Iok-pek-kì 15

Iok-pek-kì 15 - 現代台語譯本羅馬字版(TTVR)-闽南语

Tē-jī Piàn Tùi-ōe(15.1-21.34)

1 Thê-bān-lâng Í-lī-hoat ìn Iok-pek kóng:

2Tì-hūi ê lâng kiám ōe ēng khang-hu ê tì-sek ìn-tap,

á-sī móa-chhùi lóng kóng phòng-hong-ōe?

3I kiám ōe ēng bô lī-ek,

á-sī bô lō͘-ēng ê ōe ka-kī piān-hō͘?

4Lí sī teh khì-sak kèng-ùi ê sim,

chó͘-tòng lâng tùi Siōng-tè kî-tó.

5Lí ê chōe éng-hióng lí kóng-ōe;

lí ê ōe lóng sī khúi-chà.

6Tēng lí ê chōe--ê sī lí ê chhùi, m̄-sī góa;

lí ê chhùi-tûn chèng-si̍t lí m̄-tio̍h.

7Lí sī thâu chi̍t ê chhut-sì ê lâng sī--bô?

Lí pí chiah-ê soaⁿ khah tāi-seng siū-chō sī--bô?

8Lí kiám sī Siōng-tè ê chham-bô͘, chai I ê kè-ōe?

Tì-hūi kiám kan-ta lí chiah ū?

9Ū sím-mi̍h lí chai, goán m̄ chai?

Á-sī lí liáu-kái, goán bô liáu-kái?

10Goán tiong-kan ū pe̍h thâu-mn̂g--ê kap nî-lāu--ê,

pí lí ê lāu-pē koh-khah lāu.

11Siōng-tè ê an-ùi kap un-hô khó͘-khǹg lí ê ōe,

lí khòaⁿ-chòe bô iàu-kín sī--bô?

12Lí ê sim ná ōe hiah-ni̍h kek-tōng,

lí ê ba̍k-chiu ná ōe gîn-ò͘ⁿ-ò͘ⁿ,

13hō͘ lí tí-te̍k Siōng-tè,

hō͘ lí ê chhùi kóng hiah-ê ōe?

14Lâng sǹg sím-mi̍h, kiám ū khó-lêng chheng-khì?

Hū-jîn-lâng só͘ siⁿ--ê kiám ōe-tàng sǹg-chòe gī?

15Siōng-tè liân I ê chhe-sài to bô sìn-jīm,

thiⁿ tī I gán-tiong mā bô chheng-khì,

16hô-hòng khó-ò͘ⁿ hú-pāi ê lâng!

In lim chōe-ok chhin-chhiūⁿ teh lim-chúi.

17Góa beh kā lí chí-sī, lí tio̍h chù-ì thiaⁿ;

góa só͘ khòaⁿ--tio̍h-ê, góa beh kā lí kóng.

18Chiū-sī ū tì-hūi ê lâng tùi chó͘-sian só͘ niá-siū,

bô ún-ba̍t thoân hō͘ góa--ê.

19Chit-ê èng-ún ê tōe chí-ū sù hō͘ lán ê chó͘-sian,

m̄-bat siū gōa-cho̍k chhim-chiàm.

20Pháiⁿ-lâng it-seng siū-chīn khó͘-chhó͘,

khi-ap lâng--ê mā ōe án-ni.

21Khióng-pò͘ ê siaⁿ siông-siông tī i ê hī-khang-piⁿ;

an-ún ê sî, kiông-tō ōe lâi chhiúⁿ-toa̍t i.

22I bô siong-sìn ōe-tàng tùi o͘-àm thoat-lī;

to-kiàm put-sî teh tng-tán i.

23I sì-kòe liû-lōng thó-chia̍h, kóng:

Tó-ūi ū chia̍h-mi̍h?

I chai o͘-àm ê ji̍t-chí í-keng kàu.

24Hoān-lān khùn-khó͘ hō͘ i kiaⁿ-hiâⁿ,

chhin-chhiūⁿ kun-ông chún-pī kong-kek ê khì-sè ap-tó i.

25In-ūi i chhut-chhiú kong-kek Siōng-tè,

chū-ko chū-tāi tùi Choân-lêng-chiá tián-ui.

26I ām-kún kek ngī, giâ kāu ê tún-pâi,

chhiong-khì beh kong-kek Siōng-tè.

27I ê bīn pûi-lut-lut,

pak-tó͘ pûi-chut-chut.

28I tòa ê siâⁿ bô kú ōe hong-hòe,

tòa ê chhù chù-tiāⁿ pìⁿ-chòe thô͘-tui, bô lâng khiā-khí.

29I bōe koh hó-gia̍h, châi-hù lâu bōe kú-tn̂g,

sán-gia̍p bōe-tàng tī tōe-chiūⁿ khok-tián.

30I bōe-tàng thoat-lī o͘-àm,

ōe chhin-chhiūⁿ iù-ki hō͘ hé sio-ta,

chhin-chhiūⁿ hoe hō͘ hong chhe-sòaⁿ.

31I m̄-thang óa-khò hu-ké lâi khi-phiàn ka-kī;

in-ūi hu-ké ōe chiâⁿ-chòe i ê pò-èng.

32Sî iáu-bē kàu, i ōe chhin-chhiūⁿ chang-chhiū ta--khì;

i ê ki bōe koh chhiⁿ-chhùi.

33I ōe chhin-chhiūⁿ phû-tô-chhiū, phû-tô iáu-bē sek chiū hō͘ lâng iô lak--khì,

chhin-chhiūⁿ kaⁿ-ná-chhiū, hoe chi̍t-ē khui chiū hō͘ lâng phah hìⁿ-sak.

34Bô kèng-ùi Siōng-tè ê cho̍k-lūi it-tēng bô hō͘-tāi;

khò hóe-lō͘ khí-chō ê chhù-the̍h ōe hō͘ hé sio--khì.

35In hoâi-īn to̍k-hāi, siⁿ-chhut siâ-ok;

in kui-ê pak-tó͘ lóng sī khúi-chà.

Iok-pek-kì 15 - 現代台語譯本羅馬字版(TTVR)-闽南语

Learn More About Us