Si-phian 99 - 現代台語譯本羅馬字版(TTVR)-闽南语

Chun-chông Chì-sèng ê Siōng-tè

1Siōng Chú choh-ông, bān-bîn ngia̍uh-ngia̍uh-chhoah;

I chē tī thiⁿ-sài ki-lō͘-pek pó-chō téng, tāi-tōe iô-tāng.

2Siōng Chú tī Sek-an choh-tōa;

I siū bān-bîn chun-chông.

3Goān in chheng-chàn I úi-tāi thang kiaⁿ-ùi ê miâ.

I sī chì-sèng!

4Ū tōa koân-le̍k ê Ông ah, lí ì-ài chèng-ti̍t;

lí kiàn-li̍p kong-pêng,

tī Í-sek-lia̍t si-hêng chèng-ti̍t kong-gī.

5Tio̍h chun-chông Siōng Chú — lán ê Siōng-tè,

tī I kha-tiam ê thâu-chêng kūi-pài;

I sī chì-sèng!

6Tī I ê chè-si tiong ū Mô͘-se kap A-lûn;

tī kiû-kiò I ê miâ ê lâng tiong-kan ū Sat-bó-ní;

in kiû-kiò Siōng Chú, I ū ìn-tap.

7I tī hûn-thiāu tiong tùi in kóng-ōe;

in chun-siú I pan-pò͘ ê kài-bēng kap kui-lē.

8Siōng Chú — goán ê Siōng-tè ah, lí ū ìn-tap in;

sui-jiân lí ū chiàu in ê só͘-chòe kā in pò-èng,

iáu-kú lí sī sià-bián in ê Siōng-tè.

9Tio̍h chun-chông Siōng Chú — lán ê Siōng-tè,

tī I ê sèng-soaⁿ kūi-pài.

Siōng Chú — lán ê Siōng-tè chì-sèng!

Learn More About Us