Si-phian 11 - 現代台語譯本羅馬字版(TTVR)-闽南语

Tāi-pi̍t ê si, kau hō͘ sèng-ga̍k-tiúⁿ.Sìn-khò Siōng Chú

1Siōng Chú sī góa ê pī-lān-só͘;

lín sī-án-chóaⁿ tùi góa kóng,

“Lí tio̍h chhin-chhiūⁿ chiáu pe-khì soaⁿ-lāi.

2Khòaⁿ ah, pháiⁿ-lâng áu-keng, an in ê chìⁿ tī keng-hiân,

beh àm-tiong siā sim chèng-ti̍t ê lâng.

3Tōe-ki pang--khì,

gī-lâng iáu ōe-tàng chòe sím-mi̍h?”

4Siōng Chú tī I ê sèng-tiān;

Siōng Chú ê pó-chō tī thiⁿ--ni̍h.

I ê ba̍k-chiu teh khòaⁿ,

kim-kim teh kàm-chhat sè-kan-lâng.

5Siōng Chú khó-giām gī-lâng;

pháiⁿ-lâng kap ài kiông-pō ê lâng, I iàm-ò͘ⁿ.

6I hō͘ teh to̍h ê hé-thòaⁿ kàng-lo̍h tī pháiⁿ-lâng sin-chiūⁿ,

ēng hé-iām, liû-hông, kap iām-jia̍t ê hong chòe in èng-siū ê pò-èng.

7Siōng Chú kong-gī, I ài kong-gī;

chèng-ti̍t ê lâng ōe kìⁿ-tio̍h I ê bīn.

Learn More About Us