Si-phian 77

Si-phian 77 - 現代台語譯本羅馬字版(TTVR)-闽南语

A-sat ê si, chiàu Iâ-tō͘-tùn ê choh-hoat, kau hō͘ sèng-ga̍k-tiúⁿ.Khó͘-lān Tiong ê An-ùi

1Góa beh tùi Siōng-tè tōa-siaⁿ kiû-kiò,

tùi Siōng-tè chhut tōa-siaⁿ, I ōe àⁿ hī-khang thiaⁿ.

2Tī hoān-lān ê ji̍t góa chhē Chú,

tī mî--sî gia̍h-chhiú kî-tó bô-thêng;

góa ê sim m̄-khéng siū an-ùi.

3Góa siàu-liām Siōng-tè, chiū thó͘-khùi ai-oàn;

góa chēng-chēng siūⁿ, chiū lóe-chì sit-bāng.

4Lí hō͘ góa ba̍k-chiu kim-khok-khok khùn bōe khì;

góa hoân-ló kah lóng bōe kóng-ōe.

5Góa tui-liām kè-khì ê ji̍t-chí,

hôe-sióng kó͘-chá ê nî.

6Góa mî--sî chēng-chēng siūⁿ;

góa bong sim-koaⁿ ka-kī mn̄g, sim-sîn siông-sè séng-chhat.

7Chú kiám ōe éng-oán pàng-sak lán?

I kiám bōe koh si-un hō͘ lán?

8I ê chû-ài kiám ōe éng-kiú siau-sit?

I ê èng-ún kiám ōe éng-oán lo̍k-khong?

9Siōng-tè kiám bōe-kì-tit si-un,

kiám í-keng ēng siū-khì tāi-thòe I ê chû-pi?

10Góa kóng, “Góa siōng thòng-sim--ê,

chiū-sī Chì-koân Siōng-tè bô koh ū khùi-la̍t.”

11Góa beh kóng-khí Siōng Chú lí ê chok-ûi,

siàu-liām lí chá-sî ê sîn-jiah.

12Góa beh chhim-su lí ê chok-ûi,

chēng-chēng siūⁿ lí ê só͘-chòe.

13Siōng-tè ah, lí ê tō-lō͘ sîn-sèng;

kiám ū sîn-bêng chhin-chhiūⁿ lí chiah-ni̍h úi-tāi?

14Lí sī kiâⁿ kî-sū ê Siōng-tè;

lí bat tī bān-bîn tiong hián-sī lí ê koân-lêng.

15Lí bat ēng lí ê chhiú sio̍k-hôe lí ê chú-bîn,

kái-kiù Ngá-kok kap Iok-sek ê kiáⁿ-sun.

16Siōng-tè ah, tōa-chúi kìⁿ-tio̍h lí,

tōa-chúi kìⁿ-tio̍h lí lóng kiaⁿ-hiâⁿ;

chhim-ian mā ngia̍uh-ngia̍uh-chhoah.

17Ba̍t-hûn piàⁿ-lo̍h hō͘-chúi,

kiong-chhong tân-lûi,

lí ê sih-nà sì-kòe siā.

18Kńg-lê-á-hong lāi-bīn ū lí tân-lûi ê siaⁿ;

sih-nà ê kng sih kàu choân-tōe;

tōe ngia̍uh-ngia̍uh-chhoah tōa iô-tāng.

19Hái-tiong ū lí ê tō-lō͘,

tōa-chúi tiong ū lí ê lō͘-kèng;

lí ê kha-jiah bô lâng chai.

20Lí bat ēng Mô͘-se A-lûn ê chhiú,

chhōa lí ê chú-bîn chhin-chhiūⁿ teh chhōa iûⁿ-kûn.

Si-phian 77 - 現代台語譯本羅馬字版(TTVR)-闽南语

Learn More About Us