Ai-ko 4

Ai-ko 4 - 現代台語譯本羅馬字版(TTVR)-闽南语

Hām-lo̍h Āu ê Iâ-lō͘-sat-léng

1Ah, n̂g-kim kèng-jiân àm-tām bô kng,

sûn-kim kèng-jiân sit-khì kong-chhái!

Sèng-tiān ê chio̍h-thâu kèng-jiân sòaⁿ kah kui koe-lō͘.

2 Sek-an chun-kùi ê chú-bîn kè-ta̍t chhin-chhiūⁿ sûn-kim,

hiān-chāi soah hō͘ lâng khòaⁿ-chòe sio-hûi sai-hū chòe ê chho͘-hûi.

3Chhâi-lông iáu-kú hō͘ i ê kiáⁿ suh-lin,

góa ê chú-bîn kèng-jiân chân-jím chhin-chhiūⁿ khòng-iá ê tô-chiáu.

4Chia̍h-lin ê eⁿ-á bô lin thang suh,

chhùi-ta kah chhùi-chi̍h liâm tī téng-kiuⁿ;

gín-á thó chia̍h-mi̍h,

liân chi̍t-sut-á to bô lâng pun hō͘ in.

5Pêng-sî chia̍h san-tin-hái-bī ê lâng,

hiān-chāi gō-sí tī koe-lō͘;

kè-khì seng-oa̍h chhia-chhí ê lâng,

hiān-chāi tī pùn-sò-tui chhē mi̍h chia̍h.

6Siōng-tè chi̍t-ba̍k-nih-kú húi-bia̍t Só͘-to-má,

bô ēng lâng ê chhiú;

góa ê chú-bîn ê chōe,

pí Só͘-to-má chū-bîn ê chōe koh-khah tāng.

7Kè-khì, Sek-an ê Ná-sè-ní-lâng pí seh khah pe̍h,

pí lin khah sûn;

in ê seng-khu pí âng-pó-chio̍h khah âng,

siⁿ-chòe súi chhin-chhiūⁿ nâ-pó-chio̍h.

8Hiān-chāi, in ê bīn pí hé-thòaⁿ khah o͘,

siau-sán-lo̍h-bah,

sán kah chhin-chhiūⁿ chhâ;

in tī lō͘--ni̍h bô lâng ōe-jīn--tit.

9Hō͘ lâng thâi--sí-ê pí gō--sí-ê khah hó;

gō-sí sī bô chia̍h-mi̍h, bān-bān siau-sán lâi sí.

10Góa ê chú-bîn siū húi-bia̍t ê sî,

liân jîn-chû ê lāu-bú to chú ka-kī ê kiáⁿ chia̍h!

11Siōng Chú hoat tōa siū-khì,

piàⁿ-chhut pak-lāi ê lia̍t-hé,

ēng hé sio Sek-an,

liân tōe-ki mā kā i sio-húi.

12Sè-kan ê kun-ông kap tōe-chiūⁿ ê chū-bîn,

lóng bōe-tàng siong-sìn

ū tùi-te̍k ōe-tàng kong-ji̍p Iâ-lō͘-sat-léng ê siâⁿ-mn̂g.

13Che lóng sī in-ūi in sian-ti ê chōe-ok kap chè-si ê chōe-gia̍t;

in thâi-sí siâⁿ-lāi kong-gī chèng-ti̍t ê lâng.

14In chhin-chhiūⁿ bông-jîn tī koe-lō͘ sì-kòe se̍h,

kui seng-khu bak kah choân-choân huih,

bô lâng káⁿ bong-tio̍h in ê saⁿ, khióng-kiaⁿ bô chheng-khì.

15Lâng hoah in: Cháu! Siám-khui!

Lín chiah-ê bô chheng-khì ê lâng, mài óa--lâi!

In pìⁿ-chòe lān-bîn sì-kòe liû-lōng,

bô chi̍t ê kok-ka khéng siu-liû in.

16Siōng Chú chhin-sin kā in kóaⁿ-sòaⁿ,

bô koh khòaⁿ-kò͘ in;

chè-si bô siū khòaⁿ-tāng,

tiúⁿ-ló bô siū chun-tiōng.

17Goán khòaⁿ kah ba̍k-chiu hoe, iáu khòaⁿ bōe tio̍h kiù-chō͘ ê ǹg-bāng;

goán thèng-hāu koh-chài thèng-hāu--ê,

kèng-jiân sī chi̍t ê bô-la̍t kái-kiù goán ê kok-ka.

18Tùi-te̍k tui-chong goán ê kha-pō͘,

hāi goán m̄-káⁿ tī koe-lō͘ kiâⁿ.

Goán ê ji̍t-chí móa lah!

Goán ê kiat-kio̍k kàu lah!

19Tui-jip goán ê lâng pí khong-tiong teh pe ê eng-chiáu khah kín;

in tī soaⁿ--ni̍h tui-jip goán,

tī khòng-iá bâi-ho̍k thèng-hāu goán.

20Siōng Chú boah-iû soán-li̍p ê kun-ông sī goán ê sìⁿ-miā;

goán bat án-ni siūⁿ:

Tī i ê pó-hō͘-ē, goán ōe-tàng tī lia̍t-kok tiong seng-chûn.

M̄-kú i lo̍h tī hām-khiⁿ hō͘ lâng lia̍h--khì.

21 Í-tong-lâng, O͘-su ê chū-bîn ah,

chhut-chāi lín hoaⁿ-hí khoài-lo̍k!

Khó͘-poe mā ōe lûn kàu lín lim;

lín beh lim kah chiú-chùi, chhiah-sin-lō͘-thé.

22 Sek-an ah, lí chōe-kò ê hêng-hoa̍t í-keng móa,

Siōng Chú bōe koh hō͘ lí siū hòng-tio̍k.

Í-tong ah, Siōng Chú beh hêng-hoa̍t lí,

beh po̍k-lō͘ lí ê chōe-ok.

Ai-ko 4 - 現代台語譯本羅馬字版(TTVR)-闽南语

Learn More About Us