Si-phian 50

Si-phian 50 - 現代台語譯本羅馬字版(TTVR)-闽南语

A-sat ê si.Chin-sêng ê Kèng-pài

1Siōng Chú — Choân-lêng ê Siōng-tè tùi tang kàu sai chhut-siaⁿ,

ho͘-tiàu choân-tōe.

2Tùi súi bô-pí ê Sek-an,

Siōng-tè hoat-chhut kng.

3Lán ê Siōng-tè lâi-lîm, it-tēng bōe chēng-chēng;

ū iām-hé tī I bīn-chêng teh to̍h,

ū pō-hong tī I sì-ûi teh sàu.

4Ūi-tio̍h beh sím-phòaⁿ I ê chú-bîn,

I tiàu thiⁿ kap tōe lâi choh-chèng.

5I kóng, “Tio̍h tiàu-chi̍p góa sèng ê chú-bîn lâi góa chia,

chiū-sī ēng chè-sū kap góa li̍p-iok ê lâng.”

6Thiⁿ beh hián-bêng I ê kong-gī;

in-ūi Siōng-tè pún-sin sī Sím-phòaⁿ-chiá.

7“Góa ê chú-bîn ah, tio̍h thiaⁿ, góa beh kóng;

Í-sek-lia̍t ah, góa beh khòng-kò lí.

Góa sī Siōng-tè, lí ê Siōng-tè.

8Góa bô in-ūi lí ê chè-sū chek-pī lí;

lí ê sio-hòa-chè sî-siông tī góa ê bīn-chêng.

9Góa m̄-bián tùi lí ê gû-tiâu chiap-siū kang ê gû,

mā m̄-bián tùi lí ê iûⁿ-tiâu chiap-siū kang ê soaⁿ-iûⁿ.

10In-ūi chhiū-nâ lāi ê pah-siù,

chèng-soaⁿ ê cheng-siⁿ lóng sio̍k góa.

11Soaⁿ-lāi ê pe-chiáu, góa lóng bat;

khòng-iá ê cháu-siù mā lóng sio̍k góa.

12“Góa nā iau, mā bōe kā lí kóng;

in-ūi sè-kài kap bān-mi̍h lóng sio̍k góa.

13Góa kiám ōe chia̍h gû-káng ê bah,

lim soaⁿ-iûⁿ-káng ê huih?

14Lí tio̍h ēng kám-siā chòe chè hiàn hō͘ Siōng-tè;

tio̍h tùi Chì-koân-chiá siā-goān.

15Tī hoān-lān ê ji̍t, lí tio̍h kiû-kiò góa;

góa beh kiù lí, lí mā tio̍h chun-chông góa.”

16M̄-kú Siōng-tè tùi pháiⁿ-lâng kóng,

“Lí ná ū koân liām góa ê kui-lē,

chhùi kóng góa ê iok?

17Kî-si̍t lí iàm-ò͘ⁿ kà-sī,

chiong góa ê ōe tàn tī ka-chiah-āu.

18Lí kìⁿ-tio̍h chha̍t chiū kap i tâng-sim,

kap kiâⁿ kan-îm ê lâng tàu-tīn.

19“Lí ê chhùi kóng pháiⁿ-ōe;

lí ê chi̍h chè-chō kan-chà.

20Lí sûi-piān kóng hiaⁿ-tī ê sī-hui,

bû-lōa lí ê chhin-lâng.

21Lí chòe chiah-ê tāi-chì, góa tiām-tiām bô chhut-siaⁿ,

lí soah siūⁿ-kóng góa kap lí kâng-khoán.

M̄-kú góa beh chek-pī lí,

chiong chiah-ê tāi-chì pâi tī lí ê ba̍k-chiu chêng.

22“Lín chiah-ê bōe-kì-tit Siōng-tè ê lâng ah, tio̍h siūⁿ chit-ê sū,

chiah bián góa chiong lín thiah-chhùi, bô lâng thang kiù lín.

23Só͘-ū ēng kám-siā hiàn-chè ê lâng sī teh chun-chông góa;

kiâⁿ chiàⁿ-lō͘ ê lâng, góa beh hō͘ i tit-tio̍h Siōng-tè ê chín-kiù.”

Si-phian 50 - 現代台語譯本羅馬字版(TTVR)-闽南语

Learn More About Us