Iâ-lī-bí-su 22

Iâ-lī-bí-su 22 - 現代台語譯本羅馬字版(TTVR)-闽南语

Iâ-lī-bí Kéng-kò Iû-tāi Ông-sek

1-2Siōng Chú kiò góa ji̍p-khì Iû-tāi ông-kiong, kā chē Tāi-pi̍t ông-ūi ê Iû-tāi-ông, koaⁿ-oân, í-ki̍p Iâ-lō͘-sat-léng ê jîn-bîn kóng, “Tio̍h chù-ì thiaⁿ Siōng Chú ê ōe.

3Siōng Chú án-ni kóng, ‘Lín tio̍h péng-kong-hêng-gī, tùi khi-ap ê lâng ê chhiú kái-kiù siū ap-chè ê lâng; m̄-thang ge̍k-thāi á-sī ēng kiông-pō ê chhiú-tōaⁿ tùi-thāi gōa-cho̍k-lâng, ko͘-jî, kóaⁿ-hū, mā m̄-thang tī chit-tè thó͘-tōe lâu bû-ko͘ ê lâng ê huih.

4Lín nā chhiat-si̍t chun-siú góa ê bēng-lēng, chē Tāi-pi̍t pó-chō ê kun-ông, kap hiah-ê koaⁿ-oân, jîn-bîn chiū thang chē bé-chhia á-sī khiâ-bé, keng-kè siâⁿ-mn̂g chìn-ji̍p ông-kiong.

5M̄-kú lín nā bô beh ho̍k-chiông góa ê bēng-lēng, góa kí ka-kī li̍p-sè, chit-ê kiong-tiān ōe chiâⁿ-chòe hong-po͘. Góa Siōng Chú án-ni soan-kò.

6“‘Tùi góa Siōng Chú lâi khòaⁿ, Iû-tāi ê ông-kiong chhin-chhiūⁿ Ki-lia̍t, chhin-chhiūⁿ Lê-pa-lūn ê soaⁿ-téng hiah-ni̍h súi; m̄-kú góa beh hō͘ i pìⁿ-chòe hong-po͘, bô lâng khiā-khí.

7Góa ōe phài lâng kā i húi-bia̍t; in ōe tòa pó͘-thâu lâi chhò-tn̄g hiah-ê pek-hiuⁿ-chhiū chòe ê thiāu, kā hiat-lo̍h hé.

8“‘Ōe ū chin chōe gōa-cho̍k-lâng keng-kè chit-ê siâⁿ, hō͘-siōng kóng-lâi-kóng-khì: Siōng Chú sī-án-chóaⁿ án-ni tùi-thāi chit-ê tōa ê siâⁿ?

9Ū lâng ōe kóng: Sī in-ūi chit-ê siâⁿ ê lâng ûi-pōe Siōng Chú — in ê Siōng-tè kap in li̍p ê iok, khì ho̍k-sāi kèng-pài pa̍t-ê sîn-bêng.’”

Iú-koan Iok-hap-su

10 Iû-tāi-lâng, m̄-bián ūi-tio̍h í-keng sí--khì ê ông ai-khàu,

m̄-bián ūi-tio̍h i pi-siong;

tio̍h ūi i ê kiáⁿ Iok-hap-su ai-khàu,

in-ūi Iok-hap-su siū-lia̍h bōe koh tńg--lâi,

bōe-tàng koh khòaⁿ-tio̍h ka-kī ê hiong-thó͘.

11Iú-koan kè-sêng i ê lāu-pē Iok-se-a chòe Iû-tāi-ông ê Iok-hap-su, Siōng Chú án-ni kóng, “I siū-lia̍h lī-khui chit-ê só͘-chāi, éng-oán bōe koh tńg--lâi.

12I ōe sí tī siū lia̍h--khì ê só͘-chāi, bōe-tàng koh khòaⁿ-tio̍h chit-tè thó͘-tōe.”

Iú-koan Iok-ngá-kèng

13Chit-ê lâng ū chai-hō lah!

I ēng bô kong-gī ê chhiú-tōaⁿ khí ka-kī ê kiong-tiān,

ēng bô kong-tō ê hong-hoat khí lâu-á-chhù;

i hō͘ ka-kī ê tông-pau chòe pe̍h-kang,

lóng bô hō͘ in kang-chîⁿ.

14I kóng, “Góa beh ūi ka-kī khí koân-lâu-tōa-chhù,

kā chhù khui thang-á,

ēng pek-hiuⁿ-chhâ chong-hông,

piah-pang chhat âng-sek.”

15Lí ēng pek-hiuⁿ-chhâ chō ko-kùi ê kiong-tiān,

beh piáu-sī lí pí pa̍t-lâng khah gâu choh-ông sī--bô?

Lí ê lāu-pē kiám m̄-sī péng-kong-hêng-gī,

chi̍t-sì-lâng hióng-siū hok-khì,

sū-sū heng-thong?

16I ūi khùn-khó͘ kap sàn-chhiah ê lâng sin-oan,

hit-sî i sū-sū heng-thong;

che kiám m̄-sī in-ūi i chin-chiàⁿ bat góa?

Siōng Chú án-ni kóng.

17M̄-kú lí ê sim-ba̍k kan-ta khòaⁿ ka-kī ê lī-ek,

lâu bû-ko͘ ê lâng ê huih,

khi-hū ap-chè jîn-bîn.

18Só͘-í, chiam-tùi Iok-se-a ê kiáⁿ Iû-tāi-ông Iok-ngá-kèng, Siōng Chú án-ni kóng:

Bô lâng ōe ūi-tio̍h i ai-siong, kóng,

“Ài ah, góa ê hiaⁿ-tī, góa ê chí-bē!”

Bô lâng ōe ūi-tio̍h i ai-khàu, kóng,

“Ài ah, góa ê chú, góa ê ông!”

19I siū bâi-chòng chhin-chhiūⁿ lâng teh tâi lû-á,

hō͘ lâng thoa-cháu, hiat chhut-khì Iâ-lō͘-sat-léng siâⁿ-gōa.

Iú-koan Iâ-lō͘-sat-léng Jîn-bîn ê Miā-ūn

20 Iâ-lō͘-sat-léng ê chū-bîn ah,

tio̍h peh-chiūⁿ Lê-pa-lūn-soaⁿ tōa-siaⁿ hoah!

Khì Pa-san tōa-siaⁿ khàu!

Khì Mô͘-ap ê soaⁿ-téng tōa-siaⁿ hoah!

Kap lí kiat-bêng ê pêng-iú lóng siū phah-pāi lah.

21Lín chá-chêng an-tēng ê sî, góa kéng-kò lín,

lín lóng m̄ thiaⁿ!

Lín tùi siàu-liân chiū án-ni,

m̄ thiaⁿ góa ê ōe.

22Lín ê siú-léng ōe hō͘ hong chhe-cháu;

kap lín kiat-bêng ê pêng-iú ōe siū-lia̍h.

Lín lóng ōe siū bú-jio̍k,

in-ūi lín ê só͘-chòe lóng sī pháiⁿ.

23Lín tòa tī Lê-pa-lūn, tī pek-hiuⁿ-chhâ khí ê kiong-tiān,

lín lia̍h chòe an-choân;

chai-lān chi̍t-ē kàu,

lín ōe chhin-chhiūⁿ hū-jîn-lâng chhui-chūn, thòng-khó͘ ai-kiò.

Siōng-tè Sím-phòaⁿ Iok-ngá-kun

24Siōng Chú tùi Iok-ngá-kèng ê kiáⁿ Iû-tāi-ông Iok-ngá-kun kóng, “Góa beh kí góa éng-oán ê oa̍h-miā li̍p-sè, sui-jiân lí sī góa chiàⁿ-chhiú ê chhiú-chí-ìn, góa mā beh kā lí pak--lo̍h-lâi,

25kau hō͘ hiah-ê lí só͘ kiaⁿ, beh thâi lí ê lâng, chiū-sī Pa-pí-lûn-ông Nî-pò͘-kah-nî-sat kap i ê kun-tūi.

26Góa beh chiong lí kap lí ê lāu-bú kóaⁿ-khì gōa-kok, khì m̄-sī lín chhut-sì ê só͘-chāi; lín ōe sí tī hia.

27Lín chin ài tò--lâi, m̄-kú éng-oán bōe-tàng tò--lâi.”

28Siōng Chú koh kóng, “Iok-ngá-kun kiám m̄-sī chhin-chhiūⁿ chi̍t tè phò-chhùi, bô lâng beh ti̍h ê pôaⁿ-á? Sī-án-chóaⁿ i kap i ê kiáⁿ-jî, cha-bó͘-kiáⁿ lóng siū hiat-ka̍k, liû-bông tī gōa-tōe?

29Tāi-tōe ah, tāi-tōe! Tio̍h chù-ì thiaⁿ Siōng Chú ê ōe.

30Tio̍h kì chi̍t pit: Chit-ê lâng bô hō͘-sû,

sī it-seng lóng bô sêng-chiū ê lâng;

i bô hō͘-tāi kè-sêng Tāi-pi̍t ê ông-ūi,

thang kè-sio̍k thóng-tī Iû-tāi.”

Siōng Chú án-ni soan-kò.

Iâ-lī-bí-su 22 - 現代台語譯本羅馬字版(TTVR)-闽南语

Learn More About Us