Iâ-lī-bí-su 51

Iâ-lī-bí-su 51 - 現代台語譯本羅馬字版(TTVR)-闽南语

Koh-chài Sím-phòaⁿ Pa-pí-lûn

1Siōng Chú án-ni kóng,

“Khòaⁿ leh, góa beh ēng húi-bia̍t ê tōa-hong

kong-kek Pa-pí-lûn kap i ê jîn-bîn.

2Góa beh phài gōa-kok-lâng lâi chhim-hoān Pa-pí-lûn,

chhin-chhiūⁿ tōa-hong teh pòa be̍h-sūi;

in beh kā i ê kok-thó͘ pòa kah khang-khang-khang.

Húi-bia̍t ê ji̍t chi̍t-ē kàu,

in beh tùi sì-chiu-ûi lâi kong-kek Pa-pí-lûn.

3M̄-thang hō͘ Pa-pí-lûn siā-chìⁿ ê peng siā-chìⁿ,

m̄-thang hō͘ in ū ki-hōe bú-chong--khí-lâi;

in ê siàu-liân-lâng lín m̄-bián kā in tin-sioh,

tio̍h kā in choân-pō͘ ê kun-tūi siau-bia̍t.

4 Pa-pí-lûn-lâng ōe tī ka-kī ê siâⁿ-chhī siū-thâi,

tī ta̍k-tiâu koe-lō͘ hō͘ lâng tô͘-sat.

5 Í-sek-lia̍t kap Iû-tāi sui-jiân tī ta̍k só͘-chāi tek-chōe góa Í-sek-lia̍t sîn-sèng ê Siōng-tè,

m̄-kú in iáu bô hō͘ Siōng Chú — Bān-kun ê Thóng-sòe, in ê Siōng-tè khì-sak.

6Tio̍h kóaⁿ-kín tô-cháu, lī-khui Pa-pí-lûn,

sûi-lâng kò͘ sìⁿ-miā.

M̄-thang in-ūi in ê chōe, kap in chòe-hé bia̍t-bông;

in-ūi Siōng Chú pò-siû ê sî í-keng kàu,

góa beh hō͘ Pa-pí-lûn siū pò-èng.

7 Pa-pí-lûn í-chêng sī Siōng Chú chhiú-tiong ê kim-poe,

hō͘ choân-tōe ê lâng lóng lim kah chùi-bâng-bâng;

lia̍t-kok bat lim i ê chiú, lim kah hoat-kông.

8 Pa-pí-lûn ōe hut-jiân tó-hoāi, húi-bia̍t.

Lín tio̍h ūi i ai-khàu!

Tio̍h kā i boah jú-hiuⁿ, kiám-khin i ê thàng-thiàⁿ,

i khó-lêng iáu i ōe hó.”

9Tòa tī Pa-pí-lûn ê gōa-kok-lâng kóng,

“Goán bat siūⁿ beh i Pa-pí-lûn, m̄-kú bô-hāu.

Hiān-chāi lán tio̍h lī-khui,

ta̍k-ê lâng tò-khì ka-kī ê kò͘-hiong;

in-ūi Pa-pí-lûn só͘ beh siū ê hêng-hoa̍t chin tōa,

tōa kah tú-thiⁿ, thàng kàu kiong-chhong.”

10Siōng Chú ê chú-bîn teh hoan-ho͘,

“Siōng Chú í-keng soan-pò͘ lán kong-gī bô-chōe.

Lâi! Lán tio̍h tī Sek-an soan-iông Siōng Chú — lán ê Siōng-tè ê chok-ûi.”

11Siōng Chú koat-tēng beh húi-bia̍t Pa-pí-lûn, chiū kek-tōng Bí-tí-a ê kun-ông lâi kong-kek i; che sī Siōng Chú beh pò-siû, beh ūi-tio̍h I siū húi-hoāi ê sèng-tiān pò-ho̍k. Chí-hui-koaⁿ hā-lēng,

“Chìⁿ bôa hō͘ chiam,

tún-pâi gia̍h hō͘ tiâu.

12Chhāi tōa-kî chòe sìn-hō,

kong-kek Pa-pí-lûn ê siâⁿ-chhiûⁿ;

ka-kiông kò͘-siú siú-bōng-tâi,

phài ōe-peng lûn-pan, koh phài lâng bâi-ho̍k.”

Koan-hē Pa-pí-lûn chū-bîn ê miā-ūn, Siōng Chú án-ni koat-tēng, mā án-ni si̍t-hiān.

13 Pa-pí-lûn ah, lí ê kéng-lāi ū chin chōe hô-liû,

koh chek-chū chin chōe châi-pó,

m̄-kú lí ê chiong-kio̍k kàu lah!

Lí ê sìⁿ-miā kàu chia ûi-chí!

14Siōng Chú — Bān-kun ê Thóng-sòe kí ka-kī li̍p-sè kóng,

“Góa beh tiàu-chi̍p chhin-chhiūⁿ chháu-meh hiah-ni̍h chōe ê tāi-kun,

chhim-chiàm lín ê thó͘-tōe;

in ōe tùi lín hoat-chhut sèng-lī ê hoan-ho͘.”

Chheng-chàn Siōng Chú

15Siōng Chú ēng ka-kī ê tāi-lêng chhòng-chō tāi-tōe,

ēng I ê tì-hūi kian-li̍p sè-kài,

ēng chhong-bêng thí-khui kiong-chhong.

16Siōng Chú chi̍t-ē chhut-siaⁿ, thiⁿ-téng ê chúi chiū ká-kún,

hûn-bū chiū tùi thiⁿ-piⁿ-hái-kak chhèng--chhut-lâi;

I tùi hō͘ ê tiong-kan siā-chhut sih-nà,

tùi I ê chhng-khò͘ sàng hong chhut--lâi.

17Sè-kan-lâng lóng gû-gōng bû-ti;

ta̍k-ê phah-kim sai-hū lóng ūi-tio̍h ka-kī chō ê sîn-siōng kiàn-siàu;

in-ūi in chù ê sîn-siōng lóng sī hu-ké, lāi-bīn bô sìⁿ-miā.

18Ngó͘-siōng lóng sī hu-ké,

sī lâng thí-chhiò ê tùi-siōng;

hêng-hoa̍t chi̍t-ē kàu, in lóng ōe siau-sit.

19Choh Ngá-kok sán-gia̍p ê Siōng-tè kap in bô kâng-khoán;

I sī chhòng-chō bān-iú ê Chú;

Í-sek-lia̍t sī I ê chú-bîn, sī I ê sán-gia̍p.

I ê chheng-ho͘ sī Siōng Chú — Bān-kun ê Thóng-sòe.

Siōng Chú ê Thih-thûi

20Siōng Chú kóng,

“Pa-pí-lûn ah, lí sī góa ê thih-thûi kap bú-khì;

góa bat ēng lí kòng-chhùi lia̍t-pang,

húi-bia̍t lia̍t-kok;

21bat ēng lí phah-pāi chiàn-bé kap khiâ-bé--ê;

phah-chhùi chiàn-chhia kap sái-chhia--ê;

22bat ēng lí thâi-sí ta-po͘-lâng kap hū-jîn-lâng;

thâi-sí lāu-lâng kap gín-á;

thâi-sí siàu-liân-lâng kap siàu-lú;

23bat ēng lí thâi-sí bo̍k-chiá kap i ê iûⁿ-kûn;

thâi-sí choh-sit-lâng kap i ê gû;

thâi-sí chóng-tok kap koaⁿ-oân.”

Hêng-hoa̍t Pa-pí-lûn

24Siōng Chú kóng, “Lín beh chhin-ba̍k khòaⁿ-tio̍h góa pò-èng Pa-pí-lûn kap i ê chū-bîn, in-ūi in choh-pháiⁿ siong-hāi Sek-an.

25 Pa-pí-lûn ah, lí sī húi-bia̍t choân-tōe ê tōa-soaⁿ;

lí khòaⁿ, góa beh kong-kek lí,

beh chhun-chhiú tùi soaⁿ-giâm kā lí chhia--lo̍h-khì,

hō͘ lí pìⁿ-chòe sio-húi ê soaⁿ.

26Lâng bōe koh tùi lí hia the̍h chio̍h-thâu chòe chhù-kak-chio̍h,

á-sī chòe tōe-ki;

in-ūi lí ōe éng-oán hong-hòe.”

Siōng Chú án-ni soan-pò͘.

27“Tio̍h tī kéng-lāi chhāi tōa-kî chòe sìn-hō,

tī lia̍t-kok tiong pûn sàu-kak,

tiàu-chi̍p lia̍t-kok lâi kong-kek Pa-pí-lûn.

Tio̍h chio-chi̍p A-la-la̍h, Bí-nî, A-si̍t-ki-ná lâi kong-kek Pa-pí-lûn;

koh phài chiong-kun chí-hui chok-chiàn,

tiàu-chi̍p chhin-chhiūⁿ chháu-meh hiah-ni̍h chōe ê bé-peng chiūⁿ--lâi.

28Tio̍h chio-chi̍p lia̍t-kok, Bí-tí-a ê kun-ông,

chóng-tok, koaⁿ-oân, kap in só͘ koán ta̍k-kok ê kun-tūi,

lâi kong-kek Pa-pí-lûn.

29Tōe tōa tín-tāng koh tńg-se̍h;

in-ūi Siōng Chú kong-kek Pa-pí-lûn ê chí-ì í-keng khak-tēng,

beh hō͘ Pa-pí-lûn ê thó͘-tōe hong-hòe, bô lâng khiā-khí.

30 Pa-pí-lûn ê ióng-sū bô beh koh kau-chiàn,

lóng bih tī pó-lúi lāi-bīn;

in khùi-la̍t ēng-chīn,

chhin-chhiūⁿ hū-jîn-lâng bô-la̍t kâng-khoán.

Pa-pí-lûn ê chhù-the̍h hō͘ hé sio-liáu-liáu,

in ê siâⁿ-mn̂g hō͘ lâng lòng-phòa.

31Sàng-phoe--ê liân-sòa cháu--lâi,

pò siau-sit--ê chi̍t-ê koh chi̍t-ê,

lóng cháu-lâi beh pò hō͘ Pa-pí-lûn-ông chai,

siâⁿ ta̍k-pêng lóng hō͘ lâng kong-phòa,

32hô ê tō͘-kháu hō͘ te̍k-jîn chiàm--khì,

chúi-tî ê lô͘-úi hō͘ hé sio--khì,

chiàn-sū lóng kiaⁿ kah phòa-táⁿ.

33Siōng Chú — Bān-kun ê Thóng-sòe, Í-sek-lia̍t ê Siōng-tè soan-pò͘:

Pa-pí-lûn ōe chhin-chhiūⁿ ngó͘-kok-tiûⁿ,

hō͘ lâng ta̍h kah pîⁿ-pîⁿ-pîⁿ;

koh bô-jōa-kú, siu-sêng ê sî chiū kàu lah!”

Siōng Chú Beh Pang-chān Í-sek-lia̍t

34 Iâ-lō͘-sat-léng-lâng kóng:

“Pa-pí-lûn-ông Nî-pò͘-kah-nî-sat kā goán thun-bia̍t,

kā goán teh-chhùi,

koh hō͘ goán chhin-chhiūⁿ piàⁿ-khang ê khì-khū;

i chhin-chhiūⁿ hái-koài kā goán thun--lo̍h-khì,

chiong goán ê pó-pòe chia̍h-liáu-liáu, chiū kā goán phùi--chhut-lâi.”

35 Sek-an ê chū-bîn kóng:

“Pa-pí-lûn-lâng ge̍k-thāi goán kap goán ê chhin-cho̍k,

goān in siū pò-ho̍k!”

Iâ-lō͘-sat-léng-lâng kóng:

“In lâu goán ê huih, goān in chiah-ê chōe siū pò-èng!”

36Só͘-í Siōng Chú án-ni kóng,

“Khòaⁿ leh, góa beh thòe lín sin-oan,

beh ūi lín pò-siû;

góa beh hō͘ Pa-pí-lûn ê hô bô chúi,

hō͘ i ê chúi-goân lóng ta--khì.

37 Pa-pí-lûn beh pìⁿ-chòe thô͘-tui,

chiâⁿ-chòe chhâi-lông tòa ê só͘-chāi,

hō͘ lâng tio̍h-kiaⁿ thí-chhiò,

bô lâng khiā-khí.

38 Pa-pí-lûn chhin-chhiūⁿ ióng-béng ê sai hm̄-hm̄-háu,

koh chhin-chhiūⁿ sòe-chiah sai teh kiò.

39-40In ê si̍t-io̍k chi̍t-ē khí, góa chiū thòe in pān-toh,

hō͘ in khoài-lo̍k, hō͘ in lim kah chiú-chùi,

éng-oán khùn bōe chhíⁿ.

Góa beh chhin-chhiūⁿ teh kóaⁿ iûⁿ-á,

kóaⁿ mî-iûⁿ-káng, soaⁿ-iûⁿ-káng,

kóaⁿ in lo̍h-khì tô͘-sat-tiûⁿ.”

Siōng Chú án-ni soan-pò͘.

Pa-pí-lûn ê Miā-ūn

41Siōng Chú kóng,

“Pa-pí-lûn

kèng-jiân siū kong-phòa!

Choân sè-kài lóng teh chheng-chàn ê tōa-siâⁿ kèng-jiân siū chiàm-léng!

Lia̍t-kok khòaⁿ-tio̍h i lóng tio̍h-kiaⁿ!

42Hái-chúi tiòng-koân, im-kè Pa-pí-lûn;

hōa-hōa-háu ê hái-éng kā i khàm--khí-lâi.

43 Pa-pí-lûn ê siâⁿ-tìn pha-hng,

thó͘-tōe ta-khok-khok, pìⁿ-chòe soa-bô͘,

bô lâng khiā-khí, mā bô lâng keng-kè.

44Góa beh hêng-hoa̍t Pa-pí-lûn ê sîn-bêng Pí-le̍k,

kiò i thò͘-chhut thun--lo̍h-khì ê châi-bu̍t;

lia̍t-kok bōe koh khì kèng-pài i.

“Pa-pí-lûn ê siâⁿ-chhiûⁿ tó-hoāi lah!

45Góa ê chú-bîn ah, tio̍h kóaⁿ-kín tô-cháu, lī-khui Pa-pí-lûn!

Ta̍k-ê lâng kiù ka-kī ê sìⁿ-miā, siám-pī Siōng Chú ê tōa siū-khì.

46Lín m̄-thang sit-táⁿ,

m̄-bián in-ūi kéng-lāi ê hong-siaⁿ kiaⁿ-hiâⁿ;

in-ūi múi-nî lóng ū hong-siaⁿ thoân--lâi,

kéng-lāi ū kiông-pō ê sū,

léng-siù hō͘-siōng tò͘-cheng.

47Khòaⁿ leh, sî-ji̍t it-tēng ōe kàu,

góa beh hêng-hoa̍t Pa-pí-lûn ê ngó͘-siōng.

Pa-pí-lûn choân-kok lóng ōe tú-tio̍h kiàn-siàu;

siū thâi ê lâng ōe tó kah móa-sì-kòe.

48-49Hit-sî, húi-bia̍t-chiá tùi pak-hng lâi kàu Pa-pí-lûn,

thiⁿ-tōe kap kî-tiong só͘-ū--ê beh in-ūi Pa-pí-lûn tó-hoāi hoan-ho͘.

Pa-pí-lûn tī sè-kài ta̍k só͘-chāi thâi-sí chin chōe lâng,

mā thâi-sí chin chōe Í-sek-lia̍t-lâng,

ūi-tio̍h án-ni, i ōe siū húi-bia̍t.”

Siōng Chú án-ni soan-pò͘.

Hō͘ tī Pa-pí-lûn ê Í-sek-lia̍t-lâng ê Sìn-sit

50Siōng Chú kóng,

“Lín í-keng siám-pī to-kiàm,

tio̍h kín cháu, m̄-thang khiā tiàm hia.

Lín sui-jiân lī-khui kò͘-hiong chin hn̄g,

tio̍h ōe-kì-tit Siōng Chú, tio̍h siàu-liām Iâ-lō͘-sat-léng.

51Lín kóng, ‘Goán thiaⁿ-tio̍h lâng teh lóe-mē chiū kám-kak làu-khùi,

móa-bīn kiàn-siàu,

in-ūi gōa-pang-lâng ji̍p-khì Siōng Chú sèng-tiān ê sèng-só͘.’

52Só͘-í, sî-ji̍t it-tēng ōe kàu,

góa beh hêng-hoa̍t Pa-pí-lûn ê ngó͘-siōng;

Pa-pí-lûn kok-lāi ū chōe-chōe lâng siū-siong teh haiⁿ-haiⁿ-chhan.

53 Pa-pí-lûn sui-jiân peh-chiūⁿ thiⁿ,

koh kiông-hòa pó-lúi,

góa iû-goân beh chhe húi-bia̍t-chiá tùi-hù i.”

Siōng Chú án-ni soan-pò͘.

Pa-pí-lûn Ōe Bia̍t-bông

54“Tùi Pa-pí-lûn thoân-chhut ai-khàu ê siaⁿ,

tī Pa-pí-lûn hoat-seng tōa húi-bia̍t.

55In-ūi Siōng Chú beh húi-bia̍t Pa-pí-lûn,

siâⁿ-lāi bô koh ū soan-hoa ê siaⁿ.

Tùi-te̍k ê kun-tūi chhin-chhiūⁿ éng lōng-lōng-háu,

hoat-chhut hiáng-liāng ê siaⁿ.

56Ū húi-bia̍t-chiá lâi kong-kek Pa-pí-lûn;

Pa-pí-lûn ê ióng-sū hō͘ lâng lia̍h--khì,

in ê keng siū at-chi̍h;

Siōng Chú sī hêng-hoa̍t ê Siōng-tè,

it-tēng ōe pò-èng Pa-pí-lûn.

57Góa beh hō͘ Pa-pí-lûn ê kùi-cho̍k, tì-hūi ê lâng, chóng-tok, koaⁿ-oân, í-ki̍p ióng-sū

lóng lim kah chiú-chùi,

éng-oán khùn bōe chhíⁿ.”

Tōa kun-ông, Siōng Chú — Bān-kun ê Thóng-sòe án-ni soan-pò͘.

58Siōng Chú — Bān-kun ê Thóng-sòe án-ni kóng,

“Pa-pí-lûn khoan-khoah ê siâⁿ-chhiûⁿ ōe choân-pō͘ tó-hoāi,

koân-tōa ê siâⁿ-mn̂g ōe hō͘ hé sio-sio--khì.

Bān-bîn só͘ lô-lo̍k--ê lóng bô-chhái-kang,

bān-kok só͘ lô-le̍k--ê lóng sio-liáu-liáu;

in chiū lóng ià-siān.”

Iâ-lī-bí ê Sìn-sit thoân kàu Pa-pí-lûn

59 Iû-tāi-ông Se-tí-ka chē-ūi tē-sì nî, Má-se-ngá ê sun, Nî-lī-a ê kiáⁿ Se-lâi-ngá chòe ông-kiong chóng-koán; i kap ông chòe-hé khì Pa-pí-lûn ê sî, sian-ti Iâ-lī-bí ū ōe hoan-hù i.

60Iâ-lī-bí chiong teh-beh lîm-kàu Pa-pí-lûn ê chai-hō, chiū-sī iú-koan Pa-pí-lûn it-chhè ê ōe, lóng siá tī chi̍t kńg chheh.

61Iâ-lī-bí tùi Se-lâi-ngá kóng, “Lí khì kàu Pa-pí-lûn ê sî, tio̍h soan-tho̍k siá tī chit-ê chheh-kǹg ê ōe.

62Koh tio̍h kî-tó kóng, ‘Siōng Chú ah, koan-hē chit-ê só͘-chāi, lí bat kóng lí beh húi-bia̍t, hō͘ i éng-oán pha-hng, bô lâng khiā-khí, liân cheng-siⁿ mā cháu-liáu-liáu.’

63Se-lâi-ngá, lí kā chit-kńg chheh soan-tho̍k liáu-āu, tio̍h kā i pa̍k tī chi̍t tè chio̍h-thâu, hiat lo̍h-khì Iù-hoat-la-tí-hô,

64jiân-āu kóng, ‘Pa-pí-lûn ōe chhin-chhiūⁿ án-ni tîm--lo̍h-khì, bōe koh heng-khí; jîn-bîn mā lóng ià-siān, in-ūi Siōng Chú beh kàng chai-hō hō͘ in.’”

Iâ-lī-bí ê ōe kàu chia kiat-sok.

Iâ-lī-bí-su 51 - 現代台語譯本羅馬字版(TTVR)-闽南语

Learn More About Us