Í-sài-a-su 22

Í-sài-a-su 22 - 現代台語譯本羅馬字版(TTVR)-闽南语

Iú-koan Iâ-lō͘-sat-léng ê Sìn-sit

1Che sī iú-koan Īⁿ-siōng Soaⁿ-kok ê sìn-sit.

Sī-án-chóaⁿ lín lóng peh-chiūⁿ chhù-bé-téng?

2Lín chit-ê chhiong-móa lāu-jia̍t soan-hoa ê siâⁿ-chhī,

lín tiong-kan sí--khì ê lâng m̄-sī hō͘ to-kiàm thâi--sí,

mā m̄-sī tī chiàn-cheng tiong sí-bông.

3Lín só͘-ū ê koaⁿ-tiúⁿ kui-tīn tô-cháu,

bô chi̍t ê khui keng siā-chìⁿ.

Chiàn-sū sui-jiân cháu chin hn̄g,

mā hō͘ lâng chhē--tio̍h, chòe-chi̍t-ē lia̍h--khì.

4Só͘-í, góa kóng, “Mài chhap--góa,

hō͘ góa thòng-sim thî-khàu.

M̄-thang siūⁿ-beh kā góa an-ùi,

góa ê tông-pau lóng bia̍t-bông lah!”

5Che sī Chì-koân Siōng Chú — Bān-kun ê Thóng-sòe

hō͘ Īⁿ-siōng Soaⁿ-kok kiaⁿ-hiâⁿ, hūn-loān, siū thún-ta̍h ê ji̍t;

tī hit-ji̍t siâⁿ siū kong-phòa,

ai-kiò ê siaⁿ hiáng-piàn soaⁿ-kan.

6 Í-lân ê peng khiâ-bé, chē chiàn-chhia, tòa chìⁿ-tē lâi chìn-kong,

Kiat-ní ê peng chiong tún-pâi tu--chhut-lâi.

7Lí siōng-súi ê soaⁿ-kok chiàn-chhia móa-móa-sī,

bé-peng tī siâⁿ-mn̂g-kháu pâi-tīn.

8 Iû-tāi só͘-ū ê hông-ōe lóng sit-hāu.

Tī hit-ji̍t, lín kî-thāi Lê-pa-lūn Lîm-kiong

thê-kiong bú-khì.

9Lín hoat-kak Tāi-pi̍t-siâⁿ ū chin chōe phòa-khiah, chiū tī Hā-tî chek-chū chúi.

10Lín tiám-sǹg Iâ-lō͘-sat-léng ê chhù, thiah chhù lâi siu-pó͘ siâⁿ-chhiûⁿ, hō͘ chhiûⁿ khah hó hông-pī.

11Lín tī nn̄g ê siâⁿ-chhiûⁿ tiong-kan chō chúi-khut, thang chek-chū kū chúi-tî ê chúi. M̄-kú, lín lóng bô óa-khò chō chit-ê siâⁿ ê Siōng-tè, mā bô kā tùi kó͘-chá chiū kè-ōe chit-hāng tāi-chì Hit-ūi khàn-chāi-gán-lāi.

12Tī hit-ji̍t, Chì-koân Siōng Chú — Bān-kun ê Thóng-sòe kiò lín

tio̍h thî-khàu pi-siong,

tio̍h thì kng-thâu chhēng môa-saⁿ.

13M̄-kú lín kông-hoan-iàn-lo̍k,

thâi gû thâi iûⁿ, tōa-chia̍h tōa-lim.

Lín kóng, “Lán lâi chia̍h lâi lim,

in-ūi bîn-á-chài lán to beh sí ah!”

14Siōng Chú — Bān-kun ê Thóng-sòe chhin-sin kā góa khé-sī kóng,

“Chit-ê chōe, kàu lín sí, góa it-tēng bōe sià-bián!”

Chì-koân Siōng Chú — Bān-kun ê Thóng-sòe án-ni soan-pò͘.

Tùi Sià-pek-ná ê Kéng-kò

15Chì-koân Siōng Chú — Bān-kun ê Thóng-sòe án-ni kóng, “Lí khì kìⁿ kiong-têng châi-bū chóng-koán Sià-pek-ná, kā i kóng,

16‘Lí tī chia teh chhòng siáⁿ? Siáⁿ-lâng hō͘ lí koân-pèng tī chia ūi lí ka-kī phah hûn-bōng, tī koân ê giâm-chio̍h tiong chō chi̍t ê an-hioh ê só͘-chāi?

17-18Lí khòaⁿ--khí-lâi ká-ná chin liáu-put-khí, m̄-kú Siōng Chú beh kā lí lia̍h--khí-lâi, kā lí chhio̍k kui-oân chhin-chhiūⁿ kiû, hiat-khì chin hn̄g ê só͘-chāi. Lí ōe sí tī hia, lí lia̍h-chòe khoa-iāu ê chiàn-chhia mā ōe pàng tī hia. Lí ōe chiâⁿ-chòe lí chú-lâng ê ke ê kiàn-siàu.

19Góa beh thiat lí ê chit, pak lí ê ūi.

20“‘Tī hit-ji̍t, góa beh kā góa ê po̍k-jîn Hi-le̍k-ka ê kiáⁿ Í-lī-a-kèng tiàu--lâi.

21Góa beh chiong lí ê gōa-phàu hō͘ i chhēng, chiong lí ê io-tòa hō͘ i hâ, chiong lí ê koân-pèng kau hō͘ i. I beh chhin-chhiūⁿ lāu-pē khòaⁿ-kò͘ Iâ-lō͘-sat-léng ê chū-bîn kap Iû-tāi jîn-bîn.

22Góa beh chiong Tāi-pi̍t ông-tiâu ê só-sî khǹg tī i ê keng-thâu téng; i khui, chiū bô lâng ōe-tàng koaiⁿ; i koaiⁿ, chiū bô lâng ōe-tàng khui.

23Góa beh kā i an-tì tī ún-kò͘ ê tōe-ūi, chhin-chhiūⁿ khi̍t-á tèng chin tiâu. I beh chiâⁿ-chòe in lāu-pē ê ke ê êng-iāu.

24I ê ka-cho̍k, tùi kiáⁿ kàu sun ê tàⁿ-thâu, chhin-chhiūⁿ khaⁿ-á e-á, lóng kòa tī i sin-chiūⁿ.’”

25Siōng Chú — Bān-kun ê Thóng-sòe kóng, “Tī hit-ji̍t, tèng tī kian-kò͘ só͘-chāi ê khi̍t-á ōe lēng--khì, lak--khì. I phāiⁿ ê tāng-tàⁿ ōe bô--khì!”

Í-sài-a-su 22 - 現代台語譯本羅馬字版(TTVR)-闽南语

Learn More About Us