Si-phian 62 - 現代台語譯本羅馬字版(TTVR)-闽南语

Tāi-pi̍t ê si, chiàu Iâ-tō͘-tùn ê choh-hoat, kau hō͘ sèng-ga̍k-tiúⁿ.Sìn-khò Siōng-tè

1Góa ê sim-sîn chēng-chēng, choan-sim thèng-hāu Siōng-tè;

góa ê chín-kiù sī tùi I lâi.

2Chí-ū I sī pó-hō͘ góa ê chio̍h-pôaⁿ, góa ê chín-kiù;

I sī góa ê pó-lúi, góa lóng bōe tōng-iâu.

3Lín kong-kek chi̍t ê lâng beh kàu sím-mi̍h sî?

Lín chhin-chhiūⁿ teh sak khi-chhiâ ê chhiûⁿ, beh-tó ê piah án-ni kā hit-ê lâng húi-hoāi.

4Lín tàu-tīn kè-bô͘, it-ti̍t beh kā i tùi chun-kùi ê ūi chhia--lo̍h-khì;

lín ài kóng pe̍h-chha̍t.

Lín chhùi chiok-hok, sim chiù-chó͘.

5Góa ê sim-sîn ah, tio̍h chēng-chēng, choan-sim thèng-hāu Siōng-tè,

in-ūi góa ê ǹg-bāng tùi I lâi.

6Chí-ū I sī góa ê chio̍h-pôaⁿ, góa ê chín-kiù;

I sī góa ê pó-lúi, góa lóng bōe tōng-iâu.

7Góa ê chín-kiù, góa ê kong-êng chāi-tī Siōng-tè;

I sī góa ê tōa chio̍h-pôaⁿ, góa ê pī-lān-só͘.

8Bān-bîn ah, tio̍h put-sî óa-khò I,

tùi I thò͘-lō͘ lín ê sim-chêng.

Siōng-tè sī lán ê pī-lān-só͘.

9Lâng chin-chiàⁿ sī khang-hu,

ōe-sí ê lâng lóng sī hu-ké,

hē tī thian-phêng it-tēng phû--khí-lâi;

in ha̍p--khí-lâi iáu pí ho͘-khip ê khùi khah khin.

10M̄-thang khò pō-le̍k,

m̄-thang khò chhiúⁿ-toa̍t;

châi-pó ke-thiⁿ mā m̄-thang siūⁿ-beh khò i.

11Siōng-tè kóng chi̍t hāng,

góa thiaⁿ-tio̍h nn̄g hāng:

Koân-lêng sio̍k tī Siōng-tè,

12chû-ài mā sio̍k tī I.

Chú ah, lí beh chiàu ta̍k-lâng ê só͘-chòe kā i pò-èng.

Learn More About Us