Hô-se-a-su 9

Hô-se-a-su 9 - 現代台語譯本羅馬字版(TTVR)-闽南语

Í-sek-lia̍t Eng-kai Siū ê Hêng-hoa̍t

1 Í-sek-lia̍t ah, m̄-thang chhin-chhiūⁿ gōa-cho̍k-lâng hoaⁿ-hí khèng-chiok,

in-ūi lín kiâⁿ îm-loān lī-khui Siōng-tè,

tī ta̍k-ê ngó͘-kok-tiûⁿ siu kiâⁿ-îm thàn ê chîⁿ.

2Ngó͘-kok-tiûⁿ kap chiú-khut bōe-tàng iúⁿ-chhī lín;

só͘ kî-thāi ê sin-chiú mā ōe lo̍k-khong.

3 Í-hoat-liân bōe-tàng koh tòa tī Siōng Chú ê tōe;

in ōe tò-tńg-khì Ai-ki̍p,

tī A-su̍t chia̍h bô chheng-khì ê mi̍h.

4In bōe-tàng koh ǹg Siōng Chú hiàn tiān-chiú-chè;

in hiàn ê chè bōe hō͘ I hoaⁿ-hí.

In ê chè-mi̍h chhin-chhiūⁿ hō͘ song-ka chia̍h ê mi̍h,

chia̍h ê lâng pìⁿ-chòe bô chheng-khì.

In ê chia̍h-mi̍h chí-ū ōe-tàng hō͘ in chí-ki,

bōe-ēng-tit the̍h ji̍p-khì Siōng Chú ê tiān.

5Tī só͘ tēng ê choeh-kî, kèng-pài Siōng Chú ê ji̍t,

lín beh chòe sím-mi̍h?

6In sui-jiân siám-kè chai-lān,

mā ōe hō͘ Ai-ki̍p ûi-khùn sat-hāi,

tī Bēng-húi-su hō͘ lâng siu-si bâi-chòng.

In ê kim-gûn châi-pó ōe hō͘ cha̍p-chháu khàm-ba̍t;

in tòa ê só͘-chāi chhì-phè móa-sì-kòe.

7Tio̍h hō͘ Í-sek-lia̍t chai,

hêng-hoa̍t ê ji̍t lâi lah,

pò-èng ê sî kàu lah.

Lín ê chōe tāng, chhiong-móa oàn-hūn,

só͘-í lín kóng, “Sian-ti sī gōng-lâng,

siū sîn kám-tōng--ê sī siáu-lâng.”

8Sian-ti siū Siōng-tè chí-phài chòe Í-sek-lia̍t ê siú-bōng-chiá;

i bô-lūn khì tó-ūi lóng ū lô-bāng teh tng-tán,

liân tī Siōng-tè ê ke to siū te̍k-sī.

9 Í-sek-lia̍t thiat-tóe hú-pāi,

chhin-chhiūⁿ in chá-chêng tī Ki-pí-a ê só͘-chòe.

Siōng-tè ōe-kì-tit in ê chōe,

beh hêng-hoa̍t in ê chōe-kò.

Í-sek-lia̍t ê Chōe kap Hō͘-kó

10Siōng Chú kóng,

“Thâu chi̍t piàn, góa tú-tio̍h Í-sek-lia̍t, chhin-chhiūⁿ tī khòng-iá khòaⁿ-tio̍h phû-tô;

góa tú-tio̍h lín ê lia̍t-chó͘, chhin-chhiūⁿ khòaⁿ-tio̍h thâu chi̍t kùi chho͘-se̍k ê bû-hoa-kó.

M̄-kú in chi̍t-ē kàu Pa-le̍k Pí-ní, chiū khai-sí khì pài hit só͘-chāi khó-ò͘ⁿ ê sîn-bêng,

in chiū pìⁿ-chòe kap in só͘ ài ê sîn-bêng siâng-khoán hiah-ni̍h thang iàm-ò͘ⁿ.

11 Í-hoat-liân ê êng-kng ōe chhin-chhiūⁿ chiáu pe--khì,

chhin-chhiūⁿ hū-jîn-lâng bōe siū-thai, bōe hoâi-īn, bōe siⁿ-kiáⁿ.

12In nā ōe siⁿ,

góa mā beh hō͘ hiah-ê gín-á chhī bōe tōa, bô lâu pòaⁿ-ê.

Góa nā pàng-sak in, in chiū chhiⁿ-chhám.

13Góa khòaⁿ, Í-sek-lia̍t ê kiáⁿ-jî chù-tiāⁿ tio̍h hō͘ lâng tui-jip chân-sat;

Í-hoat-liân ōe chhōa in ê kiáⁿ-jî chhut-lâi kau hō͘ tô͘-sat-chiá.”

14Siōng Chú ah, lí beh hō͘ in sím-mi̍h?

Tio̍h hō͘ in liû-sán, lin ta--khì.

Siōng Chú Sím-phòaⁿ Í-sek-lia̍t

15 Í-sek-lia̍t tī Kiat-kah chòe chīn pháiⁿ-tāi,

góa tī hia khai-sí oàn-hūn in.

In-ūi in só͘ chòe ê pháiⁿ, góa beh tùi góa ê ke kā in kóaⁿ--chhut-khì;

góa bōe koh thiàⁿ-sioh in;

in ê siú-léng mā lóng pōe-poān góa.

16 Í-hoat-liân siū phah-tó;

in ê kun ta--khì, bōe kiat ké-chí.

In nā siⁿ-kiáⁿ,

só͘ siⁿ ê pó-pòe-á-kiáⁿ, góa mā beh kā thâi-sí.

17Góa ê Siōng-tè it-tēng beh kā in khì-sak, in-ūi in m̄ thiaⁿ-thàn I.

In ōe tī lia̍t-kok tiong liû-lōng.

Hô-se-a-su 9 - 現代台語譯本羅馬字版(TTVR)-闽南语

Learn More About Us