Si-phian 46 - 現代台語譯本羅馬字版(TTVR)-闽南语

Khó-la hō͘-tāi ê si, kau hō͘ sèng-ga̍k-tiúⁿ; tiāu, ēng “Siàu-lú”.Siōng-tè kap Lán Tông-chāi

1Siōng-tè sī lán ê pī-lān-só͘, lán ê khùi-la̍t,

sī hoān-lān tiong ki̍p-sî ê pang-chān.

2Sui-jiân tōe tōa piàn-tōng,

soaⁿ sóa kàu hái-tiong,

3hái-chúi giâ-éng hōa-hōa-háu,

soaⁿ in-ūi hái-tiòng iô-choah,

lán lóng bián kiaⁿ.

4Ū chi̍t tiâu hô, i ê chúi-liû hō͘ Siōng-tè ê siâⁿ hoaⁿ-hí;

chiū-sī Chì-koân Siōng-tè khiā-khí sèng ê só͘-chāi.

5Siōng-tè tiàm tī hia, siâⁿ it-tēng bōe iô-tāng;

thiⁿ phú-kng, Siōng-tè chiū pang-chān i.

6Lia̍t-pang hōa-hōa-háu, lia̍t-kok tōng-iâu;

Siōng-tè chhut-siaⁿ, tōe chiū siau-iûⁿ.

7Siōng Chú — Bān-kun ê Thóng-sòe kap lán tông-chāi;

Ngá-kok ê Siōng-tè chòe lán ê iàu-sài.

8Lâi, lâi khòaⁿ Siōng Chú ê só͘-chòe,

khòaⁿ I tī tōe-chiūⁿ kî-biāu ê chok-ûi.

9I at-chi̍h keng, chām-tn̄g chhiuⁿ, pàng-hé sio chiàn-chhia;

I hō͘ chiàn-cheng lóng soah, choân-tōe hô-pêng.

10I kóng, “Lóng chēng-chēng! Tio̍h chai góa sī Siōng-tè!

Góa tī lia̍t-pang siū chun-chông,

tī choân-tōe siū chun chòe tōa.”

11Siōng Chú — Bān-kun ê Thóng-sòe kap lán tông-chāi;

Ngá-kok ê Siōng-tè chòe lán ê iàu-sài.

Learn More About Us