Si-phian 105

Si-phian 105 - 現代台語譯本羅馬字版(TTVR)-闽南语

Siōng-tè Ín-chhōa I ê Chú-bîn(1 Tāi 16.8-22)

1Lín tio̍h kám-siā Siōng Chú, kiû-kiò I ê miâ,

tī bān-bîn tiong pò-iông I ê chok-ûi.

2Tio̍h tùi I gîm-si, ǹg I chhiùⁿ-koa o-ló,

tâm-lūn I it-chhè kî-biāu ê só͘-chòe.

3Tio̍h khoa-iāu I ê sèng-miâ.

Goān chhē-kiû Siōng Chú ê lâng sim-lāi hoaⁿ-hí.

4Tio̍h óa-khò Siōng Chú kap I ê koân-lêng,

put-sî chhē-kiû kìⁿ I ê bīn.

5-6I ê po̍k-jîn A-pek-la-hán ê hō͘-tāi,

I só͘ kéng Ngá-kok ê kiáⁿ-sun ah,

lín tio̍h siàu-liām I kî-biāu ê chok-ûi,

siàu-liām I ê sîn-jiah kap I só͘ kóng phòaⁿ-toàn ê ōe.

7I sī Siōng Chú — lán ê Siōng-tè;

I ê sím-phòaⁿ phó͘-ki̍p choân-tōe.

8I ōe-kì-tit I ê iok ti̍t-kàu éng-oán,

I ê èng-ún ti̍t-kàu bān-tāi.

9I ōe-kì-tit kap A-pek-la-hán li̍p ê iok,

tùi Í-sat só͘ li̍p ê sè.

10I chiong chit-ê iok hō͘ Ngá-kok chòe kui-lē,

hō͘ Í-sek-lia̍t chòe éng-oán ê iok.

11I kóng, “Góa beh chiong Ka-lâm-tōe sù hō͘ lí,

chòe lí èng-tit ê sán-gia̍p.”

12Tng-sî in ê jîn-kháu iú-hān, jîn-sò͘ chin chió;

in tī hia chòe chhut-gōa-lâng.

13In tùi chit-cho̍k kiâⁿ kàu hit-cho̍k,

tùi chit-kok kàu hit-kok.

14I bô iông-ún lâng ap-pek in;

ūi-tio̍h in ê iân-kò͘, I khiàn-chek hiah-ê kun-ông.

15I kóng, “M̄-thang kha̍p-tio̍h góa kéng-soán ê po̍k-jîn,

mā m̄-thang khi-hū góa ê sian-ti.”

16I hō͘ ki-hng kàng-lo̍h tī hit-ê thó͘-tōe,

hō͘ só͘ óa-khò ê bí-niû lóng toān-choa̍t.

17I chhe chi̍t ê lâng seng khì,

chiū-sī siū bōe chòe lô͘-lē ê Iok-sek.

18Lâng ēng kha-khàu khàu i ê kha,

ēng thih-liān liān i ê ām-kún.

19Siōng Chú ê ōe kā i khó-giām,

ti̍t-kàu I ê ū-giân si̍t-hiān.

20Ông chhe lâng kā i tháu-khui;

thóng-tī bān-bîn ê Hoat-ló kā i tháu-pàng.

21Ông siat-li̍p i chòe cháiⁿ-siòng,

chiáng-koán Hoat-ló lóng-chóng ê châi-bu̍t,

22thang sûi-ì pa̍k i ê jîn-sîn,

ēng tì-hūi koán-kàu i ê tiúⁿ-ló.

23 Í-sek-lia̍t mā lâi kàu Ai-ki̍p;

Ngá-kok chhut-gōa tī Hâm ê tōe.

24Siōng Chú hō͘ I ê chú-bîn siⁿ-thòaⁿ chin chōe,

hō͘ in pí tùi-te̍k khah kiông.

25I kái-piàn tùi-te̍k ê sim, hō͘ in oàn-hūn I ê chú-bîn,

ēng khúi-khiat ê kè-bô͘ tùi-thāi I ê po̍k-jîn.

26I chhe I ê po̍k-jîn Mô͘-se,

kap I só͘ kéng ê A-lûn,

27tī tùi-te̍k ê tiong-kan kiâⁿ I ê sîn-jiah,

tī Hâm ê tōe kiâⁿ kî-sū.

28I kàng-lo̍h o͘-àm, tōe chiū àm-bong-bong;

Ai-ki̍p-lâng iáu-kú m̄ thiaⁿ-thàn I ê ōe.

29I hō͘ in ê chúi pìⁿ-chòe huih,

chúi-lāi ê hî lóng sí.

30Tī in ê thó͘-tōe chhân-kap-á móa-móa-sī,

liân ông ê pâng-keng to ū.

31I chi̍t-ē chhut-siaⁿ, hô͘-sîn kui-tīn pe--lâi,

koh tī in ê kéng-lāi ū sat-bú móa-sì-kòe.

32I lo̍h-pha̍uh tāi-thòe hō͘,

kàng-lo̍h sih-nà tī in choân-tōe.

33I sàu-tó in ê phû-tô-chhiū kap bû-hoa-kó-chhiū,

húi-hoāi in kéng-lāi ê chhiū-ba̍k.

34I chi̍t-ē chhut-siaⁿ, kui-kûn ê chháu-meh kap chháu-meh-á-kiáⁿ chiū pe--lâi,

chōe kah bōe-sǹg--tit,

35kā in thó͘-tōe ê chhài-soe chia̍h-liáu-liáu,

koh thun-chia̍h in ê chhân-hn̂g só͘ chhut ê ngó͘-kok.

36I phah-sí in kok-lāi só͘-ū ê tōa-kiáⁿ,

chiū-sī in ióng-chòng ê sî só͘ siⁿ--ê.

37I chhōa in chhut--lâi, tòa gûn tòa kim;

I ê chi-cho̍k tiong bô chi̍t ê loán-jio̍k.

38In chhut--lâi ê sî, Ai-ki̍p-lâng tōa hoaⁿ-hí,

in-ūi Ai-ki̍p-lâng chin kiaⁿ in.

39I ēng hûn kā in jia,

mî--sî ēng hé kā in chiò.

40In chi̍t-ē kiû, I chiū hō͘ ian-chhun pe--lâi,

koh ēng thiⁿ ê chia̍h-mi̍h hō͘ in pá-chiok.

41I phah-khui chio̍h-pôaⁿ, chúi chiū chhèng--chhut-lâi,

chiâⁿ-chòe hô-liû lâu-kè khòng-iá.

42In-ūi I ōe-kì-tit I sèng ê èng-ún,

ōe-kì-tit I ê po̍k-jîn A-pek-la-hán.

43I chhōa I ê chú-bîn hoaⁿ-hoaⁿ-hí-hí chhut--lâi,

chhōa I kéng-soán ê chú-bîn chhiùⁿ hoaⁿ-hí ê koa hiòng-chêng kiâⁿ.

44I chiong lia̍t-kok ê thó͘-tōe sù hō͘ in,

hō͘ in sêng-chiap pa̍t-ê bîn-cho̍k lô-khó͘ tit--tio̍h ê châi-hù,

45thang hō͘ in chun-thàn I ê kui-lē,

chun-siú I ê lu̍t-hoat.

Ha-lé-lú-iah, chheng-chàn Siōng Chú!

Si-phian 105 - 現代台語譯本羅馬字版(TTVR)-闽南语

Learn More About Us