Si-phian 24 - 現代台語譯本羅馬字版(TTVR)-闽南语

Tāi-pi̍t ê si.Úi-tāi ê Kun-ông

1Tōe kap tōe-chiūⁿ ê bān-mi̍h lóng sio̍k Siōng Chú;

Sè-kài kap tiàm tī hia ê oa̍h-mi̍h mā lóng sio̍k I.

2I kā tōe khǹg tī tōa-hái ê téng-bīn,

chiong tōe-ki hē tī chhim-hái.

3Sím-mi̍h khoán lâng ōe-tàng chiūⁿ Siōng Chú ê soaⁿ?

Sím-mi̍h khoán lâng ōe-tàng ji̍p I ê sèng-tiān?

4Chiū-sī chhiú chheng-khì, sim sûn-kiat,

bô pài ngó͘-siōng, bô sûi-piān chiù-chōa ê lâng.

5Chit-khoán lâng ōe siū Siōng Chú chiok-hok;

Siōng-tè beh chín-kiù i, soan-phòaⁿ i bô chōe.

6Chit-khoán lâng chhē-kiû Siōng Chú,

kàu Ngá-kok ê Siōng-tè bīn-chêng lâi tiâu-kìⁿ I.

7Siâⁿ-mn̂g ah, tio̍h phah-khui!

Éng-oán ê mn̂g ah, tio̍h tōa khui!

Êng-iāu ê Kun-ông beh ji̍p--lâi.

8Chit-ūi Êng-iāu ê Kun-ông sī sím-mi̍h-lâng?

Sī kiông koh ióng ê Siōng Chú!

I sī pek-chiàn-pek-sèng ê Siōng Chú!

9Siâⁿ-mn̂g ah, tio̍h phah-khui!

Éng-oán ê mn̂g ah, tio̍h tōa khui!

Êng-iāu ê Kun-ông beh ji̍p--lâi.

10Chit-ūi Êng-iāu ê Kun-ông sī sím-mi̍h-lâng?

Sī Siōng Chú — Bān-kun ê Thóng-sòe!

I sī Êng-iāu ê Kun-ông!

Learn More About Us