⁿ, koh sóe seng-khu, tī ji̍t lo̍h í-chêng sī bô chheng-khì.

7Bong-tio̍h i ê seng-khu--ê, tio̍h sóe ka-kī ê saⁿ, koh sóe seng-khu, tī ji̍t lo̍h í-chêng sī bô chheng-khì.

8Chheng-khì ê lâng nā hō͘ i phùi-tio̍h chhùi-nōa, tio̍h sóe ka-kī ê saⁿ, koh sóe seng-khu, tī ji̍t lo̍h í-chêng sī bô chheng-khì.

9I chē--kè ê oaⁿ mā-sī bô chheng-khì.

10Bong-tio̍h i chē--kè ê mi̍h-kiāⁿ--ê, tī ji̍t lo̍h í-chêng sī bô chheng-khì. The̍h hiah-ê mi̍h-kiāⁿ--ê, tio̍h sóe ka-kī ê saⁿ, koh sóe seng-khu, tī ji̍t lo̍h í-chêng sī bô chheng-khì.

11I iáu-bē sóe-chhiú í-chêng hō͘ i bong--tio̍h ê lâng, tio̍h sóe ka-kī ê saⁿ, koh sóe seng-khu, tī ji̍t lo̍h í-chêng sī bô chheng-khì.

12I bong--tio̍h ê chho͘-hûi tio̍h kòng hō͘ phòa; chhâ ê khì-khū tio̍h ēng chúi sóe.

13Hā-siau ê lâng nā í-keng hó, ūi-tio̍h beh kiat-chēng ka-kī, tio̍h tán chhit ji̍t; i tio̍h sóe ka-kī ê saⁿ, ēng oa̍h-chúi sóe seng-khu, chiū tit-tio̍h chheng-khì.

14Tē-poeh ji̍t, i tio̍h chiong nn̄g chiah pan-kah á-sī hún-chiáu-á-kiáⁿ, tòa-lâi hōe-bō͘ mn̂g-kháu, tī Siōng Chú ê bīn-chêng kau hō͘ chè-si.

15Chè-si tio̍h hiàn chi̍t chiah chòe sio̍k-chōe-chè, chi̍t chiah chòe sio-hòa-chè; chè-si tio̍h ūi-tio̍h chit-ê lâng hā-siau ê pīⁿ tī Siōng Chú ê bīn-chêng kā i sio̍k-chōe.

16Lâng nā sia̍p-cheng, tio̍h sóe seng-khu, ji̍t lo̍h í-chêng sī bô chheng-khì.

17Bak-tio̍h cheng-e̍k ê saⁿ á-sī phê ê mi̍h-kiāⁿ, tio̍h ēng chúi sóe, ji̍t lo̍h í-chêng sī bô chheng-khì.

18Nā lâm-lú ū sèng-koan-hē, nn̄g ê lâng tio̍h sóe seng-khu, ji̍t lo̍h í-chêng sī bô chheng-khì.

Iú-koan Ge̍h-keng ê Tiâu-lē

19Lú-chú nā ge̍h-keng lâi, i it-tēng bô chheng-khì chhit ji̍t kú; só͘-ū bong-tio̍h i ê lâng, ji̍t lo̍h í-chêng sī bô chheng-khì.

20Tī i bô chheng-khì ê kî-kan, só͘-ū i tó--kè kap chē--kè ê mi̍h-kiāⁿ lóng sī bô chheng-khì.

21Só͘-ū bong-tio̍h i ê bîn-chhn̂g--ê, tio̍h sóe-saⁿ, sóe seng-khu, ji̍t lo̍h í-chêng sī bô chheng-khì.

22Só͘-ū bong-tio̍h i chē--kè ê mi̍h-kiāⁿ--ê, tio̍h sóe-saⁿ, sóe seng-khu, ji̍t lo̍h í-chêng sī bô chheng-khì.

23Bô-lūn bong-tio̍h hit-ê lú-chú ê bîn-chhn̂g á-sī i chē--kè ê mi̍h-kiāⁿ ê lâng, ji̍t lo̍h í-chêng lóng sī bô chheng-khì.

24Ta-po͘-lâng nā kap ge̍h-keng lâi ê lú-chú ū sèng-koan-hē, bak-tio̍h i ê ge̍h-keng, tio̍h bô chheng-khì chhit ji̍t kú, tó--kè ê bîn-chhn̂g mā bô chheng-khì.

25Lú-chú nā tī keng-kî í-gōa lâu-huih chin chōe ji̍t, á-sī keng-kî āu iáu-teh lâu-huih, i lâu-huih ê kî-kan kap tī keng-kî kâng-khoán bô chheng-khì.

26Tī lâu-huih ê kî-kan, i tó--kè ê bîn-chhn̂g kap chē--kè ê mi̍h-kiāⁿ lóng bô chheng-khì, kap tī keng-kî tiong-kan ê bô chheng-khì kâng-khoán.

27Só͘-ū bong-tio̍h hiah-ê mi̍h ê lâng chiū bô chheng-khì; tio̍h sóe i ê saⁿ, sóe seng-khu, ji̍t lo̍h í-chêng sī bô chheng-khì.

28Lú-chú hiat-lāu nā í-keng hó, ka-kī tio̍h sǹg chhit ji̍t, i chiah chheng-khì.

29Tē-poeh ji̍t, i tio̍h tòa nn̄g chiah pan-kah á-sī hún-chiáu-á-kiáⁿ kàu hōe-bō͘ mn̂g-kháu, kau hō͘ chè-si.

30Chè-si tio̍h hiàn chi̍t chiah chòe sio̍k-chōe-chè, chi̍t chiah chòe sio-hòa-chè; chè-si tio̍h ūi-tio̍h chit-ê lú-chú hiat-lāu ê bô chheng-khì, tī Siōng Chú ê bīn-chêng kā i sio̍k-chōe.

31Lín tio̍h kéng-kài Í-sek-lia̍t-lâng m̄-thang ûi-hoān kiat-chēng ê tiâu-lē, chiah bián in chiong góa tī in tiong-kan ê hōe-bō͘ phah lâ-sâm, tì-kàu in in-ūi bô chheng-khì sí.

32Í-siōng sī koan-hē sia̍p-lāu tì-kàu bô chheng-khì ê tiâu-lē, pau-koat hā-siau kap sia̍p-cheng ê ta-po͘-lâng,

33ge̍h-keng lâi ê lú-chú, kap tì-tio̍h sia̍p-lāu ê lâm-lú, í-ki̍p kap ge̍h-keng lâi ê lú-chú ū sèng-koan-hē ê lâng ê tiâu-lē.

Lī-bī-kì 15 - 現代台語譯本羅馬字版(TTVR)-闽南语

Learn More About Us