Hap-kai-su 2

Hap-kai-su 2 - 現代台語譯本羅馬字版(TTVR)-闽南语

Sin Sèng-tiān ê Êng-kng

1Chhit-ge̍h jī-it, Siōng Chú thong-kè sian-ti Hap-kai thoân-ōe, kóng,

2“Taⁿ, lí tio̍h kā Sat-la-thiat ê kiáⁿ Iû-tāi séng-tiúⁿ Só͘-lô-pa-pek kap Iok-sat-ta̍t ê kiáⁿ tōa-chè-si Iâ-su-a, í-ki̍p só͘ chhun ê jîn-bîn kóng,

3‘Lín chiah-ê iáu oa̍h--teh ê lâng, sím-mi̍h-lâng bat khòaⁿ-tio̍h chit-ê tiān kó͘-chá ê êng-kng? Hiān-chāi lín khòaⁿ--tio̍h-ê sī sím-mi̍h khoán? Tī lín ê ba̍k-chiu chêng kiám m̄-sī sím-mi̍h lóng bô?’

4Siōng Chú kóng, ‘Só͘-lô-pa-pek, tio̍h kian-kiông! Iok-sat-ta̍t ê kiáⁿ tōa-chè-si Iâ-su-a, tio̍h kian-kiông!’ Siōng Chú kóng, ‘Só͘-ū tòa tī chit-tè tōe ê jîn-bîn, tio̍h kian-kiông!’ Siōng Chú — Bān-kun ê Thóng-sòe koh kóng, ‘Tio̍h chòe kang! Góa kap lín tông-chāi!

5Che sī kun-kù lín chhut Ai-ki̍p ê sî góa hō͘ lín ê èng-ún. Góa kè-sio̍k kap lín tông-chāi. M̄-bián kiaⁿ!’

6“Siōng Chú — Bān-kun ê Thóng-sòe án-ni kóng, ‘Koh bô-jōa-kú, góa beh koh chi̍t piàn hō͘ thiⁿ, tōe, hái, kap ta-tōe lóng iô-choah.’

7Siōng Chú — Bān-kun ê Thóng-sòe kóng, ‘Góa beh hō͘ bān-kok iô-choah, hō͘ bān-kok ê châi-pó ūn-lâi chia, hō͘ chit-ê tiān chhiong-móa êng-kng.’

8Siōng Chú — Bān-kun ê Thóng-sòe kóng, ‘Gûn sī góa ê, kim mā-sī góa ê.’

9Siōng Chú — Bān-kun ê Thóng-sòe koh kóng, ‘Sin-khí ê tiān ê êng-kng ōe chhiau-kè chá-chêng ê tiān ê êng-kng. Tī chit-ê só͘-chāi, góa beh siúⁿ-sù hô-pêng hoân-êng.’ Siōng Chú — Bān-kun ê Thóng-sòe án-ni soan-pò͘.”

Sian-ti Chhéng-kàu Chè-si

10 Tāi-liû-sū chē-ūi tē-jī nî káu-ge̍h jī-cha̍p-sì, Siōng Chú tùi sian-ti Hap-kai kóng,

11“Siōng Chú — Bān-kun ê Thóng-sòe án-ni kóng, ‘Lí khì kìⁿ chè-si, kā in mn̄g iú-koan lu̍t-hoat ê būn-tôe.

12Nā ū lâng ēng saⁿ-á-ku pau hōng-hiàn-kui-sèng ê bah, jiân-āu saⁿ-á-ku khì kha̍p-tio̍h piáⁿ, thng, chiú, iû, á-sī kî-tha chia̍h-mi̍h, hit-ê chia̍h-mi̍h kiám ōe-tàng sǹg-chòe sèng?’”

Chè-si ìn kóng, “Bōe.”

13 Hap-kai koh kóng, “Nā ū lâng bong-tio̍h si-thé soah bô chheng-khì, i bong--tio̍h ê chia̍h-mi̍h kiám ōe sǹg-chòe bô chheng-khì?”

Chè-si ìn kóng, “Ōe, hit-ê chia̍h-mi̍h sǹg-chòe bô chheng-khì.”

14Jiân-āu Hap-kai kóng, “Siōng Chú kóng, ‘Chit-ê chú-bîn, chit-ê kok tī góa ba̍k-chiu chêng chiū-sī án-ni; in ê chhiú só͘ chòe ta̍k-hāng kang-chok, só͘ hiàn ta̍k-hāng chè-mi̍h mā lóng bô chheng-khì.’”

Siōng Chú Èng-ún Sù-hok

15“Taⁿ lín tio̍h iōng-sim kiám-thó, tī Siōng Chú ê tiān tiông-kiàn í-chêng,

16lín án-chóaⁿ teh kè-ji̍t? Ū lâng khì ngó͘-kok-tui, siūⁿ-kóng ōe tit-tio̍h jī-cha̍p táu sió-be̍h, chí-ū tit-tio̍h cha̍p táu; khì chiú-tî, siūⁿ-kóng ōe tit-tio̍h gō͘-cha̍p tháng chiú, chí-ū tit-tio̍h jī-cha̍p tháng.

17Siōng Chú kóng, ‘Góa ēng hé-sio-hong, pīⁿ-hāi, peng-pha̍uh kā lín chhú-hoa̍t, lín iáu bô hóe-kái.

18Tùi kin-á-ji̍t, káu-ge̍h jī-sì, chiū-sī hē Siōng Chú sèng-tiān ê tōe-ki ê ji̍t khí, lín tio̍h iōng-sim kiám-thó, tio̍h séng-chhat.

19Chhng-khò͘--ni̍h iáu ū chéng-chí bô? Sui-jiân phû-tô-chhiū, bû-hoa-kó-chhiū, sia̍h-liû-chhiū, kaⁿ-ná-chhiū lóng iáu-bē kiat ké-chí, m̄-kú tùi kin-á-ji̍t khí góa beh sù-hok hō͘ lín.’”

Siōng Chú tùi Só͘-lô-pa-pek ê Èng-ún

20Siâng hit-ji̍t, chiū-sī káu-ge̍h jī-sì, Siōng Chú tē-jī piàn tùi Hap-kai kóng,

21“Lí khì kā Iû-tāi séng-tiúⁿ Só͘-lô-pa-pek kóng, ‘Góa teh-beh hō͘ thiⁿ kap tōe iô-choah,

22thui-hoan lia̍t-kok ê sè-le̍k, koh chiong-chí in ê koân-le̍k, chhia-tó chiàn-chhia kap sái-chhia--ê, hō͘ bé sí peng bông, kun-tiong hiaⁿ-tī hō͘-siōng chân-sat.’

23Siōng Chú — Bān-kun ê Thóng-sòe kóng, ‘Sat-la-thiat ê kiáⁿ, góa ê po̍k-jîn Só͘-lô-pa-pek, góa Siōng Chú kóng: Tī hit-ji̍t, góa beh ēng lí chòe góa ê chhiú-chí-ìn, in-ūi góa ū kéng-soán lí!’ Siōng Chú — Bān-kun ê Thóng-sòe án-ni soan-pò͘.”

Hap-kai-su 2 - 現代台語譯本羅馬字版(TTVR)-闽南语

Learn More About Us