Si-phian 25

Si-phian 25 - 現代台語譯本羅馬字版(TTVR)-闽南语

Tāi-pi̍t ê si.Kiû Siōng Chú Ín-chhōa Pó-hō͘

1Siōng Chú ah, góa ê sim-sîn gióng-bōng lí!

2Góa ê Siōng-tè ah, góa sìn-khò lí!

M̄-thang hō͘ góa sit-pāi tì-kàu kiàn-siàu;

m̄-thang hō͘ góa ê tùi-te̍k in-ūi iâⁿ góa lâi khoa-kháu.

3Só͘-ū thèng-hāu lí pang-chān ê lâng it-tēng bōe tì-kàu kiàn-siàu;

ōe tú-tio̍h kiàn-siàu--ê sī hiah-ê bô-iân-bô-kò͘ pōe-poān lí ê lâng.

4Siōng Chú ah, kiû lí chiong lí ê lō͘ chí-sī góa,

chiong lí ê tō kà-sī góa.

5Kiû lí ēng lí ê chin-lí ín-chhōa góa, kà-sī góa,

in-ūi lí sī chín-kiù góa ê Siōng-tè.

Góa kui-ji̍t thèng-hāu lí.

6Siōng Chú ah, kiû lí ōe-kì-tit lí ê lîn-bín kap chû-ài,

in-ūi lí tùi kó͘-chá chiū án-ni tùi-thāi lâng.

7Kiû lí m̄-thang kì-tiâu góa siàu-liân ê sî ê chōe-kò kap kè-sit;

Siōng Chú ah, kiû lí chiàu lí ê chû-ài, in-ūi lí ê un-hūi ōe-kì-tit góa.

8In-ūi Siōng Chú liông-siān koh chèng-ti̍t,

I beh chí-sī chōe-jîn kiâⁿ chiàⁿ-lō͘.

9I beh ēng kong-pêng ín-chhōa khiam-pi ê lâng,

ēng I ê tō-lō͘ kà-sī khiam-sùn ê lâng.

10Siú I ê iok kap I ê kài-bēng ê lâng,

Siōng Chú lóng ēng chû-ài kap sìn-si̍t khoán-thāi in.

11Siōng Chú ah, góa ê chōe chin tāng,

kiû lí sià-bián góa.

12Kèng-ùi Siōng Chú ê lâng,

Siōng Chú beh chí-sī i só͘ tio̍h kéng ê lō͘.

13I ê sim-sîn ōe tit-tio̍h an-hioh;

i ê hō͘-tāi ōe sêng-chiap só͘ èng-ún ê thó͘-tōe.

14Siōng Chú kap kèng-ùi I ê lâng chhin-bi̍t,

beh chiong I ê iok chí-sī in.

15Góa ê ba̍k-chiu put-sî gióng-bōng Siōng Chú,

I beh hō͘ góa ê kha thoat-lī lô-bāng.

16Kiû lí oa̍t kè-lâi khòaⁿ góa, lîn-bín góa,

in-ūi góa ko͘-toaⁿ khùn-khó͘.

17Góa sim-lāi ū chin chōe iu-khó͘,

kiû lí kiù góa thoat-lī lóng-chóng ê hoān-lān.

18Kiû lí koan-sim góa ê kan-lân khùn-khó͘,

tû-khì góa it-chhè ê chōe.

19Lí khòaⁿ, góa ê tùi-te̍k hiah-ni̍h chōe;

in chin ok-to̍k oàn-hūn góa.

20Kiû lí pó-hō͘ góa ê sìⁿ-miā, chín-kiù góa,

hō͘ góa bô sit-pāi tì-kàu kiàn-siàu, in-ūi góa óa-khò lí.

21Goān sûn-choân chèng-ti̍t pó-hō͘ góa,

in-ūi góa gióng-bōng lí.

22Siōng-tè ah, kiû lí kiù-sio̍k Í-sek-lia̍t

thoat-lī it-chhè ê chai-lān.

Si-phian 25 - 現代台語譯本羅馬字版(TTVR)-闽南语

Learn More About Us