Iok-su-a-kì 8

Iok-su-a-kì 8 - 現代台語譯本羅馬字版(TTVR)-闽南语

Kong-chhú Ai-siâⁿ

1Siōng Chú tùi Iok-su-a kóng, “M̄-thang kiaⁿ, m̄-thang lún. Lí khí--lâi, chhōa lóng-chóng ê chiàn-sū khì kong-kek Ai-siâⁿ; góa í-keng chiong Ai-siâⁿ ê ông, kap i ê jîn-bîn, i ê siâⁿ, i ê thó͘-tōe lóng kau hō͘ lí lah.

2Lí án-chóaⁿ tùi-thāi Iâ-lī-ko kap i ê ông, mā tio̍h án-ni tùi-thāi Ai-siâⁿ kap i ê ông; m̄-kú lín chhiúⁿ--tio̍h ê châi-bu̍t kap cheng-siⁿ, thang chòe lín ê chiàn-lī-phín. Lí tio̍h phài peng bâi-ho̍k tī siâⁿ ê āu-bīn.”

3Tùi án-ni, Iok-su-a kap choân-thé ê chiàn-sū lóng khí--lâi, beh khì kong-chhú Ai-siâⁿ. Iok-su-a kéng saⁿ-bān ê kiông-béng ê ióng-sū, phài in mî--sî khì,

4hoan-hù in, kóng, “Lín tio̍h bâi-ho̍k tī siâⁿ ê āu-bīn, m̄-thang lī siâⁿ siuⁿ hn̄g; lóng tio̍h chún-pī hó-sè.

5Góa kap góa chhōa ê chiàn-sū beh ǹg siâⁿ chìn-kong; in ōe chhin-chhiūⁿ téng-piàn chhut-lâi kong-kek goán, hit-sî goán chiū beh tī in ê bīn-chêng tô-cháu.

6In ōe chhut-lâi tui-jip goán, siūⁿ-kóng, ‘Chiah-ê lâng ōe chhin-chhiūⁿ téng-piàn tī goán ê bīn-chêng tô-cháu.’ Só͘-í goán beh tī in ê bīn-chêng tô-cháu, kàu goán ín-iú in lī-khui siâⁿ.

7Hit-sî lín tio̍h tùi bâi-ho̍k ê só͘-chāi khí--lâi, toa̍t-chhú hit-ê siâⁿ, in-ūi Siōng Chú — lín ê Siōng-tè ōe chiong chit-ê siâⁿ kau tī lín ê chhiú.

8Lín chiàm-léng chit-ê siâⁿ liáu-āu, tio̍h ēng hé sio siâⁿ, chiàu Siōng Chú ê ōe khì chòe. Chù-ì, che sī góa ê bēng-lēng.”

9Iok-su-a phài in khì, in chiū khì bâi-ho̍k tī Ai-siâⁿ ê sai-pêng, Pek-te̍k-lī kap Ai-siâⁿ ê tiong-kan. Hit-mî, Iok-su-a kap chiàn-sū chòe-hé tī kun-iâⁿ hioh-khùn.

10Keh-ji̍t, Iok-su-a thàu-chá khí--lâi, tiám-sǹg chiàn-sū; i kap Í-sek-lia̍t ê tiúⁿ-ló tī jîn-bîn ê thâu-chêng chhut-hoat khì Ai-siâⁿ.

11Kap i chòe-hé ê chiàn-sū, lóng pek-kūn siâⁿ ê thâu-chêng, tī Ai-siâⁿ ê pak-pêng chat-iâⁿ; tī i kap Ai-siâⁿ ê tiong-kan ū keh chi̍t ê soaⁿ-kok.

12I ū kéng tāi-iok gō͘-chheng lâng bâi-ho̍k tī Ai-siâⁿ ê sai-pêng, Pek-te̍k-lī kap Ai-siâⁿ ê tiong-kan.

13Iok-su-a pò͘-tì chiàn-sū, chú-le̍k-kun tī Ai-siâⁿ ê pak-pêng, bâi-ho̍k ê peng tī siâⁿ ê sai-pêng. Hit-mî Iok-su-a chìn-ji̍p soaⁿ-kok.

14Ai-siâⁿ ê ông khòaⁿ--tio̍h, i kap siâⁿ-lāi ê lâng thàu-chá kóaⁿ-kín chhut-hoat, chhut-khì kàu A-la-pa thâu-chêng ê chiàn-tiûⁿ, beh kap Í-sek-lia̍t-lâng kau-chiàn; m̄-kú ông m̄ chai tī siâⁿ ê āu-bīn ū peng bâi-ho̍k.

15Iok-su-a kap Í-sek-lia̍t ê chiàn-sū tī in ê thâu-chêng ké thâi-su, tùi khòng-iá ê lō͘ tô-cháu.

16Ai-siâⁿ só͘-ū ê jîn-bîn lóng tiàu-chi̍p óa-lâi tui-jip in. In tui-jip Iok-su-a, chiū siū ín-iú lī-khui in ê siâⁿ.

17Ai-siâⁿ kap Pek-te̍k-lī-siâⁿ choân-pō͘ ê lâng lóng chhut-khì tui-jip Í-sek-lia̍t-lâng; siâⁿ-mn̂g pàng-khui-khui, khì tui-jip Í-sek-lia̍t-lâng.

18Siōng Chú tùi Iok-su-a kóng, “Lí chhun-chhut chhiú--ni̍h ê chhiuⁿ kí Ai-siâⁿ; góa beh chiong i kau hō͘ lí.” Iok-su-a chiū chhun-chhut chhiú--ni̍h ê chhiuⁿ kí hit-ê siâⁿ.

19I chi̍t-ē chhun-chhiú, bâi-ho̍k ê peng chiū tùi in ê só͘-chāi sûi-sî khí--lâi, ji̍p-khì chiàm-léng hit-ê siâⁿ, sûi-sî pàng-hé sio.

20Ai-siâⁿ ê lâng oa̍t-thâu chi̍t-ē khòaⁿ; khòaⁿ-tio̍h siâⁿ-lāi hé-ian chhèng-chiūⁿ thiⁿ, chiū sì-kòe chông, m̄-chai beh cháu-khì tó-ūi. Hiah-ê ké-su cháu-khì khòng-iá ê Í-sek-lia̍t-lâng, chiū hoan-thâu lâi kong-kek tui-jip in.

21Iok-su-a kap Í-sek-lia̍t ê chiàn-sū khòaⁿ-tio̍h bâi-ho̍k ê peng í-keng chhú siâⁿ, siâⁿ-lāi hé-ian chhèng-chiūⁿ koân, chiū hoán-kek thâi-sí Ai-siâⁿ ê lâng.

22Bâi-ho̍k ê peng mā chhut-lâi kong-kek in; in siū Í-sek-lia̍t-lâng pau-ûi, lóng hō͘ Í-sek-lia̍t-lâng thâi-sí; bô chi̍t ê oa̍h--teh, bô chi̍t ê tô-cháu.

23Í-sek-lia̍t-lâng oa̍h-lia̍h Ai-siâⁿ ê ông, ah i khì Iok-su-a hia.

24 Í-sek-lia̍t-lâng tī chhân-iá, tī khòng-iá thâi-sí só͘-ū jip in ê Ai-siâⁿ chiàn-sū; in koh tò-tńg-lâi Ai-siâⁿ, ēng to thâi-sí siâⁿ-lāi ê lâng.

25Hit-ji̍t Ai-siâⁿ só͘-ū ê lâng lóng hō͘ in thâi-sí, lâm-lú kiōng chi̍t-bān nn̄g-chheng lâng.

26Ai-siâⁿ só͘-ū ê lâng lóng siū châu-bia̍t, Iok-su-a chiah siu-hôe i gia̍h-chhiuⁿ ê chhiú.

27Í-sek-lia̍t-lâng chiū chiàu Siōng Chú bēng-lēng Iok-su-a ê ōe, chiong siâⁿ-lāi ê cheng-siⁿ kap châi-bu̍t, lóng chhiúⁿ-lâi chòe ka-kī ê chiàn-lī-phín.

28Iok-su-a chiong Ai-siâⁿ pàng-hé sio, hō͘ i éng-oán chòe thô͘-tui, kàu kin-á-ji̍t iáu hong-hòe.

29I koh chiong Ai-siâⁿ ê ông tiàu tī chhiū-téng, kàu hông-hun; ji̍t lo̍h ê sî, i hā-lēng, lâng chiah tùi chhiū-téng siu sin-si lo̍h--lâi, hiat tī siâⁿ-mn̂g-kháu; tī hit téng-bīn thia̍p chi̍t-tōa-tui chio̍h-thâu, kàu kin-á-ji̍t iáu lâu--teh.

Tī Í-pa-lō͘-soaⁿ Soan-tho̍k Lu̍t-hoat

30Hit-sî, Iok-su-a tī Í-pa-lō͘-soaⁿ, ūi Siōng Chú — Í-sek-lia̍t ê Siōng-tè khí chi̍t chō chè-tôaⁿ,

31sī chiàu Siōng Chú ê po̍k-jîn Mô͘-se tùi Í-sek-lia̍t-lâng ê bēng-lēng, chiàu Mô͘-se lu̍t-hoat ê chheh kì-chài--ê, ēng bô keng-kè thih-khì phah--kè ê kui-lia̍p chio̍h-thâu khí--ê; in tī chit-ê tôaⁿ-téng hiàn sio-hòa-chè kap pêng-an-chè hō͘ Siōng Chú.

32Iok-su-a tī Í-sek-lia̍t-lâng ê bīn-chêng chiong Mô͘-se ê lu̍t-hoat chhau-siá tī chio̍h-thâu téng.

33Só͘-ū ê Í-sek-lia̍t-lâng, bô-lūn sī pún-cho̍k-lâng á-sī gōa-cho̍k-lâng, lóng kap in ê tiúⁿ-ló, koaⁿ-tiúⁿ, í-ki̍p sím-phòaⁿ-koaⁿ, khiā tī iok-kūi ê siang-pêng, bīn ǹg kng Siōng Chú iok-kūi ê Lī-bī-lâng chòe chè-si--ê, chi̍t-pòaⁿ biān-tùi Ki-lī-sim-soaⁿ, chi̍t-pòaⁿ biān-tùi Í-pa-lō͘-soaⁿ. Iok-su-a chiàu Siōng Chú ê po̍k-jîn Mô͘-se í-chêng só͘ bēng-lēng--ê, kā Í-sek-lia̍t jîn-bîn chiok-hok.

34Jiân-āu, Iok-su-a soan-tho̍k lu̍t-hoat ê chheh só͘ kì-chài lóng-chóng chiok-hok kap chiù-chó͘ ê ōe.

35Mô͘-se só͘ bēng-lēng it-chhè ê ōe, Iok-su-a tī Í-sek-lia̍t ê choân-thé hōe-chiòng, kap hū-jîn-lâng, gín-á, í-ki̍p in tiong-kan ê gōa-cho̍k-lâng ê bīn-chêng, bô chi̍t kù bô tha̍k.

Iok-su-a-kì 8 - 現代台語譯本羅馬字版(TTVR)-闽南语

Learn More About Us