Í-sài-a-su 59

Í-sài-a-su 59 - 現代台語譯本羅馬字版(TTVR)-闽南语

Put-gī kap Khi-ap Ōe Siū Hêng-hoa̍t

1Tio̍h chai, Siōng Chú ê chhiú-kut m̄-sī siuⁿ té kiù bōe tio̍h lâng;

I ê hī-khang mā m̄-sī siuⁿ tāng bōe thiaⁿ--kìⁿ.

2Sī lín ê chōe-ok chiong lín kap lín ê Siōng-tè keh-choa̍t;

lín ê chōe-kò hō͘ I ê bīn oa̍t-cháu, m̄ thiaⁿ lín ê kî-tó.

3In-ūi lín ê chhiú móa-móa sī huih, chńg-thâu-á hō͘ chōe-ok bak--tio̍h;

Lín ê chhùi-tûn kóng pe̍h-chha̍t, lín ê chhùi-chi̍h kóng siâ-ok.

4Bô lâng chiàu kong-gī kò-sò͘, mā bô lâng chiàu sêng-si̍t piān-hō͘;

in lóng sìn-nāi hu-ké, kóng pe̍h-chha̍t, pū to̍k-hāi, siⁿ chōe-gia̍t.

5In pū to̍k-chôa-nn̄g, khan ti-tu-bāng, chia̍h-tio̍h nn̄g ê lâng it-tēng sí;

chôa-nn̄g phòa, it-tēng chhut to̍k-chôa.

6In kiⁿ ê bāng bōe-tàng chòe saⁿ chhēng, bōe-tàng jia-khàm ka-kī;

in ê hêng-ûi lóng sī chōe-ok, in só͘ chòe--ê lóng sī kiông-pō.

7In ê kha chông-khì chòe pháiⁿ, kip beh lâu bû-ko͘ ê lâng ê huih;

in ê sim-su ì-liām lóng sī chōe-ok, kiâⁿ--kè ê lō͘ lóng sī thún-ta̍h húi-bia̍t.

8Hô-pêng ê lō͘, in m̄ bat; in kiâⁿ ê lō͘ bô chèng-ti̍t.

In ūi ka-kī chō oan-khiau ê lō͘;

kiâⁿ chit-khoán lō͘ ê lâng lóng bô pêng-an hô-pêng.

Jîn-bîn ūi-tio̍h Ka-kī ê Chōe Hoán-hóe

9In-ūi án-ni, Í-sek-lia̍t jîn-bîn kóng,

“Chèng-ti̍t lī-khui goán chin hn̄g,

kong-gī mā jip goán bōe tio̍h.

Goán kî-thāi kng-bêng, m̄-kú iáu-sī o͘-àm;

goán thèng-hāu kng-liāng, m̄-kú iáu kiâⁿ tī o͘-àm.

10Goán ná sit-bêng ê lâng bong chhiûⁿ-piah teh kiâⁿ;

tī tiong-tàu poa̍h-tó, ná-chhin-chhiūⁿ tī hông-hun;

goán chiu-ûi ê lâng lóng ióng-chòng, m̄-kú goán ná-chhin-chhiūⁿ sí-lâng.

11Goán chhin-chhiūⁿ hîm teh háu,

chhin-chhiūⁿ hún-chiáu teh ai-bêng.

Goán ǹg-bāng chèng-ti̍t, m̄-kú tán lóng bô;

goán kî-thāi chín-kiù, m̄-kú chín-kiù lī goán chin hn̄g.

12Goán tī lí bīn-chêng só͘ hoān ê chōe-kò chin chōe;

goán ê chōe choh-chèng khòng-kò goán.

Goán ê chōe-kò tè goán tè-tiâu-tiâu;

goán lóng chai goán ê chōe chin tāng.

13Goán pōe-ge̍k, khì-choa̍t Siōng Chú,

oa̍t-tńg-sin m̄ kun-tè goán ê Siōng-tè;

goán kè-bô͘ ap-pek kap hoán-poān,

sim chûn hu-ké, chhùi kóng pe̍h-chha̍t.

14Chèng-ti̍t chhò-pāi,

kong-gī tiām-tiām khiā-hn̄g-hn̄g;

chin-lí tī siâⁿ-mn̂g-kháu siak-tó,

sêng-si̍t bōe-tàng ji̍p--lâi.

15Chin-lí chhē bōe tio̍h;

lī-khui siâ-ok ê lâng hoán-tńg siū-hāi.”

Siōng Chú Beh Chín-kiù I ê Chú-bîn

Siōng Chú khòaⁿ-kìⁿ bô chèng-ti̍t, chin bô hoaⁿ-hí.

16I khòaⁿ bô lâng pang-chān siū khi-ap ê lâng, chin tio̍h-kiaⁿ,

chiū ēng ka-kī ê khùi-la̍t chín-kiù in,

ēng ka-kī ê kong-gī hû-chhî in.

17I ēng kong-gī chòe chiàn-kah chhēng,

ēng chín-kiù chòe thâu-khoe tì,

ēng pò-ho̍k chòe saⁿ chhēng,

ēng béng-lia̍t ê siū-khì chòe gōa-phàu moa.

18I beh chiàu lâng ê hêng-ûi kā in pò-èng,

beh tùi te̍k-jîn hoat tōa siū-khì,

kā tùi-te̍k pò-ho̍k,

tùi chèng hái-tó ê lâng pò-èng.

19Án-ni, sai-pêng ê lâng ōe kèng-ùi Siōng Chú ê miâ;

tang-pêng ê lâng ōe chun-chông I ê êng-kng.

In-ūi Siōng Chú ōe chhin-chhiūⁿ kip-liû ê hô-chúi chhiong--lâi,

I ê hong teh chhe, teh sàu.

20Ū chi̍t ūi Kiù-sio̍k-chú ōe lâi Sek-an,

lâi kàu hiah-ê ūi ka-kī ê pōe-poān hóe-kái ê Í-sek-lia̍t-lâng tiong-kan.

Siōng Chú án-ni soan-pò͘.

21Siōng Chú kā I ê chú-bîn kóng, “Góa kap lín li̍p ê iok sī án-ni: Góa ê sîn kap góa ê ōe lóng ōe tī lín tiong-kan; góa hē tī lín chhùi-lāi ê ōe it-tēng bōe lī-khui lín ê chhùi, mā bōe lī-khui lín ê kiáⁿ-sun kap lín kiáⁿ-kiáⁿ-sun-sun ê chhùi, tùi chit-sî ti̍t-kàu éng-oán.” Siōng Chú án-ni soan-pò͘.

Í-sài-a-su 59 - 現代台語譯本羅馬字版(TTVR)-闽南语

Learn More About Us