Si-phian 33

Si-phian 33 - 現代台語譯本羅馬字版(TTVR)-闽南语

Tāi-pi̍t ê si, kau hō͘ sèng-ga̍k-tiúⁿ.Chheng-chàn Só͘ Gióng-bōng ê Chhòng-chō-chú

1Gī-lâng ah, tio̍h in-ūi Siōng Chú lâi hoaⁿ-hí;

chèng-ti̍t ê lâng eng-kai tio̍h chheng-chàn I.

2Lín tio̍h tôaⁿ-khîm kám-siā Siōng Chú,

ēng cha̍p tiâu hiân ê khiā-khîm chheng-chàn I,

3tôaⁿ hō͘ chin súi.

Tio̍h tùi I chhiùⁿ sin ê koa,

tōa-siaⁿ hoan-ho͘.

4In-ūi Siōng Chú ê ōe chèng-khak;

I ê chok-ûi lóng khó-khò.

5Siōng Chú ì-ài kong-pêng chèng-ti̍t;

I ê chû-ài phó͘-ki̍p choân-tōe.

6Kiong-chhong tùi Siōng Chú ê ōe chhòng-chō;

ji̍t, ge̍h, chhiⁿ-sîn tùi I ê chhùi pûn ê khùi chō-chiâⁿ.

7I kā hái-chúi chi̍p chòe-tui,

kā chhim-ian siu tī chhng-khò͘.

8Choân-tōe tio̍h kèng-ùi Siōng Chú;

sè-kan-lâng lóng tio̍h kiaⁿ-ùi I.

9I chi̍t-ē kóng, ú-tiū chiū chhut-hiān;

I chi̍t-ē bēng-lēng, bān-iú chiū hêng-sêng.

10Siōng Chú hō͘ lia̍t-pang ê kè-bô͘ lo̍k-khong,

hō͘ bān-bîn ê kè-bô͘ sit-hāu.

11Siōng Chú ê kè-ōe éng-oán bōe piàn;

I ê sim-ì sòa kàu bān sè-tāi.

12Jīn Siōng Chú chòe Siōng-tè hit-ê kok chin ū hok-khì!

Siū kéng-soán chòe I sán-gia̍p hit-ê chú-bîn chin ū hok-khì!

13Siōng Chú tùi thiⁿ-téng teh khòaⁿ,

khòaⁿ-kìⁿ lóng-chóng ê sè-kan-lâng.

14I tùi I ê pó-chō khòaⁿ--lo̍h-khì,

khòaⁿ tōe-chiūⁿ só͘-ū ê chū-bîn.

15I chō chèng-lâng ê sim,

liáu-kái in it-chhè ê chok-ûi.

16Kun-ông bōe in-ūi peng chōe chiū sèng-lī;

ióng-sū bōe in-ūi khùi-la̍t tōa chiū ōe iâⁿ.

17Khò chiàn-bé bô it-tēng ōe thâi-iâⁿ;

khò bé ê ui-le̍k bô it-tēng ōe kiù lâng.

18Siōng Chú ê ba̍k-chiu khòaⁿ-kò͘ kèng-ùi I ê lâng,

koàn-kò͘ gióng-bōng I chû-ài ê lâng.

19I ōe kiù in ê sìⁿ-miā thoat-lī sí-bông,

pó-chûn in tō͘-kè ki-hng.

20Goán ê sim-sîn thèng-hāu Siōng Chú;

I sī goán ê pang-chān, goán ê tún-pâi.

21Goán ê sim beh in-ūi I lâi hoaⁿ-hí,

in-ūi goán óa-khò I ê sèng-miâ.

22Siōng Chú ah, goān lí ê chû-ài si-lo̍h hō͘ goán,

in-ūi goán gióng-bōng lí.

Si-phian 33 - 現代台語譯本羅馬字版(TTVR)-闽南语

Learn More About Us